الەم جاڭالىقتارى
قاتە قويىلعان دياگنوز سالدارىنان 3 جاسار قىز كوز جۇمدى
ۇلىبريتانيانىڭ رەيلي قالاسىنداعى ەسسەكس گرافستۆوسىندا دارىگەرلەر 3 جاسار بالاعا قاتە دياگنوز قويىپ, ونىڭ ولىمىنە سەبەپشى بولدى, دەپ جازدى Daily Mirror باسىلىمى.
اويفا فلاناگان-دجيبب (Aoife Flanagan-Gibb) ماۋسىم ايىنان بەرى ءىشىنىڭ اۋىراتىنىنا شاعىمدانىپ كەلگەن. ونىڭ اناسى ەيليش فلاناگان (Eilish Flanagan) 3 اپتا بويى قىزىن دارىگەرگە 11 رەت اپارعان. الايدا دارىگەرلەر بولسا, 3 اپتا بويى قىزدىڭ ءىشى قاتىپ جۇرگەنىن ايتىپ, ۇيىنە قايتارىپ جىبەرىپ وتىرعان.
«مەن قىزىمنىڭ جاعدايى جاقسى ەمەس ەكەنىن سەزدىم. سەبەبى, ول دەنەسىنىڭ ءار جەرى اۋىرسىناتىنىن ايتىپ جىلايتىن. قىزىمنىڭ شاعىمدارىن ايتسام دا, دارىگەرلەر بالامدى بىردە-ءبىر رەت قاراپ تەكسەرمەدى», — دەپ ءتۇسىندىردى قىزدىڭ اناسى.
قىزدىڭ جاعدايى ناشارلاي تۇسەدى. دارىگەرلەر ناۋقاس قىزدى قاراپ تەكسەرۋ بارىسىندا گەرمينوگەندى ىسىكتى انىقتايدى.
«ونىڭ باۋىرىندا ۇلكەن ىسىك بولدى. ول ۇلكەيگەن سايىن ىشەكتى ىعىستىرىپ, ونىڭ دۇرىس جۇمىس ىستەۋىنە كەدەرگى كەلتىرگەن. ءبىز قىزىمىزدىڭ جاعدايى ناشار ەكەنىن تۇسىندىك», — دەدى فلاناگان.
دارىگەرلەر ەشقانداي ەم قىزدىڭ ءومىرىن ساقتاپ قالمايتىنىن, اۋرۋدىڭ اسقىنىپ كەتكەنىن ەسكەرتتى.
«ءبارى كەش بولدى. ولار بىزگە اۋرۋمەن كۇرەسۋگە مۇمكىندىك بەرمەدى», — دەدى ەيليش فلاناگان.
7 شىلدەدە اويفا اۋرۋحانادا اناسىنىڭ قۇشاعىندا جاتقان كۇيى كوز جۇمدى. قىزدىڭ جۇرەگى توقتاپ قالدى.
قايعى جۇتقان انا ۇلىبريتانيادا العاش رەت گەرمينوگەندى ىسىككە قارسى كۇرەستى ناسيحاتتايتىن قايىرىمدىلىق ۇيىم قۇرۋدى جوسپارلاپ وتىر. ونىڭ ماقساتى – ادامدارعا اۋرۋدىڭ بەلگىلەرىن, ونىڭ ەرتە دياگنوستيكاسىن, سيرەك كەزدەسەتىن قاۋىپتى اۋرۋدىڭ قانداي سالدارلارى بولاتىنىن ايتىپ جەتكىزۋ .
دەرەككوز: BAQ.KZ
