تامىزدىڭ سوڭىنا دەيىن نەسيە ايىپپۇلدارى مەن وسىماقىلار وتەلەدى

قر پرەزيدەنتى قاسىم-جومارت توقاەۆ حالىقتىڭ الەۋمەتتىك وسال توپتارىنىڭ, جالعىز اسىراۋشىسىنان ايىرىلعان مۇگەدەك بالالارى بار وتباسىلاردىڭ, اتاۋلى الەۋمەتتىك كومەك الۋشىلاردىڭ قارىزدىق جۇكتەمەسىن جەڭىلدەتۋ تۋرالى تاپسىرما بەرگەن بولاتىن. وسىعان بايلانىستى نۇر-سۇلتان قالاسى اكىمدىگىندە ەكىنشى دەڭگەيلى بانكتەرگە جانە ميكروقارجى ۇيىمدارىندا كەپىلسىز تۇتىنۋشىلىق نەسيەلەر بويىنشا قارىزدى تولەۋ مەحانيزمىن ءتۇسىندىرۋ بويىنشا بريفينگ ءوتتى.

«ءبىرىنشى باعىت: 1 ماۋسىمعا دەيىن ەكىنشى دەڭگەيلى بانكتەردەن 3 ميلليوننان اسپايتىن نەسيە العان ازاماتتار قارىزىنىڭ 300 مىڭ تەڭگەسىن وتەۋ. بۇل باعىت بويىنشا 447 957 ادام انىقتالىپ, وعان 1 ملرد تەڭگەدەن استام قارجى بولىنگەن. ەكىنشى باعىت حالىقتىڭ بارلىق الەۋمەتتىك دەڭگەيىنە ارنالعان, ياعني قارىزدى وتەمەگەن كەزدە ۇستىنەن جينالاتىن ايىپپۇلدار مەن وسىماقىنى جابۋ. بۇل باعىت بويىنشا 1 ميلليوننان استام ادام انىقتالعان. ولاردىڭ قارىزىن وتەۋ ءۇشىن 30 ميللياردتان استام تەڭگە قارجى قاراستىرىلعان», — دەيدى قر ۇلتتىق بانكى قارجى ۇيىمدارىنىڭ ءادىسناماسى جانە رەتتەۋ دەپارتامەنتىنىڭ ديرەكتورى داۋرەن سالىمباەۆ.

قر ەڭبەك جانە حالىقتى الەۋمەتتىك قورعاۋ مينيسترلىگىنىڭ انا مەن بالانى قولداۋ باسقارما باسشىسى اسقار نيازوۆتىڭ ايتۋىنشا, ازىرگە قانشا ادامنىڭ قارىزى وتەلگەنى تۋرالى ناقتى اقپارات جوق ەكەنىن ايتتى.

«بۇگىنگى كۇنگە دەيىن قانشا ادامنىڭ قارىزى وتەلگەنى تۋرالى ناقتى اقپارات جوق, بىراق بىزگە 1 942 155 ادامنىڭ ءتىزىمى بەرىلدى. الەۋمەتتىك وسال توپتاردىڭ ىشىنە كىرەتىن 3 ميلليون تەڭگەگە دەيىن قارىزى بار 447 957 ازاماتتىڭ ءتىزىمى ۇلتىق بانككە جولداندى, ول جەردە ەكىنشى دەڭگەيلى بانكتەرگە جولدانادى. ول جەردە ءاربىر ازاماتتىڭ بەرەشەگى, ياعني تۇتىنۋشىلىق قارىزدارى ناقتىلانىپ, ءتىزىم قر ەڭبەك جانە حالىقتى الەۋمەتتىك قورعاۋ مينيسترلىگىنە قايتا جولداناتىن بولادى. مەملەكەت باسشىسى قاسىم-جومارت توقاەۆتىڭ جارلىعىنا سايكەس, 105 ميللياردعا جۋىق تەڭگە قارجى: ونىڭ 88 ميلليارد تەڭگەسى ۇلتتىق قوردان, 17 ميلليارد تەڭگە ۇلتتىق بانك تاراپىنان قوسىمشا وبليگاتسيالار شىعارۋ ارقىلى بەرىلەدى», — دەيدى ول.

اتالعان قارىزداردى جابۋ جۇمىستارى جۇرگىزىلىپ جاتىر.

«قر ەڭبەك جانە حالىقتى الەۋمەتتىك قورعاۋ مينيسترلىگى ۇلتتىق بانكپەن, سوسىن قالالىق اكىمدىكتەگى ەڭبەك جانە حالىقتى الەۋمەتتىك قورعاۋ باسقارماسىمەن بىرلەسە وتىرىپ وسى جۇمىستىڭ بارلىعىن قىركۇيەك ايىندا اياقتايدى. تامىز ايىنىڭ اياعىنا دەيىن بانكتەر ءوز تاراپىنان تىزىمدەر بويىنشا جۇمىس ىستەيتىن بولادى. قىركۇيەك ايىندا بانككە بەرەشەگى بار ادامدار بەرەشەگى وتەلگەندىگى تۋرالى حابارلاما الاتىن بولادى», — دەيدى نۇر-سۇلتان قالاسىنىڭ ينۆەستيتسيالار جانە كاسىپكەرلىكتى دامىتۋ باسقارماسىنىڭ باسشىسى ەرلان بەكمۋرزاەۆ.

زارينا قاھارمان BAQ.KZ ءتىلشىسى