Tamyzdyń sońyna deıin nesıe aıyppuldary men ósimaqylar óteledi

QR Prezıdenti Qasym-Jomart Toqaev halyqtyń áleýmettik osal toptarynyń, jalǵyz asyraýshysynan aıyrylǵan múgedek balalary bar otbasylardyń, ataýly áleýmettik kómek alýshylardyń qaryzdyq júktemesin jeńildetý týraly tapsyrma bergen bolatyn. Osyǵan baılanysty Nur-Sultan qalasy ákimdiginde ekinshi deńgeıli bankterge jáne mıkroqarjy uıymdarynda kepilsiz tutynýshylyq nesıeler boıynsha qaryzdy tóleý mehanızmin túsindirý boıynsha brıfıng ótti.

«Birinshi baǵyt: 1 maýsymǵa deıin ekinshi deńgeıli bankterden 3 mıllıonnan aspaıtyn nesıe alǵan azamattar qaryzynyń 300 myń teńgesin óteý. Bul baǵyt boıynsha 447 957 adam anyqtalyp, oǵan 1 mlrd teńgeden astam qarjy bólingen. Ekinshi baǵyt halyqtyń barlyq áleýmettik deńgeıine arnalǵan, ıaǵnı qaryzdy ótemegen kezde ústinen jınalatyn aıyppuldar men ósimaqyny jabý. Bul baǵyt boıynsha 1 mıllıonnan astam adam anyqtalǵan. Olardyń qaryzyn óteý úshin 30 mıllıardtan astam teńge qarjy qarastyrylǵan», — deıdi QR Ulttyq banki Qarjy uıymdarynyń ádisnamasy jáne retteý departamentiniń dırektory Dáýren Sálimbaev.

QR Eńbek jáne halyqty áleýmettik qorǵaý mınıstrliginiń Ana men balany qoldaý basqarma basshysy Asqar Nııazovtyń aıtýynsha, ázirge qansha adamnyń qaryzy ótelgeni týraly naqty aqparat joq ekenin aıtty.

«Búgingi kúnge deıin qansha adamnyń qaryzy ótelgeni týraly naqty aqparat joq, biraq bizge 1 942 155 adamnyń tizimi berildi. Áleýmettik osal toptardyń ishine kiretin 3 mıllıon teńgege deıin qaryzy bar 447 957 azamattyń tizimi Ultyq bankke joldandy, ol jerde ekinshi deńgeıli bankterge joldanady. Ol jerde árbir azamattyń bereshegi, ıaǵnı tutynýshylyq qaryzdary naqtylanyp, tizim QR Eńbek jáne halyqty áleýmettik qorǵaý mınıstrligine qaıta joldanatyn bolady. Memleket basshysy Qasym-Jomart Toqaevtyń jarlyǵyna sáıkes, 105 mıllıardǵa jýyq teńge qarjy: onyń 88 mıllıard teńgesi Ulttyq qordan, 17 mıllıard teńge Ulttyq bank tarapynan qosymsha oblıgaııalar shyǵarý arqyly beriledi», — deıdi ol.

Atalǵan qaryzdardy jabý jumystary júrgizilip jatyr.

«QR Eńbek jáne halyqty áleýmettik qorǵaý mınıstrligi Ulttyq bankpen, sosyn qalalyq ákimdiktegi eńbek jáne halyqty áleýmettik qorǵaý basqarmasymen birlese otyryp osy jumystyń barlyǵyn qyrkúıek aıynda aıaqtaıdy. Tamyz aıynyń aıaǵyna deıin bankter óz tarapynan tizimder boıynsha jumys isteıtin bolady. Qyrkúıek aıynda bankke bereshegi bar adamdar bereshegi ótelgendigi týraly habarlama alatyn bolady», — deıdi Nur-Sultan qalasynyń Investıııalar jáne kásipkerlikti damytý basqarmasynyń basshysy Erlan Bekmýrzaev.

Zarına QAHARMAN BAQ.KZ tilshisi