Ana sútiniń nárestege paıdasy qandaı

Emizý áıel densaýlyǵy úshin de óte paıdaly. Sábıin emizetin analar bosanǵannan keıingi kúızeliske sırek shaldyǵady.

1-7 tamyz aralyǵynda Qazaqstanda dástúrli Dúnıejúzilik bala emizý aptalyǵy ótedi, dep habarlaıdy QazAqparat QR Densaýlyq saqtaý mınıstrligi Qoǵamdyq densaýlyq saqtaý ulttyq ortalyǵyna silteme jasap.

Dúnıejúzilik densaýlyq saqtaý uıymynyń bastamasymen jyl saıyn tamyzdyń basynda 170 elde, onyń ishinde Qazaqstanda Dúnıejúzilik ana sútimen emizý aptalyǵy ótedi. Onyń basty maqsaty — ana sútiniń paıdasy týraly áıelderge aqparat berý.

«Ana sútinde balanyń saý damýyna qajetti barlyq paıdaly zattar: maılar, aqýyzdar, kómirsýlar, dárýmender jáne mıneraldar bar. Onyń quramyndaǵy tabıǵı antıdeneler jańa týǵan náresteniń ımmýnıtetin nyǵaıtady, balalar aýrýynan saqtaýǵa kómektesedi. Iaǵnı, ana sútimen qorektenetin balalarǵa óte sırek sýyq tıedi jáne jasandy qorektenetin balalarǵa qaraǵanda juqpaly aýrýlarǵa, dıareıa men allergııaǵa sırek shaldyǵady»,- dep habarlady Qoǵamdyq densaýlyq saqtaý ulttyq ortalyǵynyń baspasóz qyzmetinen.

Sondaı-aq emizý sábıdiń sensorlyq jáne tanymdyq damýyna oń yqpalyn tıgizedi. Nárestelerdiń ólim-jitimin tómendetýge, syrqattardan erterek saýyǵýǵa járdemdesedi.

«Dúnıejúzilik densaýlyq saqtaý uıymynyń Qazaqstanda jáne Eýropanyń birqatar elderinde júrgizgen zertteýine sáıkes, eshqashan ana sútin embegen nemese sırek emgen balalar semizdikke kóbirek ushyraıdy. Sáıkesinshe, uıym balany ómiriniń alǵashqy 6 aıynda tek ana sútimen emizýge keńes beredi. Odan keıin 2 nemese odan úlken jasqa deıin emizýmen birge qosymsha taǵam qospalaryn berýdi usynady», — delingen resmı habarlamada.

Emizý áıel densaýlyǵy úshin de óte paıdaly. Sábıin emizetin analar bosanǵannan keıingi kúızeliske sırek shaldyǵady. Onymen qosa, analyq bez, sút bezi obyrynyń damý qaýpin tómendetedi, bosanǵannan keıin ananyń salmaǵyn azaıtýǵa yqpal etedi.

#ana men bala #bala emizý