قر پرەزيدەنتى بۇگىن قازاقستان حالقىنا جولداۋىن جاريالايدى

مەملەكەت باسشىسى قاسىم-جومارت توقاەۆ بۇگىن قازاقستان حالقىنا جولداۋىن جاريالايدى, دەپ حابارلايدى قازاقپارات.

حالىققا جولداۋ جاريالايتىنى تۋرالى پرەزيدەنت وسىدان ءۇش اپتا بۇرىن حابارلاعان ەدى. ءتىپتى جولداۋدا كوتەرىلەتىن ماسەلەلەردىڭ شەت جاعاسىن مەملەكەت باسشىسى ايتىپ قالعان. «2 قىركۇيەككە جوسپارلانعان حالىققا جولداۋىمدا ەسىرتكى بيزنەسى, پەدوفيليا, جىنىستىق زورلىق-زومبىلىق جانە جەكە تۇلعاعا قارسى جاسالاتىن باسقا دا اۋىر قىلمىستارعا قاتىستى جازالاۋ شارالارىن قاتاڭداتۋ جونىندە پارلامەنتكە جانە ۇكىمەتكە تاپسىرمالار جۇكتەلەدى», — دەگەن ەدى پرەزيدەنت Twitter پاراقشاسىندا.  قاسىم-جومارت توقاەۆتىڭ العاشقى جولداۋىندا تاعى قانداي ماسەلەلەر كوتەرىلۋى مۇمكىن? قر پرەزيدەنتى جانىنداعى «ورتالىق كوممۋنيكاتسيالار قىزمەتى» رەسپۋبليكالىق مەملەكەتتىك مەكەمەسىنىڭ ديرەكتورى تالعات قاليەۆ وسىعان قاتىستى بولجام جاساپ كورگەن بولاتىن. «قازىردىڭ وزىندە مەملەكەت باسشىسىنىڭ ەرەكشە قۇپيا جاساماي, بارلىق زورلىقشىلارعا جازانى قاتاڭداتۋعا نيەتتى ەكەندىگىمەن ءبولىسۋى فاكتىسىنىڭ ءوزى قىزىقتىرا تۇسەدى. بۇل جاڭالىقتى قۇپيا ۇستاي تۇرىپ, زالدا بارىنشا قوشەمەتكە يە بولۋعا دا بولار ەدى. دەگەنمەن, پرەزيدەنتكە پويىزداعى زورلاۋ سوراقى فاكتىسىنە بايلانىستى  وقيعاعا بەي-جاي قاراماعان وتانداستارىمەن پىكىرلەس ەكەندىگىن ءبىلدىرۋ ماڭىزدى بولعان سياقتى. وسىناۋ قىسقا عانا تۆيت ءىس جۇزىندە زورلىققا ءبىراۋىزدان جەك كورۋشىلىكتى قالىپتاستىرۋدا ايرىقشا ءرول وينادى. قالعانى ازىرشە قۇپيا قالىپ وتىر», — دەپ جازادى ت.قاليەۆ Telegram-دا. ونىڭ پىكىرىنشە, پرەزيدەنتتىڭ الداعى جولداۋىندا الەۋمەتتىك قولداۋ شارالارىنا قاتىستى ماسەلەلەر كوتەرىلەدى. «بيۋدجەت قىزمەتكەرلەرىنىڭ جالاقىسىن كوتەرۋ. تامىز كەڭەسىندە  ءتورت جىلدىڭ ىشىندە مۇعالىمدەردىڭ جالاقىسىن 4 ەسە كوتەرۋ تاپسىرماسى بەرىلدى. بۇل تارماق جولداۋدادا قوزعالىپ, بارىنشا تارقاتىلۋى مۇمكىن.  تاياۋدا وتكەن يندۋستريالاندىرۋ جونىندەگى كەڭەستە مەملەكەت باسشىسى تۇبەگەيلى ماسەلەلەردى كوتەرىپ, قازاقستاندىق ەكسپورت ۇلەسىن ارتتىرۋ تۋرالى تاپسىرما بەردى. بۇل ماسەلە دە جولداۋدا بارىنشا كەڭىنەن قوزعالاتىن شىعار. ۇكىمەتتىڭ تاياۋداعى كەڭەيتىلگەن وتىرىسىندا قاسىم-جومارت توقاەۆ كاسىپكەرلىك قىزمەتكە ارالاسۋ تاقىرىبىن كوتەرىپ, بيزنەستىڭ دامۋىنا كەدەرگى كەلتىرەتىندەردىڭ ءبارىن جۇمىستان بوساتاتىندىعىنا ۋادە بەردى. كاسىپكەرلىكتى قورعاۋ شارالارى  زاڭنامامەن كەپىلدەندىرۋگە تاپسىرما بەرەدى دەپ بولجاۋعا بولادى», — دەدى ول.