جاڭالىقتار

كۇيشىلەر بايقاۋى وتەدى

ورازبەك سارسەنوۆتىڭ تۋعانىنا 95 جىل تولۋىنا وراي كۇيشىلەر بايقاۋى وتەدى.

ورازبەك سارسەنوۆ 1923 جىلى 17 قازان كۇنى بۇرىنعى شىمكەنت وبلىسى ارىس اۋدانىنداعى بايىرقۇم ەلدى مەكەنىندە دۇنيەگە كەلگەن. مەكتەپتە وزات وقىعان العىر دا زەرەك جاس 9 كلاستى 5 جىلدا ءتامامداپ شىعادى. كەيىن تۇركىستانداعى كوللەدجدى پەداگوگ ماماندىعى بويىنشا اياقتاپ, بايساقال اۋىلىنداعى مەكتەپكە مۇعالىم بولىپ ورنالاسىپ, ءبىر جىلدان كەيىن مەكتەپتىڭ ديرەكتورى بولىپ تاعايىندالادى. بالالارى ەر جەتكەسىن, ولاردىڭ بولاشاعىنا الاڭداعان ورازبەك ساۋدا جاعىنا اۋىسىپ, ءومىرىنىڭ سوڭىنا دەيىن سول سالادا ەڭبەك ەتكەن.

ورازبەك كۇيشى 1969 جىلى وبىر اۋرۋىنان قايتىس بولعان. جەتىنشى مامىر كۇنى تاڭەرتەڭ: «دومبىرامدى بەرىڭدەرشى», – دەپ قولىنا جان سەرىگىن العان كۇيشى «قىزىلقۇم» كۇيىن شەرتىپ وتىرىپ: «وسى سالالى ساۋساقتار دا ءبىر كۇنى توپىراقتا ءشىريدى-اۋ!» – دەگەن ەكەن. بۇل سوزدەردى ەشكىم ەلەمەگەن. 9 مامىر كۇنى ساعات 10 شاماسىندا ول ءومىردى, بالالارىن قيماي كوز جۇمادى.

ورازبەك كۇيشى وزبەكستاننىڭ مەملەكەتتىك تەلەارناسىنان اپتاسىنا ءبىر رەت بەرىلەتىن «زامانداس» مۋزىكالىق باعدارلاماسىنا 1967 جىلى ارنايى شاقىرىلىپ, ءوزىنىڭ 7 كۇيىن جازدىرعان. ورازبەكتىڭ كۇيلەرى مەن ولەڭدەرىندە مۇڭ, جەر مەن ەلگە دەگەن ساعىنىش باسىم.

جيدەلىبايسىن كۇي مەكتەبىنىڭ وكىلى, ورازبەك كۇيشىنىڭ ۇرپاقتارى اكەلەلەرىنىڭ كۇي-اماناتىن ناسيحاتتاۋ ماقساتىندا ەلىمىزدەگى كۇيشىلەر اراسىندا بايقاۋ جاريالايدى.

بايقاۋ تالاپتارى:

1. قاتىسۋشى مىندەتتى تۇردە «كۇلدىر-ماماي» كۇيىن جانە قالعان التى كۇيدىڭ بىرەۋىن ءوز تالعامىنا قاراي ورىنداۋى ءتيىس. كۇيشىلەر بايىرعى قۇيماقۇلاق داستۇرىمەن, كۇيلەردى ەستۋ ارقىلى الادى. (كۇيلەر ۆكونتاكتە الەۋمەتتىك جەلىسىندەگى كۇلاينا ورازبەكقىزىنىڭ پاراقشاسىندا بەرىلگەن).

2. كۇيشى ءوزىنىڭ اتى-ءجونىن, قىسقاشا ءومىربايانىن جازىپ, كۇيلەردىڭ wafe نەمەسە ۆيدەو نۇسقاسىن sarsenova.001@mail.ru پوچتاسىنا جىبەرۋى كەرەك.

بايقاۋ قورىتىندىسىن بەلگىلى كۇيشىلەر: قازاقستاننىڭ ەڭبەك سىڭىرگەن قايراتكەرى, پروفەسسور جانعالي ءجۇزباي, قۇرمانعازى اتىنداعى قۇك دوتسەنتى, بىرنەشە كۇيشىلەر كونكۋرسىنىڭ لاۋرەاتى مۇرات ابۋعازى جانە «ءجۇسىپ» كۇيىنىڭ اۆتورى, ءجۇسىپ سارسەن ۇلىنىڭ نەمەرەسى ءمادي كوشىكباەۆ شىعارادى. جەڭىمپاز كۇيشىلەردى 2019 جىلعى جەلتوقساننىڭ 16-ى كۇنى كۇلاينا ورازبەكقىزى فەيسبۋك پاراقشاسىندا جاريالانادى.

باس جۇلدە – 200 000 تگ

ءى ورىن – 120 000 تگ

ءىى ورىن – 80 000 تگ

ءىىى ورىن – 50 000 تگ

وسى ايداردا

پىكىر ۇستەۋ

Close