«ەشقايدا بارۋدىڭ دا, قۇجاتپەن جۇگىرۋدىڭ دە قاجەتى جوق»: سالىق راقىمشىلىعىنا ىلىگۋ ءۇشىن نە ىستەۋ كەرەك

سالىق امنيستياسىنا ءىلىنۋ ءۇشىن ءوتىنىش جازۋدىڭ نەمەسە بەلگىلى ءبىر جەرگە بارۋدىڭ قاجەتى جوق. ءبىر عانا شارت – جينالعان نەگىزگى قارىزدى وتەۋ. بۇل تۋرالى قر قارجى ۆيتسە-ءمينيسترى قانات باەدىلوۆ ۇكىمەتتە وتكەن ءباسپاسوز كونفەرەنتسياسى كەزىندە ايتتى. سونداي-اق, ول بۇل پروتسەستىڭ قالاي جۇزەگە اساتىنىن ءتۇسىندىردى.

«ەڭ الدىمەن, كەلەسى نارسەگە نازارلارىڭىزدى اۋدارعىم كەلىپ وتىر. ءوسىمپۇلدى الىپ تاستاۋ ءۇشىن فيزيكالىق تۇلعا نەگىزگى قارىزدى وتەۋى ءتيىس بولادى. سالىق تولەۋشىگە بۇل ءۇشىن ارنايى ءبىر جەرگە بارۋدىڭ قاجەتى جوق. مەملەكەتتىك كىرىس ورگاندارى ءوزى مونيتورينگ جۇرگىزىپ, فيزيكالىق تۇلعالاردىڭ شوتتارىن باقىلاپ وتىرادى. ولار نەگىزگى قارىزدى تولەگەننەن كەيىن وسىمپۇلعا بايلانىستى ءتيىستى شەشىم شىعارادى. وسى ورايدا, 2019 جىلدىڭ 1 قاڭتارىنداعى جاعداي بويىنشا سالىق قارىزى بار ازاماتتاردى ءوزىنىڭ قارىزىنان ارىلۋ مۇمكىندىگىن پايدالانۋعا شاقىرامىن», — دەدى قانات باەدىلوۆ.

ءارى قاراي قارجى ۆيتسە-ءمينيسترى سالىق راقىمشىلىعىنا قاتىستى قۇجاتقا مەملەكەت باسشىسىنىڭ قول قويعانىن ەسكە سالدى. سونداي-اق, زاڭعا سايكەس, قارىزدى كەشىرۋ پروتسەسى قالاي جۇزەگە اساتىنىن انىقتاعانىن ايتتى.

«ءدال قازىر بۇل ەرەجە ءتيىستى ورگانداردا تەكسەرۋدەن ءوتىپ جاتىر. جۋىق ارادا ونى ماقۇلدايتىن بولامىز. ەرەجەگە سايكەس, ءاربىر اۋداندىق مەملەكەتتىك كىرىس باسقارماسىندا كوميسسيا قۇرىلادى. ولار نەگىزىنەن ءوسىمپۇلدى كەشىرۋمەن اينالىسادى. وسىعان سايكەس, كامپانيانى باستاۋ دا جوسپاردا بار. ول شىلدە ايىنىڭ ءۇشىنشى توقسانىنان باستالماق», — دەدى ول.

سونداي-اق, قانات باەدىلوۆ ازاماتتاردىڭ ءوزىنىڭ قارىزى تۋرالى قايدان بىلە الاتىنىنا توقتالدى. ايتۋىنشا, بۇل ءۇشىن باستاپقىدا ەتسق قاجەت بولادى. ونى قولدانۋ ارقىلى قارىز تۋرالى مەملەكەتتىك كىرىس كوميتەتىنىڭ ينتەرنەت رەسۋرسىنان جانە egov.kz, ەلەكتروندى ۇكىمەت سايتتارىنان بىلۋگە بولادى.

«وكىنىشكە وراي, باستاپقىدا ەتسق قاجەت بولادى. مەملەكەتتىك كىرىس ورگاندارى مەن قارجى مينيسترلىگى بىرىگىپ, ەتسق-سى جوق ازاماتتارعا جاعداي جاساپ جاتىرمىز. ولارعا ارناپ مەملەكەتتىك كىرىس كوميتەتىنىڭ سايتىندا ارنايى سەرۆيس قۇرىلدى.

سول جەردە جسن ءنومىرىن پايدالانۋ ارقىلى ءوزىنىڭ قارىزى تۋرالى بىلە الادى. بارلىق فيزيكالىق تۇلعا راقىمشىلىققا ىلىگۋى ءۇشىن ارنايى ءوتىنىش جازىپ, قانداي دا ءبىر قۇجاتتارمەن جۇگىرۋدىڭ قاجەتى جوق. ەڭ باستى شارت – جوعارىدا اتاپ وتكەنىمدەي نەگىزگى قارىزدى تولەۋ», — دەپ قورىتتى ۆيتسە-مينيستر.

ەستەرىڭىزگە سالا كەتسەك, وسى ۋاقىتقا دەيىن قازاقستاندا سالىق راقىمشىلىعى ءجۇرىپ جاتقانىن جانە وعان كىمدەردىڭ ىلىنەتىنى تۋرالى حابارلاعان ەدىك. سونداي-اق, قازاقستاندا سالىق قارىزى بويىنشا قاي وبلىستار مەن قالالاردىڭ كوش باستاپ تۇرعانى بەلگىلى بولدى.