قازاقستاندا ەمحاناعا تىركەۋ باستالدى

قازاقستاندا حالىقتى ەمحاناعا تىركەۋ ناۋقانى باستالدى. بيىل تىركەۋ «eGov» ەلەكتروندىق ۇكىمەت ۆەب-پورتالى ارقىلى جۇرگىزىلەدى. ول ءۇشىن ەلەكتروندىق تسيفرلىق قولتاڭبا قاجەت. بۇل تۋرالى بۇگىن الماتى اكىمدىگىندە وتكەن ءباسپاسوز ءماسليحاتىندا «الەۋمەتتىك مەديتسينالىق ساقتاندىرۋ قورى» كوممەرتسيالىق ەمەس اكتسيونەرلىك قوعامى الماتى قالالىق فيليالىنىڭ ديرەكتورى تىلەۋحان ابىلداەۆ ايتتى, دەپ حابارلايدى قازاقپارات ءتىلشىسى.

تىلەۋحان ابىلداەۆتىڭ ايتۋىنشا, تىركەۋدىڭ اۆتوماتتاندىرىلۋى ازاماتتاردى ەمحاناعا «سىرتتاي» تىركەۋ فاكتىلەرىنىڭ الدىن الۋعا كومەكتەسەدى. سونىمەن قاتار, ەركىن تاڭداۋ ءپرينتسيپى قايتا قارالدى.

«بۇرىنعى ءتارتىپ بويىنشا ەمحانانى تاڭداۋدا تەرريتوريالىق شەكتەۋ قويىلمايتىن. بۇل ناۋقاستارعا ۇيدە كومەك كورسەتۋ جاعىنان كوپتەگەن قيىندىقتار تۋدىردى. تۇرعىلىقتى جەرىندەگى ەمحاناعا ەمەس, باسقا جەردەگى كلينيكاعا تىركەلگەن ادامدارعا اسىرەسە, جۇكتى ايەلدەر مەن جاڭا تۋعان بالالارعا ۇيگە بارىپ قىزمەت كورسەتۋ دارىگەرلەردىڭ جۇمىسىن قيىنداتىپ جىبەردى. وسىعان بايلانىستى, نورماتيۆتىك بازاعا وزگەرىستەر ەنگىزىلدى», — دەپ ءتۇسىندىردى فيليال باسشىسى.

تىركەۋ بارىسىندا وتباسىلىق پرينتسيپكە باسىمدىق بەرىلمەك. سوندىقتان, اتا-اناسى مەن بالالارى ءبىر ەمحانادا تىركەلگەنى ابزال. ال 18 جاسقا تولماعان بالالاردى زاڭدى وكىلى تىركەي الادى.

«ەمحانا ءوزى قىزمەت كورسەتەتىن ايماقتان تىس جەردە تۇراتىن ازاماتتاردى, سونداي-اق باستاپقى مەديتسينالىق-سانيتارلىق كومەك كورسەتەتىن مەكەمە جۇكتەمەسى شەكتەن اسىپ كەتكەن جاعدايدا تىركەۋدەن باس تارتۋى مۇمكىن. قولدانىستاعى نورماتيۆتەرگە سايكەس, ۋچاسكەدەگى جالپى پراكتيكا دارىگەرى قارايتىن پاتسيەنتتەر سانى 1700-دەن اسپاۋى ءتيىس. قازىر ەلىمىزدە ۋچاسكەلەردى شاعىنداپ, قايتا ۇيىمداستىرۋ جۇمىستارى قارقىندى ءجۇرىپ جاتىر. بۇل دارىگەرگە تۇسەتىن جۇكتەمەنى ازايتىپ, قىزمەت ساپاسىن ارتتىرادى. سەبەبى, دارىگەر الدىنا كەلگەن ادامعا كوبىرەك ۋاقىت ءبولىپ, مۇقيات تەكسەرۋى ءتيىس. بۇل ماسەلەنىڭ اسىرەسە, مەديتسينالىق ساقتاندىرۋ جۇيەسىن ەنگىزۋ قارساڭىندا وزەكتىلىگى ارتىپ وتىرعانى ءسوزسىز», — دەيدى تىلەۋحان ابىلداەۆ.

قازىرگى تاڭدا الماتىدا جوسپارلانعان مەديتسينالىق 88 ۋچاسكەنىڭ ورنىنا 131 اشىلدى.
«ۋچاسكەلەردىڭ جالپى سانى 895-كە جەتتى. ناتيجەسىندە ءبىر دارىگەردىڭ جۇكتەمەسى 1529 ادامعا دەيىن قىسقاردى», — دەدى الماتى قالاسى قوعامدىق دەنساۋلىق باسقارماسى باستىعىنىڭ ورىنباسارى اسەل بيسەنباەۆا.
ازاماتتار ەمحانانى تىركەۋ ناۋقانىنان باسقا ۋاقىتتا دا اۋىستىرا الادى. ياعني, باسقا جەرگە قونىس اۋدارعان جاعدايدا جىلىنا ءبىر رەت, ەمدەۋ مەكەمەسى قايتا قۇرىلسا نەمەسە قورمەن كەلىسىمشارتتى بۇزعان جاعدايدا باسقا ەمدەۋ مەكەمەسىنە تىركەلۋگە بولادى. سونىمەن قاتار, ەلىمىزدە تۇراتىن ءار تۇرعىن جىلىنا ءبىر رەت ءوزى تۇراتىن اۋماقتىق بىرلىك شەڭبەرىندە ەمحانا اۋىستىرا الادى.

دەرەككوز: https://www.inform.kz/kz/kazakstanda-emhanaga-tirkeu-naukany-bastaldy_a3565979