اسىقساڭ ايىپپۇل ارقالايسىڭ. جول ەرەجەسى تاعى وزگەرەدى

بۇل جولداعى قاۋىپسىزدىكتى ارتتىرادى دەسەدى.

قر ىشكى ىستەر مينيسترلىگىنە «ورتاشا جىلدامدىق» ۇعىمىن ەنگىزۋ مەن ونى اسىرعانداردى اقشامەن جازالاۋ جاعىن ويلاستىرۋ تاپسىرىلعان بولاتىن. بۇل تۋرالى ءىىم اكىمشىلىك پوليتسيا كوميتەتى توراعاسىنىڭ ورىنباسارى الىبەك كەڭىسباەۆ ورتالىق كوممۋنيكاتسيالار قىزمەتىندە وتكەن بريفينگتە ايتتى, دەپ حابارلايدى Zakon.kz.

3 شىلدەدە ىشكى ىستەر مينيسترلىگى مەن پارلامەنت دەپۋتاتتارى جول قوزعالىسى قاۋىپسىزدىگى ماسەلەلەرى بويىنشا دوڭگەلەك ۇستەل وتكىزىپ, ونىڭ بارىسىندا جول قوزعالىسى قاۋىپسىزدىگىنىڭ دەڭگەيىن ارتتىرۋعا باعىتتالعان بىرقاتار ۇسىنىستار جاسالدى. ەلدەگى ءاربىر ءۇشىنشى جول اپاتىنا جىلدامدىقتى ارتتىرۋ سەبەپ دەگەن دايەك ايتىلدى. سوعان بايلانىستى, جىلدامدىقتى ارتتىرۋمەن كۇرەسۋ ءۇشىن ىشكى ىستەر مينيسترلىگىنە «ورتاشا جىلدامدىق» ۇعىمىن زاڭعا ەنگىزۋ ۇسىنىلدى, – دەپ اتاپ ءوتتى كەڭىسباەۆ.

ونىڭ سوزىنشە, ورتاشا جىلدامدىق ءۇشىن جازالاۋ جۇزەگە بىلاي اسىرىلماق: ماسەلەن, نۇر-سۇلتان-بۋراباي تاس جولىنىڭ باسىندا ورناتىلعان كامەرا كولىكتىڭ ماركاسى مەن ءنومىرىن, وتكەن ۋاقىتىن جازىپ الادى. تاس جولدىڭ اياعىندا, بۋرابايدىڭ كىرە بەرىسىندە ورناتىلاتىن ەكىنشى كامەرا كولىكتىڭ جەتكەن ۋاقىتىن ەسەپتەپ, ورتاشا جىلدامدىعىن شىعارا قويادى.

— ەگەر ورتاشا جىلدامدىق رۇقسات ەتىلگەن مەجەدەن اسىپ كەتسە, مىسالى, رۇقساتتى جىلدامدىق 140 شاقىرىم/ساعات بولسا, ال كامەرا ەسەپتەگەن كورسەتكىش 150-دەن اسىپ كەتسە – جۇرگىزۋشى ايىپپۇل ارقالايدى, — دەپ ءتۇسىندىردى پوليتسەي.
«ورتاشا» جىلدامدىق ولشەۋ كامەرالارى قالا سىرتىندا, رەسپۋبليكالىق ماڭىزى بار جولدارعا ورناتىلماق ەكەن.

— بۇل جولداعى جاعدايدىڭ جاقسارۋىنا, سونداي-اق جازاتايىم وقيعالار سانىنىڭ ازايۋىنا اسەر ەتەدى… ورتاشا جىلدامدىق ءۇشىن سالىناتىن ايىپپۇلعا كەلسەك, 592-باپ – جىلدامدىقتى اسىرۋ ءۇشىن جاۋاپكەرشىلىك كوزدەيدى. بولەك ايىپپۇل ويلاپ تاپپايمىز, — دەپ اتاپ ءوتتى كوميتەت باسشىسىنىڭ ورىنباسارى.