ء«بىزدى وسىلاي ۋلاپ جاتىر»: قازاقستاننىڭ تۇزى رەسەيلىكتەردى شوشىتتى

قازاقستاندىق تۇز ءوندىرۋشى كومپانيا داۋ استىندا قالدى. تۇزدىڭ رەسەيلىك ساتىپ الۋشىلارى ونىڭ ىشىنەن اينەك تاۋىپ العانىن ايتىپ, ۆيدەو ءتۇسىرىپ, جەلىنى دۇرلىكتىردى. بۇل تۋرالى Stan.kz اقپارات اگەنتتىگى كتك ارناسىنا سىلتەمە جاساپ حابارلايدى.

رەسەي ازاماتتارى الەۋمەتتىك جەلىگە تۇز اراسىنان اينەك تاۋىپ العانىن جازىپ, قازاقستاندىق ءونىمدى ساتىپ الماۋعا شاقىردى.

«ەرىمەيدى. اپپاق نارسەننىڭ نە ەكەنىن بىلمەيمىن, تۇسىنىكسىز», — دەيدى ءبىر ۆيدەو اۆتورى. «اينەك قانا قالدى. ماسساعان. ءبىزدى وسىلاي ۋلاپ جاتىر», — دەدى تاعى دا ءبىر رەسەيلىك.

دۇكەن سورەلەرى ءبىزدىڭ ەلىمىزدە جاسالعان تۇزدى الىپ تاستادى. كورشى ەلدە جەرگىلىكتى حالىقتىڭ اراسىندا پايدا بولعان داۋ تۇز شىعارۋشى كومپانيانىڭ نازارىنان تىس قالمادى.

«بىردە ءبىر بولشەك, اسىرەسە اينەك اراسىنا كىرىپ كەتە المايدى. ەرىمەيتىن قالدىعى بار, باسقا ارتىق ەشنارسە جوق. نەگىزىندە بۇل تابيعي مينەرالدار, ولار ارقاشان بولدى. قارا مينەرالدار — استراحانيتتەر, اقشىل مينەرالدار — ەپسوميتتەر», — دەدى «ارالتۇز» اق بيزنەس-پروتسەسستەردى باسقارۋ جانە اكىمشىلىك باسقارماسىنىڭ جەتەكشىسى تاتيانا كوزىرەۆا.

كومپانيا باسشىلىعى قازاقستاندا شىعاتىن تۇزدىڭ رەسەيدەگى تۇزدان ەش ەرەكشەلەنبەيتىنىن, اينەك تۋرالى بوس ءسوزدى باسەكەلەستەرى ادەي شىعارعانىن العا تارتتى.

«بۇل تاستار ەمەس, استراحانيت دەپ اتالاتىن تابيعي مينەرال. ەشقانداي كەسىرى جوق. كەرىسىنشە, پايدالى دەۋگە بولادى», — دەدى كوزىرەۆا.

رەسەيدە تۇزدىڭ قۇرامىن تەكسەرۋ جۇمىستارى باستالىپ كەتتى. قازاقستاندىق كومپانيا ونىڭ ساپاسى جاقسى ەكەنىن دالەلدەمەك.