قاراعاندىدا كوشى-قون قىزمەتى بارلىق ىقشام اۋداندا جۇمىس ىستەيدى

قاراعاندىداعى كوشى-قون قىزمەتى ورتالىعى قىركۇيەك ايىنان باستاپ قالانىڭ بارلىق ىقشام اۋداندارى ءۇشىن جۇمىس ىستەيتىن بولادى.

ال ازىرگە وڭتۇستىك شىعىس پەن ميحايلوۆ اۋداندارىن عانا قامتىپ وتىر. كەنشىلەر شاھارىنا بارعان پارلامەنت ءماجىلىسىنىڭ دەپۋتاتتارى وسى باعىتتا اتقارىلىپ جاتقان جۇمىستارمەن تانىستى. ايتا كەتۋ كەرەك, مۇندا كوشى-قون پوليتسياسى مەن ورتالىق ماماندارى تاراپىنان 27 قىزمەت ءتۇرى كورسەتىلەدى. ەڭبەك ميگراتسياسىن ۇزارتۋ, مەديتسينالىق انىقتاما بەرۋ, فوتوعا ءتۇسىرۋ جانە ساۋساق تاڭبالارىن الۋ, تۇرعىلىقتى مەكەن-جاي بويىنشا ۋاقىتشا تىركەۋ سىندى راسىمدەر ءبىر ورتالىقتان جاسالادى. مۇنىڭ بارلىعى تسيفرلىق جۇيەدە جۇزەگە اسىرىلىپ, ارنايى مالىمەتتەر بازاسىندا ساقتالادى. جىل باسىنان بەرى ورتالىق ماماندارى وزگە مەملەكەتتىڭ 7,5 مىڭ ازاماتىنا قىزمەت كورسەتكەن.
مانسۇرحان ماحامبەتوۆ, قر پارلامەنتى ءماجىلىسىنىڭ دەپۋتاتى: — ەڭبەك ميگرانتتارى بىزگە كەلەدى, ەڭبەكتەرىن جاسايدى. ولار العاشقى تىركەۋدەن وتكەنىمەن, كەيىنگى تىركەۋدەن وتپەي قالىپ جاتاتىن. ولار اكىمشىلىك جازاعا تارتىلىپ, ايىپپۇل سالىنادى. ونىڭ ءوزىن تولەمەي شەكارادان ءوتىپ كەتەتىن. ال قازىر تسيفرلىق جۇيەنىڭ ارقاسىندا ميگراتسيالىق ورتالىق قىزمەتكەرلەرى شەكاراداعى مالىمەتتەرمەن بىردەي بايلانىس جاساپ, مەرزىمىن وتكىزىپ الىپ جۇمىس ىستەپ جاتقانداردى انىقتاپ وتىرادى.

دەرەككوز: https://24.kz/kz/zha-aly-tar/o-am/item/335835-ara-andyda-k-shi-on-yzmeti-barly-y-sham-audanda-zh-mys-istejdi