جاڭالىقتار
الماتىنىڭ ءال-فارابي داڭعىلىنا 80 كم/ساع جىلدامدىق قايتا ەنگىزىلدى
الماتىنىڭ ءال-فارابي داڭعىلىندا ساعاتىنا 80 شاقىرىم جىلدامدىقپەن جۇرۋگە قايتا رۇقسات ەتىلدى. بۇل تۋرالى قالا اكىمدىگىنىڭ ءباسپاسوز قىزمەتى حابارلادى.
«رۇقسات ەتىلگەن جىلدامدىقتى ساعاتىنا 80 كم-گە دەيىن قايتارۋ ماسەلەسى كوپتەگەن قالالىقتاردى تولعاندىرادى. باقىتجان ساعىنتاەۆ الماتى قالاسىنىڭ اكىمى قىزمەتىن باستاعاننان بەرى وسى تاقىرىپتا 800-دەن استام ءوتىنىش كەلىپ ءتۇستى», — دەپ جازدى قوعاممەن بايلانىس قىزمەتىنىڭ جەتەكشىسى, الماتى قالاسى اكىمىنىڭ ءباسپاسوز حاتشىسى اسەت مۇقاجانوۆ Instagram-دا.
اكىمدىكتىڭ مالىمەتى بويىنشا, رۇقسات ەتىلگەن جىلدامدىقتى 60 كم/ساعاتقا دەيىن تومەندەتكەنىمەن, اپاتتى جاعداي قالادا جاقسارعان جوق. وكىنىشكە وراي, جول-كولىك وقيعالارىنىڭ سانى ارتۋ ۇستىندە. شىعىس اينالما جولى مەن ءال-فارابي داڭعىلىنا بۇرىنعى جىلدامدىق رەجىمىن قايتارۋدى الماتى قالاسىنىڭ قوعامدىق كەڭەسى دە ۇسىنعان بولاتىن.
«سوندىقتان, قوعام تاراپىنان تۇسكەن كوپ ءوتىنىشتى نازارعا الا وتىرىپ, الماتى اكىمدىگى شىعىس اينالما جولى مەن ءال-فارابي داڭعىلىنا رۇقسات ەتىلگەن 80 كم/ساعات جىلدامدىقتى قايتارۋ جونىندە شەشىم قابىلدايدى. بۇل بىرىڭعاي اينالما جولىنا ەنەتىن كوشەلەرگە قاتىستى وڭ شارا بولىپ تابىلادى», — دەدى اسەت مۇقاجانوۆ.
