Endi shylym shekseńiz 126 myń teńge aıyppul tóleısiz

Budan bylaı Qazaqstan aýmaǵynda ushyp-qonyp júrgen áýeborttarda temeki shekseńiz 126 250 teńge aıyppul tóleıtin bolasyz. Bul týraly «Eır Astana» áýekompanııasynyń baspasóz qyzmeti habarlady.

2019 jylǵy sáýir aıynda el Prezıdenti Ákimshilik quqyq buzýshylyqtar Kodeksiniń «Temeki ónimderi men elektrondy temekini jeke qoǵam oryndarda tutynýǵa tyıymdy buzý» 441 babyna ózgerister men tolyqtyrýlar engizgen bolatyn. Túzetýlerge sáıkes Qazaqstanda ushaq bortynda shylym shekkeni úshin aıyppul mólsheri 50 AEK qurady, ıaǵnı 126 250 teńge. 2015 jyly bul 3 AEK (5 946 teńge) quraǵan. Jańa erejeler boıynsha 2019 jylǵy mamyrdan bastap 26 jolaýshyǵa shylym shekkeni úshin aıyppul salynǵan. 2018 jyly 2015 jylmen salystyrǵanda «Eır Astana» bortynda temeki shekken jolaýshylardyń sany 123 oqıǵadan 166-qa deıin ósip, 34% qurady. Tártipti buzǵandardyń basym bóligi Almaty men Ystambul, Almaty men Máskeý jáne Almaty men Kıev arasyndaǵy reısterdiń jolaýshylary. Osyǵan oraı «Eır Astana» áýekompanııasy ushaq ishinde qaýipsizdik erejelerin qatań saqtaý kerektigin eskertedi. Ushý qaýipsizdigi – otandyq kompanııanyń eń basty qundylyǵy. Ushaq bortynda erejelerdi buzǵan jolaýshy barǵan eldiń zańyna sáıkes shara qoldaný úshin quqyq qorǵaý organdaryna tapsyrylady. Basqa memleketterdiń zańynda áýe kemesiniń bortynda shylym shegý mol mólsherdegi aıyppulmen jazalanady. Mysaly, Ulybrıtanııada ushaq bortynda shylym shekkenderge 2500 fýnt aıyppul qarastyrylsa, Japonııada aıyppul 500 myń ıen quraıdy (shamamen 4,8 myń AQSh dollary).

Derekkóz: https://aikyn.kz/economy/aviation/6164-26-myng-tengge-ayyppul-toeleys%D1%96z/