جاڭالىقتار
بالا كۇتىمىنە بايلانىستى قانداي جاردەماقىلار بەرىلەدى
جاردەماقى الەۋمەتتىك تولەمدەردەن قارجىلاندىرۋ كوزدەرىنە بايلانىستى ەرەكشەلەنەدى. ءبىرىنشىسى – بيۋدجەتتەن, ەكىنشىسى مەملەكەتتىك الەۋمەتتىك ساقتاندىرۋ قورىنان تولەنەدى.
2019 جىلى ايلىق ەسەپتىك كورسەتكىش (2525 تەڭگە) پەن جاردەماقىلار مەن الەۋمەتتىك تولەمدەردى ەسەپتەۋگە قولدانىلاتىن ەڭ تومەنگى كۇنكورىس دەڭگەيىنىڭ (29 698 تەڭگە) كولەمى ءوستى.
بالانىڭ تۋىنا بايلانىستى بەرىلەتىن ءبىر رەتتىك تولەم
جاردەماقى بالا تۋعانى ءۇشىن ءبىر رەت بەرىلەدى. ءبىرىنشى, ەكىنشى جانە ءۇشىنشى بالاعا – 95 950 تەڭگە, ءتورتىنشى جانە ودان كوپ بالاعا –159 075 تەڭگە. ەگىز, ۇشەم, تورتەم تۋىلعان جاعدايدا تولەم ءار بالاعا تولەنەدى.
ءبىر جاسقا تولعانعا دەيىن بالا كۇتىمىنە بايلانىستى تولەنەتىن جاردەماقى
جاردەماقى بالا ءبىر جاسقا تولعانشا اي سايىن تولەنەدى. ول رەسپۋبليكالىق بيۋدجەتتەن جانە مەملەكەتتىك الەۋمەتتىك ساقتاندىرۋ قورىنان تولەنەدى.
جۇكتىلىك دەمالىسىنا شىققانعا دەيىن جۇمىس ىستەمەگەن ايەلدەردىڭ بارىنە جاردەماقى بيۋدجەتتەن تولەنەدى.
ونىڭ كولەمى وتباسىنداعى بالا سانىنا بايلانىستى:
ءبىرىنشى بالاعا –14 500 تەڭگە;
ەكىنشى بالاعا – 17 196 تەڭگە;
ءۇشىنشى بالاعا – 19 823 تەڭگە;
ءتورتىنشى بالاعا – 20 500 تەڭگە.
جۇمىس بەرۋشىسى مەملەكەتتىك الەۋمەتتىك ساقتاندىرۋ قورىنا اقشا اۋدارعان جۇمىس ىستەيتىن انالار ەكى ءتۇرلى تولەم الۋعا قۇقىلى. ءبىر جاسقا تولعانعا دەيىن بالا كۇتىمى بويىنشا بەرىلەتىن جاردەماقى سوڭعى ەكى جىلدا تاپقان ورتاشا ايلىق تابىسىنىڭ 40%-ى كولەمىندە بەرىلەدى. جۇكتىلىك جانە بالا تۋىنا بايلانىستى سوڭعى 12 ايداعى ورتاشا ايلىق تابىسىنا بايلانىستى تولەمدەر تاعايىندالادى.
بيىل كوپ بالالى انالارعا بەرىلەتىن جاردەماقى
كوپ بالالى انالارعا ارنايى مەملەكەتتىك جاردەماقى (ايەل زەينەتكە شىققاننان كەيىن دە) ءومىر بويىنا تولەنەدى. بيىل ونىڭ كولەمى 16160 تەڭگەنى قۇرادى. ونى «التىن القا» جانە «كۇمىس القا» العان كوپ بالالى انالار, «باتىر انا» اتاعىن العاندار, ءى جانە ءىى دەڭگەيلى وردەندەرمەن ماراپاتتالعاندار مەن ءى, ءىى دارەجەلى «انا داڭقى» وردەنىمەن ماراپاتتالعاندار الادى.
بالاسىن 8 جاسقا دەيىن تاربيەلەگەن كوپ بالالى انالار 53 جاسىندا زەينەتكە شىعا الادى. الايدا, ولاردىڭ جۇمىس ىستەۋ جانە كاسىپكەرلىك قىزمەتپەن اينالىسۋ قۇقى ساقتالادى.
مۇمكىندىگى شەكتەۋلى بالا تاربيەلەپ وتىرعان وتباسىلارعا تولەنەتىن جاردەماقى
16 جاسقا تولماعان مۇمكىندىگى شەكتەۋلى بالانى تاربيەلەۋشى وتباسىلار اي سايىن 41 578 تەڭگە جاردەماقى الادى. 16 جاسقا جانە كامەلەت جاسقا تولعاننان كەيىن تولەم كولەمى مۇگەدەكتىك توبىنا بايلانىستى وزگەرەدى:
I توپ – 57 021 تەڭگە;
II توپ – 47 220 تەڭگە;
III توپ – 35 638 تەڭگە.
مۇمكىندىگى شەكتەۋلى بالا تاربيەلەپ وتىرعان قازاقستاندىقتار اسىراۋىنداعى بالا 18 جاسقا تولعانشا جاردەماقى الادى. 2019 جىلى ونىڭ كولەمى – 31 183 تەڭگە.
2018 جىلدىڭ شىلدە ايىنان باستاپ بالا كەزىنەن ءى توپتاعى مۇگەدەكتىگى بار 18 جاستان اسقان ادامداردى اسىراۋشىلارعا جاڭا جاردەماقى تاعايىندالدى. 2019 جىلى ونىڭ كولەمى 31 183 تەڭگەنى قۇرايدى.
مۇگەدەكتىككە بايلانىستى تولەنەتىن جاردەماقىلار
2019 جىلى مۇگەدەكتىككە بايلانىستى بەرىلەتىن جاردەماقى مولشەرى ءوستى.
I توپتاعى مۇگەدەكتەرگە – 57 021 تەڭگە;
II توپتاعى مۇگەدەكتەرگە – 45 438 تەڭگە;
III توپتاعى مۇگەدەكتەرگە – 30 886 تەڭگە.
بالا كەزىنەن مۇگەدەكتەرگە:
I توپتاعىلارعا – 57 021 تەڭگە;
II توپتاعىلارعا – 47 220 تەڭگە;
III توپتاعىلارعا – 35 638 تەڭگە.
چەرنوبىل اپاتىنان زارداپ شەككەن مۇگەدەكتەرگە تولەنەتىن جاردەماقىلار:
I توپتاعىلارعا – 83 452 تەڭگە;
II توپتاعىلارعا – 71 276 تەڭگە;
III توپتاعىلارعا – 59 693 تەڭگە.
اسىراۋشىسىنان ايىرىلعاندارعا بەرىلەتىن جاردەماقى اسىراۋشىسىنان ايىرىلعان وتباسىلار
2019 جىلى:
ءبىر بالاعا – 25 541 تەڭگە;
ەكى بالاعا – 44 250 تەڭگە;
ءۇش بالاعا – 54 941 تەڭگە;
ءتورت بالاعا – 58 208 تەڭگە;
بەس بالاعا – 60 286 تەڭگە;
التى جانە ودان دا كوپ بالاعا – 62 663 تەڭگە الادى.
ەگەر اسىراۋشىسى جۇمىس ىستەگەن بولسا, مەملەكەتتىك الەۋمەتتىك ساقتاندىرۋ قورىنان دا اقشا تولەنەدى.
اتاۋلى الەۋمەتتىك كومەك جانە مەملەكەتپەن كەلىسىمشارت
2018 جىلى از قامتىلعان وتباسىلارعا جاڭا فورماتتا اتاۋلى الەۋمەتتىك كومەك تاعايىندالدى. ونىڭ كولەمى بالالاردى قوسقاندا وتباسىنىڭ ءار مۇشەسىنە ەڭ تومەنگى كۇنكورىس دەڭگەيىنىڭ 50%-ىن قۇرايدى (14 850 تەڭگە). جاڭا ەرەجەگە سايكەس, قازاقستاندىقتار جارتى جىلعا تولەنەتىن سومانى بىردەن الا الادى.
مەملەكەت اقشا تولەپ قانا قويماي, وتباسىنىڭ ەڭبەككە قابىلەتتى مۇشەسىمەن جارتى جىلعا الەۋمەتتىك كەلىسىمشارتقا وتىرادى. ونى وقىتۋ كۋرستارىنا جىبەرەدى, كەيىن جۇمىسقا ورنالاستىرادى. ءتىپتى شاعىن نەسيە دە بەرۋى مۇمكىن. كەلىسىمشارت تاراپتارى وقىتۋ جانە جۇمىسقا ورنالاستىرۋ ۇسىنىستارىنان باس تارتپاۋى كەرەك. باس تارتقان جاعدايدا ايىپپۇلدار سالىنادى, اتاۋلى الەۋمەتتىك كولەمى 50%-عا قىسقارتىلادى (وتباسىنىڭ قالعان مۇشەلەرى جاردەماقىنى بۇرىنعىشا الا بەرەدى). ەكىنشى رەت باس تارتسا, ول ادام جاردەماقى الۋشىلار قاتارىنان شىعارىلادى. ەگەر وتباسىندا ەڭبەككە قابىلەتتى بىردە-ءبىر ادام بولماسا (ماسەلەن, بىرنەشە بالاسى بار جالعىزباستى انا), كومەك ءسوزسىز تاعايىندالادى. ەشقانداي الەۋمەتتىك كەلىسىمشارت جاساسۋدىڭ قاجەتى جوق.
دايىنداعان: دينارا دوسپان 24.kz
