الماتىدا «رۋحاني جاڭعىرۋ: ءداستۇر مەن ءدىن ماسەلەلەرى» تاقىرىبىندا دوڭگەلەك ۇستەل ءوتتى

27 مامىر كۇنى عىلىم ورداسىندا «ادىرنا» ۇلتتىق-ەتنوگرافيالىق بىرلەستىگى ر.سۇلەيمەنوۆ اتىنداعى شىعىستانۋ ينستيتۋتى مەن فيلوسوفيا, ساياساتتانۋ جانە ءدىنتانۋ ينستيتۋتىمەن بىرلەسە وتىرىپ «رۋحاني جاڭعىرۋ: ءداستۇر مەن ءدىن ماسەلەلەرى» تاقىرىبىندا دوڭگەلەك ۇستەل وتكىزدى. ايتا كەتەيىك جيىن «ازاماتتىق باستامالاردى قولداۋ ورتالىعىنىڭ» تاپسىرىسىمەن «ءداستۇرلى رۋحاني قۇندىلىقتاردى قولداۋ جونىندەگى جۇمىستاردى ۇيىمداستىرۋ» اتتى الەۋمەتتىك جوبا اياسىندا قولعا الىنىپ وتىر. 

دوڭگەلەك ۇستەلدى «ادىرنا» ۇلتتىق-ەتنوگرافيالىق بىرلەستىگىنىڭ باسشىسى ارمان اۋباكىر اشىپ, كەلگەن قوناقتاردى تانىستىردى. قر بعم عك فيلوسوفيا, ساياساتتانۋ جانە ءدىنتانۋ ينستيتۋتى ديرەكتورىنىڭ ورىنباسارى, فيلوسوفيا عىلىمدارىنىڭ دوكتورى, پروفەسسور نۇرمۇراتوۆ سەرىك «ۇلت قورعانى – ۇلتتىق قۇندىلىقتار» تاقىرىبىندا, قازبسقا-نىڭ اسسيستەنتى, پروفەسسور مەيىرمانوۆ امانجول «ءدىني بىرەگەيلىك جانە رۋحاني قۇندىلىقتار ۇندەستىگى» تاقىرىبىندا بايانداما جاسادى. سونداي-اق ر.سۇلەيمەنوۆ اتىنداعى شىعىستانۋ ينستيتۋتى ديرەكتورىنىڭ ورىنباسارى, ەكونوميكا عىلىمدارىنىڭ دوكتورى عالىمجان دۇيسەن مەن بەردالى وسپان, ەرلان تولەۋتاي ەسىمدى ەتنوگرافتار ورتاعا شىعىپ ءسوز الدى. دوڭگەلەك ۇستەلدە ستۋدەنتتەر مەن قوناقتار ەركىن پىكىر الماسىپ, جاستار دا ءوز ويلارىن ورتاعا سالدى.