سىرتتان كەلگەن قانداستاردىڭ جىل سوڭىنا دەيىن عانا مۇمكىندىگى بار – ساپارباەۆ

بۇگىن ۇكىمەتە وتكەن ءباسپاسوز جيىنىندا ۆيتسە-پرەمەر بەردىبەك ساپارباەۆ سىرتتان كەلگەن قانداستارىمىزدىڭ ماسەلەلەرىنە قاتىستى ساۋالعا جاۋاپ بەردى.

«سوڭعى كەزدەرى الەۋمەتتىك جەلىلەردە باسقا مەملەكەتتەردە تۇراتىن قانداستار تۋرالى ماسەلەلەر كوبەيىپ كەتتى. شىنىمەن دە, ەلباسى دۇرىس ايتتى. قانداستارىن تۋعان جەرىنە شاقىرىپ العان قازاقستان دۇنيەدەگى از عانا مەملەكەتتەردىڭ ءبىرى. سىزدەر جاقسى بىلەتىندەي, وتكەن ۋاقىتتىڭ ىشىندە 1 ميلليوننان استام قانداسىمىز قازاقستانعا كوشىپ كەلدى. ولاردىڭ بارلىعىنا كومەك جاسالادى. ال ەندى بىزگە كومەك جاسالمادى دەگەن تۇسىنىكسىز. ولاردى زەرتتەپ قاراۋ كەرەك», — دەيدى بەردىبەك ساپارباەۆ.

ونىڭ ايتۋىنشا, سىرتتان كەلگەن قانداستارىمىزدىڭ بارلىعى شىعىنى مەملەكەتتىڭ مويىنىندا. وسى ماقساتتار بويىنشا 25 جىلدىڭ ىشىندە 150 ملرد تەڭگەدەي قارجى جۇمسالعان ەكەن.

«پاۆلودار مەن شىعىس قازاقستاندا, شىمكەنت قالاسىندا اۋىلدار سالىندى. ودان باسقا, التى وڭىردە كەلەتىن ءبىزدىڭ وتانداستارىمىزدى قازاقستاننىڭ زاڭىنا, ومىرىنە, سالتىنا بەيىمدەۋ ءۇشىن وڭالتۋ ورتالىقتارى بوي كوتەردى. ودان كەيىن ءاربىر سىرت مەملەكەتتەن كەلەتىن وتانداستارىمىزدىڭ جول شىعىندارى, كۇنكورىسكە كەتەتىن شىعىندارى, جۇمىسقا ورنالاستىرۋ, بالالارىن مەكتەپكە, بالاباقشاعا ورنالاستىرۋ, مەديتسينالىق قىزمەتپەن قامتۋ – بارلىعى مەملەكەتتىڭ موينىندا. قازىرگى ەسەپ بويىنشا, وتكەن 25 جىلدىڭ ىشىندە 150 ملرد تەڭگەدەي قارجى جۇمسالىپتى. ول جۇمىس ەندى جالعاسىن تاۋىپ جاتىر. وسى وتكەن 7 ايدىڭ ىشىندە 6 مىڭنان استام قانداس كوشىپ كەلدى. بۇل جۇمىس جالعاسىن تابادى», — دەدى ۆيتسە-پرەمەر.

ۇكىمەت باسشىسىنىڭ ورىنباسارى قازاقستان ازاماتتىعىن الا الماي جۇرگەن قانداستارىمىز وسى جىلدىڭ سوڭىنا دەيىن مۇمكىندىكتى پايدالانۋ كەرەكتىگىن دە ايتتى.

«كەيبىر قانداستارىمىز دەر كەزىندە قۇجاتتارىن تاپسىرماعاندىقتان, قازاقستان ازاماتتىعىن الا الماي ءجۇر. ول قۇجاتتىڭ مەرزىمى ءبىر-اق جىل. ەلباسىنىڭ تاپسىرماسىنا سايكەس, مەرزىم وسى جىلدىڭ اياعىنا دەيىن سوزىلدى. سونى پايدالانىپ, ازاماتتىق الا الماي جۇرگەن قانداستارىمىز ازاماتتىعىن الۋى كەرەك», — دەيدى بەردىبەك ساپارباەۆ.

BAQ.KZ ءتىلشىسى بەك تولەۋوۆ