Қазақстан Үкіметі экономиканың нақты секторын қолдауға бұрын-соңды болмаған көлемде қаржы бөлмек.
Импортқа тәуелділікті азайтып, ішкі нарықты отандық өніммен қамту үшін жаңа қаржылық құралдар іске қосылады, деп хабарлайды qandastar.kz порталы.
Премьер-министрдің орынбасары – ұлттық экономика министрі Серік Жұманғарин экономиканың нақты секторына шамамен 8 трлн теңге көлемінде қолдау шаралары бағытталатынын мәлімдеді.
Бұл қолдау «Инвестицияға тапсырыс» тетігін енгізу және «Бәйтерек» холдингін 1 трлн теңгеге дейін капиталдандыру арқылы жүзеге асады.
Негізгі басымдық – инфляцияға әсер ететін базалық тауарлар тапшылығын жою. Қазірдің өзінде азық-түлік секторында 12, ал азық-түлікке жатпайтын салада 24 бағыт айқындалған. Ал 2030 жылға дейін «Бәйтерек» холдингінің еншілес ұйымдары арқылы $100–120 млрд көлемінде өнеркәсіптік жобалар қаржыландырылады.
«Біздің мақсат – ішкі нарықты отандық өндіріс тауарларымен қамтамасыз ету және импортқа тәуелділікті төмендету», – деді Серік Жұманғарин.
Жаңа саясат экономиканы индустрияландыруды жеделдетіп, әртараптандыруды күшейтуге бағытталған проактивті модельге көшуді көздейді.
