الماتىدا قىلمىس 20,6% ازايدى

الماتىدا سوڭعى ءۇش جىلدا قىلمىستىق احۋال تۇراقتى كۇيىندە قالىپ وتىر. جالپى قىلمىس دەڭگەيى 20,6% تومەندەدى, دەپ حابارلايدى قازاقپارات ءتىلشىسى.

الماتى قالالىق پوليتسيا دەپارتامەنتىنىڭ باسشىسى سەرىك كۇدەباەۆتىڭ ايتۋىنشا, اۋىر جانە اسا اۋىر قىلمىستار – 34,9%, ۇرلىق – 23%, قاراقشىلىق شابۋىل – 18,9%, بۇزاقىلىق – 64%, بوتەننىڭ مۇلكىن ۇرلاۋ – 11,5%, زورلاۋ – 25,3% جانە بوپسالاۋ 2 ەسەگە ازايدى. سونداي-اق ەسىرتكى قىلمىستارى 2,1 ەسەگە تومەندەگەن.

«نەگىزگى باعىتتار بويىنشا قىلمىستاردىڭ بەتىن شۇعىل اشۋ جاقساردى, اتاپ ايتار بولساق, اۋىر قىلمىستار – 11,6%, پاتەر ۇرلىعى – 11,9%, باسقالاردىڭ مۇلكىن يەمدەنۋ – 35,6%, قاساقانا اۋىر دەنە جاراقاتىن كەلتىرۋ – 4,4%, بۇزاقىلىق – 20,6%, اۆتوكولىكتەردى ۇرلاۋ – 3,3%. قالادا قابىلدانعان كەشەندى ۇيىمداستىرۋشىلىق جانە پراكتيكالىق شارالار قىلمىستىق جاعدايدى تۇراقتاندىرۋعا مۇمكىندىك بەردى.

الماتى قالاسى اكىمىنىڭ تاپسىرماسىنا سايكەس, دەپارتامەنت قىزمەتتەرى 2 اۋىسىمدىق رەجىمدە پاترۋلدەۋ جۇمىسىن ۇيىمداستىردى. كوشەدە جانە قوعامدىق جەرلەردە جاسالعان قىلمىستاردى تالداۋ ناتيجەلەرى بويىنشا, قالادا ىشكى اۋماقتاردى قامتي وتىرىپ, 67 كريمينوگەندىك پاترۋلدەۋ ۋچاسكەلەرى جاسالدى. ءاربىر پاترۋلدىك مارشرۋت ءۇشىن سيپاتتاما, جوسپار-تاپسىرما, مارشرۋت دياگرامماسى جانە كريمينوگەندىك ورىندار بەلگىلەندى. كۇن سايىن جاياۋ پاترۋلدىك جاساقتاردىڭ جۇمىسىن باقىلاۋ جۇمىستارى ۇيىمداستىرىلدى. اي سايىن ءبىز قالاداعى قىلمىستىق جاعدايدى تالداۋعا سۇيەنە وتىرىپ, جاياۋ جانە كولىك پاترۋلدىك بۇيرىقتارىنا ۋاقىت پەن ورىنعا قاتىستى تالداۋ جۇرگىزەمىز», — دەدى سەرىك كۇدەباەۆ.

سونىمەن قاتار, قوعامدىق ورىندارعا ۋچاسكەلىك پوليتسيا بەكەتتەرى ورناتىلدى. «جالپى, 32 ۋچاسكەلىك پوليتسيا بەكەتىن ورناتۋ جوسپارلانعان, ءار اۋداندا – تورتتەن. بۇل بەكەتتەر زامان تالابىنا ساي جابدىقتالعان. ولاردى حالىق تىعىز ورنالاسقان جانە كريمينوگەندىك اۋماقتى ەسكەرە وتىرىپ ورناتامىز. بۇل پۋنكتتەر وتە ءموبيلدى, قاجەت بولعان جاعدايدا ولاردى قالانىڭ باسقا جەرلەرىنە, قىلمىستار مەن قۇقىقبۇزۋشىلىقتار ءجيى ورىن الاتىن جەرلەرگە وڭاي اۋىستىرۋعا بولادى. وسى ماقساتتا جەدەل جاعدايعا تۇراقتى تالداۋ جاسالادى. پوليتسيا بەكەتتەرى تاۋلىك بويى جۇمىس ىستەيدى: كۇندىز ۋچاسكەلىك ينسپەكتورلار تارتىلادى, ال تۇندە ستاتسيونارلىق پۋنكتتە پاترۋلدىك قىزمەتكەرلەر قىزمەت ەتەدى», — دەپ قورىتىندىلادى سەرىك كۇدەباەۆ.

https://www.inform.kz/kz/almatyda-kylmys-20-6-azaydy_a3566267