ارتىندا بەس بالاسى قالدى: بقو-دا سۋعا باتىپ بارا جاتقان قىزدى قۇتقارامىن دەپ ەكى مۇعالىم مەرت بولدى

ەكى ەر ادام سۋعا باتىپ بارا جاتقان 13 جاستاعى قىزدى قۇتقارماق بولعان.

«قۇتقارۋشىلار وقيعا ورنىنا جەتكەنشە جەرگىلىكتى تۇرعىندار سۋدان 25 جانە 37 جاستاعى ەكى ەر ادامنىڭ دەنەسىن الىپ شىقتى», – دەپ حابارلادى وبلىستىق توتەنشە جاعدايلار دەپارتامەنتىنىڭ ءباسپاسوز قىزمەتى.

قايتىس بولعانداردىڭ ءبىرى اباي اۋىلىنىڭ 37 جاستاعى تۇرعىنى, اعىلشىن ءتىلى مۇعالىمى قانات شايحيدەنوۆ بولسا, ەكىنشىسى – استاناداعى ءابىش كەكىلباەۆ اتىنداعى BINOM مەكتەبىنىڭ فيزيكا ءپانىنىڭ مۇعالىمى بەكارىس ءامينوۆ.

قايعىلى جاعداي بولعان كۇنى قانات وتباسىمەن وزەن جاعاسىندا دەمالىپ جاتقان. جاقىن جەردە ءجاسوسپىرىم قىز بەن ەكى ەر ادام سۋعا ءتۇسىپ جۇرگەن. كەنەت قىز سۋعا باتا باستاعان. سول كەزدە قىزدىڭ اعاسى كومەككە ۇمتىلعان. قىزدىڭ كومەككە شاقىرعان داۋسىن ەستىگەن قانات تا سۋعا سەكىرگەن. قىزدى امان الىپ قالعانىمەن, ەكەۋى دە جاعاعا جەتە الماعان.

بەكزات ءسابيتوۆ ەسىمدى تۇرعىننىڭ ايتۋىنشا, قانات شايحيدەنوۆ اباي اۋىلىنداعى مەكتەپتە جوعارى بىلىكتى ۇستاز بولعان. ارتىندا جارى مەن بەس بالاسى قالعان. ۇلكەن ۇلىنىڭ مۇگەدەكتىگى بار, ال كەنجەسى ۇش اي بۇرىن عانا دۇنيەگە كەلگەن. ال اۋىلعا جازعى دەمالىسقا كەلگەن بەكارىس ءامينوۆ تامىز ايىندا شاڭىراق كوتەرمەك بولعان.

قايعىلى وقيعانىڭ ەرتەڭىنە BINOM مەكتەبىنىڭ جەلىدەگى پاراقشاسىندا بەكارىس ءامينوۆتىڭ وتباسى مەن جاقىندارىنا كوڭىل ايتقان جازبا جاريالاندى.

«تاڭمەن جەتكەن سۋىق حابار ءبارىمىزدىڭ قابىرعامىزدى قايىستىردى. ورتامىزداعى ارداقتى, شاكىرت جۇرەگىنەن ەرەكشە ورىن العان, تالانتتى دا جاس ۇستازىمىز ءامينوۆ بەكارىس قاليوللا ۇلى دۇنيەدەن ءوتتى دەگەن قارالى حاباردى اۋىر كۇيزەلىسپەن قابىلداپ وتىرمىز. سەنە الار ەمەسپىز. بەكارىس 2000 جىلى 4 قازاندا دۇنيەگە كەلگەن. تەرەكتى اۋدانىنىڭ تۋماسى. جوعارى وقۋ ورنىن ءساتتى ءتامامداپ, ءابىش كەكىلباەۆ اتىنداعى BINOM مەكتەبىمىزگە اشىلۋىنان جاس مامان رەتىندە كەلىپ, العاشقى ەڭبەك جولىن وسى ءبىلىم ورداسىندا فيزيكا ءپانىنىڭ ۇستازى رەتىندە باستادى. ۇجىمدا ءوزىنىڭ زەرەكتىگىمەن, جاۋاپكەرشىلىگىمەن, قاراپايىم دا ەلگەزەك مىنەزىمەن ەرەكشەلەندى. جاس بولسا دا, سىنىپ جەتەكشىلەرى ادىستەمەلىك بىرلەستىگىنىڭ جەتەكشىسى جۇمىسىن ۇلكەن جاۋاپكەرلىكپەن اتقاردى. ارىپتەستەرى اراسىندا سىيلى, اتا-انالار مەن وقۋشىلاردىڭ ەرەكشە قۇرمەتىنە يە بولدى. الدا جارقىن بولاشاعى, ۇلكەن ارماندارى تۇر ەدى. بيىل 2 تامىزدا ءوزىنىڭ ۇيلەنۋ تويى بولۋعا ءتيىس ەدى… بۇل – ورنى تولماس اۋىر قازا. جاسىنداي جارق ەتكەن ءومىرىنىڭ مەزگىلسىز ۇزىلۋىنە قايعىرا وتىرىپ, مارقۇمنىڭ وتباسى مەن تۋعان-تۋىستارىنا, ارىپتەستەرى مەن شاكىرتتەرگە قايعىرىپ كوڭىل ايتامىز», – دەلىنگەن جازبادا.