قوردايدا قىز الىپ قاشقان كورشى وبلىستىڭ جىگىتتەرى 7 جىلعا سوتتالدى

جامبىل وبلىسىنىڭ پروكۋراتۋراسى قىز ۇرلىعى ءۇشىن 15 جىلعا دەيىن جازا كۇتىپ تۇرعانىن ەسكە سالادى, دەپ حابارلايدى قازاقپارات ۆەدومستۆونىڭ ءباسپاسوز قىزمەتىنە سىلتەمە جاساپ.

ايتا كەتەيىك, تاياۋدا قورداي اۋداندىق سوتىنىڭ ۇكىمىمەن تۇركىستان وبلىسىنىڭ ءتورت تۇرعىنى قىز ۇرلاعانى ءۇشىن 7 جىلعا سوتتالعان بولاتىن.

ال اۆتوكولىك قىلمىس قۇرالى رەتىندە تاركىلەنىپ, مەملەكەت كىرىسىنە الىندى.

وقيعا 2018 جىلدىڭ كۇزىندە جىگىتتىڭ جامبىل وبلىسى قورداي اۋدانىندا تۇراتىن قىزبەن تانىسۋىنان باستالعان.

الەۋمەتتىك جەلىدەگى تانىستىقتان كەيىن جىگىت قىزدى الىپ قاشۋدى ويلاستىرا باستايدى. «ۇزاق ويلانباستان ول ۇيلەنۋ ماقساتىندا ءوزىنىڭ ءۇش تانىسىمەن كەلىسىپ, قورداي اۋدانىنا اۆتوكولىكپەن كەلەدى. كەلگەن سوڭ ۇيالى تەلەفونعا قوڭىراۋ شالىپ, قىزعا كەزدەسۋدى ۇسىنادى, بىراق ول باس تارتقان. جاستار قىزدىڭ ءۇي جاعىندا كۇتىپ, ونى كوشەدە قارسى الادى. قىزدىڭ قارسىلىق كورسەتىپ, باس تارتۋىنا قاراماستان, ولار ونى كولىككە كۇشتەپ سالىپ, تۇركىستان وبلىسىنا جول تارتادى. الايدا پوليتسيا قىزمەتكەرلەرى ولاردى تاراز قالاسىنىڭ شىعا بەرىسىندە ۇستادى» – دەلىنگەن حابارلامادا.

وسىعان بايلانىستى وبلىس پروكۋراتۋراسى قىز الىپ قاشۋ سياقتى ويلانباي ىستەگەن ءىس-ارەكەت ءۇشىن 15 جىلعا دەيىن باس بوستاندىعىنان ايىرۋ جازاسى كۇتىپ تۇرعانىن ەسكە سالادى.

بۇل رەتتە ۇرلانعان ادامدى ءوز ەركىمەن بوساتقان ادامنىڭ ارەكەتىندە وزگە قىلمىس قۇرامى بولماسا, قىلمىستىق جاۋاپكەرشىلىكتەن بوساتىلادى.