Almatylyqtar qalany kórkeıtýge baǵyttalǵan joba boıynsha 180 usynys bildirgen

«Bıýdjetke qatysý» jobasy aıasynda Almaty aýdandarynyń aýmaqtaryn jaqsartý boıynsha jalpy somasy 9,2 mlrd teńge bolatyn 180 ótinim qabyldandy. Bul týraly “Almaty qalasyn damytý ortalyǵy” AQ basqarmasynyń tóraǵasy Oleg Sek qalalyq ákimdik baspasóz ortalyǵynda ótken brıfıngte aıtty.

Onyń aıtýynsha, ótinimderdi qabyldaý 19 tamyzda bastalǵan jáne 30 qyrkúıekke deıin jalǵasady.

“2019-2020 jyldarǵa arnalǵan «Almaty qalasynyń bıýdjetine qatysý» pılottyq jobasyn uıymdastyrý tártibinde Almaty qalasy Qoǵamdyq keńesiniń ótinimderdi (jobalyq usynystardy) qabyldaý merzimin 15 qyrkúıekten 30 qyrkúıekke deıin uzartý, «áleýmettik mańyzy bar» jobalar sanatyn qosý jáne qaǵaz túrinde daýys berýdi ótkizý múmkindigi turǵysynda usynystary eskerildi”, — dedi ol.

Sóz arasynda ol jobalyq usynystar berýden qaladaǵy Almaly aýdany belsendilik tanytyp otyrǵanyn aıtty.

“Búginde berilgen jobalyq usynystar sany boıynsha myna aýdandar kósh bastap tur: Almaly — 56, Medeý — 37 jáne Bostandyq aýdanynda — 34 usynys jasaldy. Eń kóp 47 ótinishti almatylyqtar «Aýla aýmaqtarynda jáne jalpy paıdalaný oryndarynda sport, balalar oıyn alańdaryn ornatý jáne jóndeý» sanatyna bergen”, — deıdi Oleg Sek.

Qalalyqtardyń usynystary ishinde: Kókjıek shaǵynaýdany mańynda skver uıymdastyrý, ál-Farabı dańǵylynda shýyljutqysh qorshaýlar ornatý, qala kóshelerinde qoqystardy bólek jınaý úshin jáshikter ornatý, Togyzkumalak kóne ulttyq zııatkerlik oıynyn oınaý, úıretý jáne tanymal etý úshin alań qurý, metropolıtende jáne saýda ortalyqtarynda alıýmınıı jáne plastık ydystar qabyldaý boıynsha fandomattar ornatý, transponderlerdi paıdalana otyryp, nashar kóretinderge arnalǵan dybystyq qulaqtandyrý júıesin engizý jáne taǵy basqalary bar.

Joba jetekshileri budget.open-almaty.kz saıtyn jasaǵan. Ol jerde kez kelgen qala turǵyny óz ıdeıasy men jobasyn usynys retinde jazyp qaldyra alady.

“1-18 qazan aralyǵynda qala turǵyndary bergen jobalyq usynystardy barlyq aýdandyq ákimdikterde qurylǵan saraptaý komıssııalary qaraıdy. Daýys berý 19-29 qazan aralyǵynda ótedi. Iske asyrýǵa ruqsat berý úshin joba Almaty turǵyndarynyń 10-nan astam daýysyn jınaýy tıis. Qalanyń bir turǵyny úsh jobalyq usynysqa daýys berýge quqyly”, — deıdi ol.

Ádilet MUSAHAEV
BAQ.KZ