ق.توقاەۆتىڭ بۇۇ باس اسسامبلەياسىنىڭ 74-سەسسياسىندا سويلەگەن ءسوزى

مەملەكەت باسشىسى نيۋ-يوركتە بۇۇ باس اسسامبلەياسىنىڭ 74-سەسسياسىنىڭ جالپى دەباتىندا ءسوز سويلەدى.

قازاقستان پرەزيدەنتى بەدەلدى حالىقارالىق ۇيىمنىڭ مىنبەرىنەن قانداي ۇندەۋ جاريالاپ, نەندەي ماسەلە كوتەرگەنىن تىڭدايىق.

قاسىم-جومارت توقاەۆ, قازاقستان رەسپۋبليكاسىنىڭ پرەزيدەنتى:

– قۇرمەتتى توراعا مىرزا! جوعارى مارتەبەلى دەلەگاتسيا باسشىلارى!

قادىرلى حانىمدار مەن مىرزالار!

قازاقستان رەسپۋبليكاسىنىڭ پرەزيدەنتى رەتىندە تۇڭعىش رەت بىرىككەن ۇلتتار ۇيىمىنىڭ باس اسسامبلەياسىنىڭ بيىك مىنبەرىنەن ۇندەۋ جولداۋ – مەن ءۇشىن زور مارتەبە.

ۇلتتار ۇيىمى دۇنيە جۇزىندەگى بارشا ادامزاتتىڭ مۇڭ-مۇقتاجىن قورعايتىن بالاماسى جوق بىرەگەي ءارى امبەباپ ۇيىم جانە ءاردايىم سولاي بولىپ قالا بەرەدى.

ادامزاتتى تالاي سىن-قاتەر مەن قانتوگىستەردەن ساقتاپ كەلە جاتقان ۇيىمنىڭ نەگىزى قالانعانىنا كەلەسى جىلى 75 جىل تولادى.

بۇگىندە ۇلتتار ۇيىمى عالامدىق دامۋ جانە وركەنيەتتەر ساباقتاستىعىن قامتاماسىز ەتۋدە اسا ماڭىزدى ءرول اتقارىپ كەلەدى.

باس حاتشى انتونيۋ گۋتەرريشتىڭ ءار ادام مەن مەملەكەت تاعدىرىن ورتاق قۇندىلىق دەپ تاۋىپ, نازاردان تىس قالدىرماۋ يدەياسىن قازاقستان تولىق قولدايدى.

الايدا قازىرگى تاڭداعى گەوساياسي جانە گەوەكونوميكالىق وزگەرىستەرگە قاتىستى الاڭداۋشىلىعىمىزعا تولىق نەگىز بار.

بۇل جاعداي 2030 كۇن ءتارتىبىن جۇزەگە اسىرۋ ماقساتىنداعى بىرلەسكەن ءىس-ارەكەتتەرىمىز ءۇشىن كۇردەلى سىناق ەكەنى ايقىن.

مەنىڭ ويىمشا, ءبارىمىزدى الاڭداتۋى ءتيىس جاڭا جاھاندىق سىن-قاتەرلەرگە مىنا تەندەنتسيالار اسەر ەتەدى:

بىرىنشىدەن, الەمنىڭ ءارتۇرلى ايماقتارىنداعى قاقتىعىستار مەن شيەلەنىستەر بۇرىنعى ءبولىنۋ سىزىقتارىن قالپىنا كەلتىرىپ, جاڭالارىن قۇرىپ, الەمدىك دەرجاۆالاردى اسكەري ماسشتابتاعى توقتاپ قالۋ شەگىنە جەتكىزدى.

ەكىنشىدەن, ءبىز جاھاندىق جانە ايماقتىق دەرجاۆالاردىڭ ءبىر-بىرىنە دەگەن سەنىمسىزدىگىنەن زارداپ شەگەمىز. بۇل قازىرگى قاۋىپسىزدىك پەن قارۋلانۋدى باقىلاۋ ءتارتىبىنىڭ بۇزىلۋىنا جانە جاپپاي قارۋلانۋ جارىسىنىڭ قايتا باستالۋىنا اكەپ سوعادى.

بۇل جاعداي دامۋعا شەكتەۋ قوياتىن سانكتسيالارمەن, ساۋدا سوعىسىمەن, عارىشتاعى قارقىندى باسەكەلەستىكپەن, كيبەر-تەحنولوگيا جانە جاساندى زياتكەرلىكپەن ودان ءارى ۋشىعىپ جاتىر. وسى ايتىلعانداردىڭ ءبارى تەرەڭگە ەنىپ بارا جاتقان داعدارىستىڭ پايدا بولا باستاعانىن بىلدىرەدى.

ۇشىنشىدەن, كۇننەن-كۇنگە ارتىپ بارا جاتقان الەۋمەتتىك, ەكونوميكالىق جانە تەحنولوگيالىق تەڭسىزدىك, سولتۇستىك پەن وڭتۇستىك اراسىنداعى تەڭسىزدىك, سونداي-اق جاھاندىق قارىز داعدارىسى قازىرگى ەكونوميكالىق لاندشافتى بۇزادى.

سايكەسىنشە, حالىقارالىق ارىپتەستىك پەن ىنتىماقتاستىقتى السىرەتەتىن پروتەكتسيونيزم مەن ۇلتتاندىرىلعان ساياساتتىڭ كۋاسى بولىپ وتىرمىز.

تورتىنشىدەن, قورشاعان ورتانىڭ بۇزىلۋى الەمدەگى ەڭ وزەكتى ماسەلەلەردىڭ بىرىنە اينالدى.

ماسەلەن, ورتالىق ازياداعى كليماتتىڭ وزگەرۋى شولەيتتى جەرلەردىڭ كوبەيۋى, مۇزدىقتاردىڭ ەرۋى, اۋىز سۋ مەن يرريگاتسيالىق سۋدىڭ ازايۋى سىندى درامالىق ەكزيستەنتسيونالدى ماسەلەلەرگە اكەپ سوعۋى مۇمكىن.

قازاقستان وسىنداي كۇردەلى احۋالعا قاراماستان تۇراقتى جانە كوپجاقتى ءارى بەيبىت دامۋ ساياساتىن ناقتى جۇرگىزىپ كەلەدى.

يادرولىق قارۋدان ازات الەم قۇرۋ مەنىڭ ەلىمنىڭ باستى ماقساتى بولىپ قالا بەرەدى. بۇل قازاق حالقىنىڭ جالپىحالىقتىق بىرتۇتاستىعىنىڭ اجىراماس بولىگىنە اينالىپ, يادرولىق قارۋدى جويۋ جونىندەگى جاھاندىق قوزعالىستىڭ الدىڭعى شەبىندە بولۋعا مورالدىك قۇقىق بەرەدى.

ءبىزدىڭ پايىم بويىنشا, جاپپاي قىرىپ-جويۋ قارۋى – مەملەكەتتەردىڭ قولىنداعى اكتيۆ ەمەس, عالامداعى بەيتىشىلىك پەن تۇراقتىلىققا قاۋىپ ءتوندىرىپ تۇرعان قۇرال.

وكىنىشكە قاراي, كەيبىر ەلدەر وزدەرىنىڭ يادرولىق ارسەنالعا نەگىزدەلگەن ستراتەگيالىق قورعانىس قۇرالدارىنا يەك ارتىپ, باسەكەلەستەرىن اسسيمەتريالىق جاۋاپ قاتۋ مۇمكىندىگىن قاراستىرۋعا يتەرمەلەپ جاتىر.

وسى تۇرعىدا قازاقستان ۇلگى بولارلىق جۇمىستار اتقارىپ, قالىپتاسقان جاعدايدى وزگەرتۋگە كۇش سالۋدا.

تۇڭعىش پرەزيدەنت نۇرسۇلتان نازارباەۆتىڭ مىقتى باسشىلىعىمەن قازاقستان سەمەي يادرولىق پوليگونىن جاۋىپ, الەمدە قۋاتتىلىعى جاعىنان ءتورتىنشى يادرولىق ارسەنالدان ءوز ەركىمەن باس تارتتى.

بۇل شەشىمدەر يادرولىق قارۋسىزدانۋ جانە تاراتپاۋ سالاسىندا جاھاندىق كوشباسشىلىققا شىعۋ جولىنداعى العاشقى قادام بولدى.

وسى يگى ىسكە قوسقان ۇلەسىمىزدىڭ ءبىرى رەتىندە مەن ورتالىق ازيادا يادرولىق قارۋدان ازات ايماقتىڭ قۇرىلۋىن ايتار ەدىم, ماگاتە-ءنىڭ تومەن بايىتىلعان ۋران بانكى ءبىزدىڭ ەلىمىزدە ورنالاسقان, ءبىز حالىقارالىق يادرولىق سىناقتارعا قارسى ءىس-قيمىل كۇنىندە بۇۇ باس اسسامبلەياسىنىڭ قارارىن قابىلدادىق جانە جاقىندا يادرولىق قارۋعا تىيىم سالۋ تۋرالى شارتتى بەكىتتىك.

بارلىق مەملەكەت قاۋىپسىز بولاشاقتىڭ جول كارتاسى رەتىندە يادرولىق قارۋسىز الەم قۇرۋ تۋرالى جالپى دەكلاراتسيانى قولداۋى كەرەك.

ءبىز سونداي-اق يادرولىق قارۋسىز ايماقتار اراسىنداعى ىنتىماقتاستىقتى كەڭەيتۋگە جانە جاڭالارىن قۇرۋعا مۇددەلىمىز.

قازاقستان يرانعا جانە كورەيا تۇبەگىنىڭ يادرولىق قارۋسىزدانۋىنا قاتىستى بىرلەسكەن ءىس-قيمىل جوسپارىنداعى ماسەلەلەر ساياسي امالدارمەن ءار قايسىسىنىڭ مۇددەسى ەسكەرىلگەن تۇردە شەشىلۋى قاجەت دەپ ويلايدى.

قۇرمەتتى دەلەگاتتار!

ءبىزدىڭ مەملەكەت قاشان دا الەمدىك ارەنادا بەرىك ديپلوماتيا مەن تاراپتاردى تاتۋلاستارى ۇستانىمىن قولدايدى.

1992 جىلى وسى مىنبەردەن قازاقستاننىڭ تۇڭعىش پرەزيدەنتى قاۋىپسىزدىك ماسەلەلەرىن شەشۋگە ۇجىمدىق كوزقاراستار الاڭى رەتىندە ازياداعى ءوزارا ءىس-قيمىل جانە سەنىم شارالارى كونفەرەنتسياسىن شاقىرۋدى ۇسىندى.

ۋاقىت وتە كەلە ازياداعى ءوزارا ءىس-قيمىل جانە سەنىم شارالارى كونفەرەنتسياسى ءوزىنىڭ قۇندىلىعى مەن ومىرشەڭدىگىن دالەلدەدى. ءبىز وسى پروتسەسكە قوسىلعان بارلىق سەرىكتەستەرىمىزگە العىس بىلدىرەمىز.

ازيانىڭ قارقىندى ارتىپ كەلە جاتقان ەكونوميكالىق الەۋەتى ءبىر-بىرىمەن تىعىز بايلانىستى قۇرلىقتىق ينتەگراتسيانى قاجەت ەتەدى.

ازياداعى ءوزارا ءىس-قيمىل جانە سەنىم شارالارى كونفەرەنتسيانى قاۋىپسىزدىك پەن دامۋدىڭ تولىققاندى ايماقتىق ۇيىمىنا اينالدىراتىن كەز كەلدى.

2020 جىلى وعان توراعالىق ەتۋ ارقىلى ءبىز بار كۇش-جىگەرىمىزدى جۇمسايمىز.

سوڭعى ەكى جىلدا بۇۇ قاۋىپسىزدىك كەڭەسىنىڭ تۇراقتى ەمەس مۇشەسى بولۋ ارقىلى ءبىز قاۋىپسىزدىكتى كۇشەيتۋگە, يادرولىق قارۋدى تاراتپاۋعا جانە ايماقتىق ارىپتەستىكتى باسا ءمان بەرىپ وتىرمىز.

قازاقستان بىرىككەن ۇلتتار ۇيىمىنىڭ بىتىمگەرشىلىك قىزمەتتەرىنە قاتىسىپ كەلەدى.

ۇندىستاندىق ارىپتەستەرىمىزبەن بىرگە بىرىككەن ۇلتتار ۇيىمىنىڭ ليۆانداعى 120 ادامدىق ۋاقىتشا كۇشتەرىنە قاتىسامىز.

ءبىز سونىمەن بىرگە, قازاقستان دىندەر مەن وركەنيەتتەر اراسىنداعى ۇنقاتىسۋدىڭ جاھاندىق ورتالىعىنا اينالعانىن ماقتانىشپەن ايتامىز.

2003 جىلدان باستاپ ەلوردامىز بۇۇ قولداۋىمەن الەمدىك جانە ءداستۇرلى دىندەر ليدەرلەرىنىڭ ءۇش جىلدىق كونگرەسىن شاقىرۋ قۇرمەتىنە يە بولدى.

حانىمدار مەن مىرزالار!

ءبىز بۇگىندە زورلىق-زومبىلىقتان زارداپ شەككەن ادامزات وركەنيەتىنىڭ بەسىگى — تاياۋ شىعىستاعى وقيعالاردىڭ قالاي وربيتىنىنە قاۋىپپەن قاراپ وتىرمىز.

سوندىقتان بەيبىتشىلىك پەن ءوزارا سەنىمدى نىعايتۋعا باعىتتالعان ومىرشەڭ ەكىجاقتى جانە كوپجاقتى ارەكەتتەردى قولداۋعا دايىنبىز.

ينكليۋزيۆتى ديالوگقا دەگەن كوزقاراسىمىزدىڭ مىسالى رەتىندە قازاقستان سيرياارالىق كەلىسسوزدەرگە الاڭىن ۇسىنادى. بۇگىنگە دەيىن ەلوردامىزدا وسى كەلىسسوزدەردىڭ 13 راۋندى ءوتتى.

جەنەۆا كەلىسسوزدەرىن تولىقتىراتىن استانا پروتسەسىنىڭ ارقاسىندا سوعىس قيمىلدارىن توقتاتۋعا قول جەتكىزىلدى. بوسقىنداردىڭ ۇيلەرىنە ورالۋى ءۇشىن جاعداي جاسالىپ, قاۋىپسىز ايماقتار قۇرىلدى.

قاقتىعىستار جويقىن بولىپ, تەرروريزم مەن ەكسترەميزمدى تۋدىراتىنى بارىمىزگە بەلگىلى. بۇل سىن-قاتەرلەر

بىرىككەن ۇلتتار ۇيىمىنىڭ ىقپالىمەن تەرروريزمگە قارسى جاھاندىق جەلى جانە بىرلەسكەن ءىس-قيمىل ارقىلى جويۋعا بولادى.

تەرروريزمگە قارسى قارەكەت رەتىندە قازاقستان 2045 جىلى بىرىككەن ۇلتتار ۇيىمىنىڭ 100 جىلدىعىنا وراي تەرروريزمنەن ازات الەم قۇرۋ ءۇشىن مىنەز-ق ۇلىق كودەكسىن ۇسىندى جانە ءبىز بارلىق مەملەكەتتى وسى ۇدەرىسكە قوسىلۋعا شاقىرامىز.

بيىل قازاقستان حالىقارالىق سەرىكتەستەرىمەن بىرلەسىپ, «جۋسان» ارنايى گۋمانيتارلىق ميسسياسىن ءساتتى اياقتادى.

ناتيجەسىندە تەرروريزمدى ناسيحاتتاۋمەن اينالىسقان 595 قازاقستاندىق, ونىڭ ىشىندە 406 بالا سيريانىڭ سوعىس ايماقتارىنان ۇيلەرىنە ورالدى.

ءبىز ءوز تاجىريبەمىزدى باسقا ەلدەرمەن بولىسۋگە جانە ولاردى وسىنداي شارالاردى قابىلداۋعا شاقىرامىز. ونداعان جىل بويى ورتالىق ازيا مەملەكەتتەرىنىڭ ەكونوميكالىق بايلانىسى ءالسىز بولدى, بۇل ولاردىڭ تۇراقتى تۇردە دامۋىنا كەدەرگى كەلتىردى.

بۇگىندە مۇددەلەرى مەن وزىندىك ماسەلەلەر بار ايماق دامۋدىڭ جاڭا كەزەڭىنە اياق باستى. وسىعان بايلانىستى وڭىردەگى 5 ەلدىڭ سىندارلى ساياسي ديالوگى ساۋدا-ەكونوميكالىق جانە ينۆەستيتسيالىق قاتىناستار مەن ادامدار اراسىنداعى قارىم-قاتىناستى دامىتۋعا باعىتتالادى.

بىلتىر ەلوردامىزدا وتكەن جوعارى دەڭگەيدەگى بەيرەسمي كەزدەسۋلەردىڭ ءبىرىنشى راۋندىنان كەيىن ايماقتا وزگەشە مۇمكىندىكتەر پايدا بولدى.

ورتالىق ازيانىڭ جاھاندىق ءرولى كۇشەيە تۇسەتىنىنە تولىق سەنىمدىمىن. ءبىزدى ورتاق تاريحي جانە مادەني مۇرا بايلانىستىرادى. بولاشاعىمىز دا ورتاق.

قازاقستان ورتالىق ازياداعى ەڭ ءىرى ەكونوميكا رەتىندە بارلىق مەملەكەتتەر اراسىنداعى ءوزارا ءتيىمدى ىنتىماقتاستىقتى ودان ءارى نىعايتۋعا مۇددەلى.

اۋعانستانداعى جاعداي ءبىزدىڭ ايماققا تىكەلەي اسەر ەتەدى. وسى ەل باسشىلىعىمەن جانە جەتەكشىلىگىمەن جۇرگىزىلەتىن بەيبىتشىلىك پروتسەسى ارقىلى بارلىق نەگىزگى مۇددەلى تاراپتاردىڭ قولداۋىمەن ۇزاقمەرزىمدى بەيبىتشىلىك پەن وركەنيەت قالىپتاسادى دەپ سەنەمىز. قازاقستان اۋعان حالقىنا ءوز مەملەكەتىن قالپىنا كەلتىرۋگە قولداۋ كورسەتۋدى جالعاستىرادى.

جاھاندىق جانە ايماقتىق سەرىكتەستىك, ۇزاق مەرزىمدى ينۆەستيتسيالار جانە ايماقتىق ينتەگراتسيالىق پروتسەستەر – مۇنىڭ ءبارى وسى ەلدىڭ بەيبىت بولاشاعى ءۇشىن وتە ماڭىزدى.

قۇرمەتتى دەلەگاتتار!

بىرىككەن ۇلتتار ۇيىمىنىڭ ءوز ميسسيالارىن ورىنداۋ قابىلەتى كۇردەلى سىناقتاردان وتۋدە. سوندىقتان, ۇيىمنىڭ باس حاتشىسى العا تارتقان رەفورمالاردىڭ باتىل جانە ايقىن كورىنىسى بارلىق مۇشە مەملەكەتتەردىڭ كەڭ قولداۋىنا لايىق.

قازاقستان كۇن تارتىبىندەگى مىندەتتەردىڭ 2030 جىلعا دەيىن تولىق ورىندالۋىنا ەرەكشە نازار اۋدارادى. ءبىز ورتاشا تابىسى بار ەلدەردىڭ تاعدىرىن قايتالاماۋعا تىرىسامىز.

تۇراقتى دامۋ ماقساتتارى اياسىنداعى مىندەتتەرگە ءبىزدىڭ ستراتەگيالىق مەملەكەتتىك باعدارلامالاردىڭ 80% بىرىكتىرىلگەن.

مامىر ايىندا مەن قازاقستاندا حالىقارالىق ۇيىمداردىڭ جاڭا عيماراتىن اشتىم. وندا بىرىككەن ۇلتتار ۇيىمىنىڭ 16 اگەنتتىگى بار. كەلەسى قادام رەتىندە ءبىز ورتالىق ازيا مەن اۋعانستانعا كومەك بەرۋ مانداتىمەن بىرىككەن ۇلتتار ۇيىمىنىڭ تۇراقتى دامۋ ماقساتتارى ورتالىعىن وسى عيماراتقا ورنالاستىرۋدى ۇسىنامىن.

ەۋرازياداعى ەڭ ءىرى كولىك جانە ترانزيتتىك اۋماقتىڭ ءبىرى بولا وتىرىپ, قازاقستان ەاەو مۇشەسى جانە «ءبىر بەلدەۋ, ءبىر جول جوباسى» شەڭبەرىندەگى سەنىمدى سەرىكتەس رەتىندە ترانسقۇرلىقتىق ساۋدانى ارتتىرۋدا شەشۋشى ءرول اتقارادى.

حانىمدار مەن مىرزالار!

وسى قيىن-قىستاۋ كەزەڭدە ءبىز «ۇزدىكسىزدىك. ادىلەت. پروگرەسس » ۇرانىمەن جالپى قوعامدىق تۇرلەندىرۋ جولىمەن ءجۇرۋدى جالعاستىرۋىمىز كەرەك.

قازاقستاننىڭ ساياسي جۇيەسىندەگى مەنىڭ فورمۋلام: «مىقتى ستراتەگيالىق كوزقاراستاعى پرەزيدەنت, ىقپالدى پارلامەنت جانە ەسەپ بەرەتىن ۇكىمەت».

بۇل تۇجىرىمداما ەلىمىزدىڭ نەگىزگى قاجەتتىلىكتەرىنە جاۋاپ بەرەدى جانە ونىڭ بەيبىت جانە تۇراقتى بولاشاعىن قامتاماسىز ەتەدى دەپ سەنەمىن.

جاڭا پرەزيدەنت رەتىندە مەن ەڭ الدىمەن زاماناۋي الەۋمەتتىك مەملەكەت قۇرۋدى ماقسات تۇتامىن. مەنىڭ تۇپكى ماقساتىم – ميلليونداعان وتانداسىما كەڭ اۋقىمدى رەفورمالاردىڭ يگىلىگىن كورسەتىپ, ەكونوميكاسى, ساپالى ءبىلىمى جانە زاماناۋي مەديتسيناسى بار كەدەرگىلەردەن از قوعامدا ءومىر ءسۇرۋ.

ەگەر تەرەڭ ساياسي وزگەرىستەر بولماسا, قازاقستان ءساتتى الەۋمەتتىك-ەكونوميكالىق دامۋدىڭ ۇلگىسى بولا المايدى.

سونىمەن بىرگە, قازاقستانداعى دەموكراتيا ءالى دە جالعاساتىن جۇمىس ەكەنىن جانە مۇندا ۇنەمى تالداۋ قاجەت ەكەنىن ەسكەرۋ قاجەت. ءبىز ۇنەمى ونى جەتىلدىرۋگە, جاعىمدى جاقتارىن دامىتۋعا جانە جاعىمسىز تاجىريبەلەردەن ۇيرەنۋگە تىرىسامىز.

مەن ءوز باعدارلامامنىڭ اياسىندا مەملەكەت پەن قوعام اراسىندا ديالوگ قالىپتاستىرۋ ءۇشىن قوعامدىق سەنىم ۇلتتىق كەڭەسىن قۇردىم.

مەنىڭ كوزقاراسىم «ءارتۇرلى پىكىرلەر – بىراق ءبىرتۇتاس ۇلت» ۇعىمىنا نەگىزدەلگەن.

پىكىر الماسۋ مەن ديالوگ ارقىلى ءبىز العا جىلجۋىمىز كەرەك. بارلىق سالادا زاڭدىلىقتى جانە ازاماتتاردىڭ كۇندەلىكتى ءومىرىن ساقتاۋ ءۇشىن قۇقىق قورعاۋ ورگاندارى مەن سوتتاردى ۇلكەن وزگەرىستەر كۇتىپ تۇر.

پوپۋليزم – بۇل ورتا دەڭگەي ساياساتى. مەن بوس ۋادە بەرمەيمىن. مەن ناقتى ىستەردىڭ ادامىمىن. ءوزىمنىڭ رەفورمالىق باعدارلامامدى ناقتى ىسكە اسىرامىن.

كەلەسى جىلى بۇۇ ءوز تاريحىنداعى ماڭىزدى كەزەڭدى اتاپ وتەدى. بۇل وقيعا سەنىمسىزدىك پەن اسكەري ارازدىقتى توقتاتۋ ءۇشىن جان-جاقتى حالىقارالىق ىنتىماقتاستىقتى ىلگەرىلەتۋ جونىندەگى بىرلەسكەن كۇش-جىگەرىمىزگە جاڭا سەرپىن بەرۋى كەرەك.

مەن حالىقارالىق قاۋىمداستىقتى جانە بارلىق سەرىكتەستەرىمىزدى الەم قاۋىپسىزدىك, ىنتىماقتاستىق جانە ءوزارا سەنىم جولىندا العا باسۋى ءۇشىن كۇش بىرىكتىرۋگە شاقىرامىن.

ءبىز بولاشاق ۇرپاقتىڭ قامىن ويلاۋىمىز كەرەك جانە ولاردىڭ جاڭا ەكونوميكا مەن تەحنولوگيانى قۇرۋعا قاتىسۋىن قامتاماسىز ەتۋ قاجەت.

ءبىز قورشاعان ورتانى قورعاۋىمىز كەرەك, تەحنولوگيالىق وزگەرىستەرگە ىقپال ەتىپ, ادامداردى مەديتسينالىق قىزمەتپەن جانە بىلىممەن قامتاماسىز ەتۋىمىز كەرەك.

بولاشاق ۇرپاقتىڭ تاعدىرى ءبىزدىڭ قازىرگى تۇراقسىز الەمدەگى جاعدايدان الدەقايدا جاقسى بولۋى كەرەك.

حالىقارالىق قوعامداستىقتىڭ جاۋاپتى مۇشەسى رەتىندە قازاقستان بەيبىتشىلىك ورناتۋعا جانە ادام قۇقىقتارىن, ابىروي مەن وركەندەۋدى ىلگەرىلەتۋگە باعىتتالعان ۇجىمدىق ءىس-شارالارعا ۇنەمى قاتىسادى.

دەرەككوز: https://24.kz