90 жастағы алматылық әжейдің тауға серуені әлеуметтік желіде көпшіліктің ықыласына бөленді. Ол «Медеу» маңындағы Денсаулық баспалдағымен көтеріліп қана қоймай, Горельник шатқалына дейін жеткен, дейді Qandastar.kz.
Бұл әсерлі сәттің видеосын алматылық Меруерт әлеуметтік желіде бөлісті. Оның айтуынша, олар жолда демалып отырған кезде жасы тоқсанға келген әжей қысқа ғана аялдап, еш қиналмастан жоғары қарай жолын жалғастырған.
Меруерттің сөзінше, әжей орындыққа отырып ұзақ тынықпаған. Бар болғаны жарты минуттай демалып, қайта қозғалған. Бұл оның тың дайындығы мен өмірге деген белсенді көзқарасын көрсеткен.
Бейнежазба әлеуметтік желі қолданушыларының ерекше ықыласына ие болды. Көпшілік әжейдің қайсарлығына таңданысын білдіріп, оған ұзақ ғұмыр, зор денсаулық және армандарының орындалуын тіледі.
Кейін белгілі болғандай, әжейдің мақсаты тек Денсаулық баспалдағымен көтерілу емес, Горельникке дейін жету болған. Осылайша ол көптен бері армандаған сапарын сәтті жүзеге асырды.
