جاڭالىقتار
پرەزيدەنت بيزنەسكە كەدەرگى كەلتىرەتىندەرگە قاتاڭ ەسكەرتۋ جاسادى
قازاقستان باسشىسى «ۇلتتىق بۋرجۋازيانى» بارىنشا قولداۋعا, ءجونسىز تەكسەرىس جۇرگىزگەندەردى قاتاڭ جازالاۋعا شاقىردى.
قاسىم-جومارت توقاەۆ قازاقستاندا بيزنەسكە كەدەرگى كەلتىرگەن مەملەكەتتىك ورگانداردىڭ جازالانۋى كەرەك ەكەنىن ايتتى.
«بيزنەستىڭ ءارى قاراي دامۋىنا كەدەرگى جاسايتىن مەملەكەتتىك ورگاندار مەن ولاردىڭ باسشىلارىنىڭ ارەكەتىن قىلمىسقا تەڭەيتىن ۋاقىت كەلدى. كوپتەگەن مەملەكەتتەگىدەي وسى ازاماتتارعا قاتىستى زاڭنامادا قاتاڭ شارا قاراستىرىپ, قىلمىستىق قۋدالاۋعا دەيىن اپارعان دۇرىس», — دەدى توقاەۆ ۇكىمەتتىڭ كەڭەيتىلگەن وتىرىسىندا.
ءارى قاراي ول ۇلتتىق بيزنەستى بارىنشا قولداۋ قاجەت ەكەنىنە توقتالدى. الداعى ۋاقىتتا ءجونسىز تەكسەرىس جۇرگىزىپ, باقىلاۋ ۇيىمداستىراتىنداردىڭ قاتاڭ تۇردە جازالاناتىنىن ەسكەرتتى.
«بيزنەستىڭ دامۋىنا كەدەرگى كەلتىرەتىن شەنەۋنىكتەر تۇرمەگە جابىلادى. ۇكىمەتكە زاڭناماعا وزگەرىس ەنگىزۋدى تاپسىرامىن», — دەدى توقاەۆ.
ەستەرىڭىزگە سالا كەتسەك, قاسىم-جومارت توقاەۆ قورعانىس مينيسترىنە قاتاڭ سوگىس جاريالاعان بولاتىن.
