الماتىدا اتا-اناعا قىزىن مەكتەپكە ورامالمەن جىبەرۋگە بولمايتىنى ءتۇسىندىرىلدى

الماتىدا قوعامدىق دامۋ باسقارماسىنىڭ الەۋمەتتىك تاپسىرىسى بويىنشا مەكتەپ وقۋشىلارىنىڭ حيدجاب كيۋىنە بايلانىستى ءتۇسىندىرۋ جۇمىستارى جالعاسىپ جاتىر.

بۇگىن قالاداعى جالپى ءبىلىم بەرەتىن №97 مەكتەپتە قىزى ورامال تاعاتىن اتا-انامەن تەولوگ كەزدەستى.

جالپى, بۇنداي ءتۇسىندىرۋ جۇمىستارى سوڭعى جىلدارى قارقىندى جۇرگىزىلىپ كەلەدى. تەولوگ, ءال-فارابي اتىنداعى قازۇۋ, ءدىنتانۋ جانە مادەنيەتتانۋ كافەدراسىنىڭ اعا وقىتۋشىسى, PhD دوكتورى باعاشاروۆ قۇدايبەردى سابىرجان ۇلى شاقىرىلعان اتا-اناعا قازاقستاننىڭ زايىرلى مەملەكەتتىك جۇيەسىندە, سونىڭ ىشىندە زايىرلى ءبىلىم بەرۋگە جاۋاپتى ورتا ءبىلىم بەرەتىن مەملەكەتتىك مەكەمەلەردە قانداي دا ءبىر ءدىني اتريبۋتيكانى كىرگىزۋگە زاڭ بويىنشا رۇقسات ەتىلمەيتىنىن ءتۇسىندىردى.

ءدىنتانۋ مامانى ءوز سوزىندە مىنا ماسەلەلەردى باسا ايتتى. «قازاقستان رەسپۋبليكاسىندا كونستيتۋتسيا نەگىزىندە ازاماتتارعا ار-وجدان بوستاندىعى جانە نانىم سەنىم ەركىندىگى بەرىلىپ وتىر. وسى سەبەپتى كەز كەزگەن قازاقستان ازاماتى ءوزىنىڭ ءدىني سەنىمىن ايقىنداۋ قۇقىنا يە. ياعني, ءدىندى ۇستانۋعا ەشقانداي قۇقىقتىق شەكتەۋ قويىلمايدى. وسى سەبەپتى دە قازاقستاندا عيبادات ۇيلەرى دە كۇن ساناپ كوبەيىپ كەلەدى. دەگەنمەن, زايىرلىلىق دىنگە بەيتاراپ مەملەكەتتىڭ ۇستانىمى. ءدىننىڭ مەملەكەتتەن اجىراعاندىعىن بىلدىرەدى. وكىنىشكە قاراي, بۇگىنگى كۇنى ءدىني بىرلەستىكتەر مەملەكەتتىڭ كەيبىر تالاپتارىن ورىنداۋعا ق ۇلىقسىزدىق تانىتۋدا, ءتىپتى اشىق مويىندامايتىندارىن العا تارتاتىندار دا بار. مىسالى, قان قۇيدىرماۋ, اسكەرگە بارماۋ, ءانۇران ايتپاۋ, وتاندى قورعاۋ ماقساتىندا قولعا قارۋ الماۋ, بىرقاتار زايىرلى پاندەرگە قاتىسپاۋ, ساباق ۋاقىتىندا جۇما نامازعا كەتىپ قالۋ, سونىڭ ىشىندە مەكتەپتىڭ ىشىندە ورامال تاعىپ ءجۇرۋ دە بار.

«ءدىني قىزمەت جانە ءدىني بىرلەستىكتەر» زاڭىندا ءدىني سەنىمىن العا تارتىپ زاڭ مىندەتتەيتىن مىندەتتەمەلەردەن باس تارتۋعا بولمايتىندىعى اشىق جازىلعان. بۇعان قوسا, قر ءبىلىم جانە عىلىم مينيسترلىگىنىڭ 2016 جىلعى №26 بۇيرىعى دا مەكتەپىشىندەگى تارتىپكە جانە بىرىڭعاي مەكتەپ فورماسىنىڭ مىندەتتىلىگىنە وراي قىز بالالاردىڭ ورامال تاعىپ, مەكتەپتە جۇرۋىنە تىيىم سالادى. بۇعان قاراپ, مەملەكەت ءدىن وكىلدەرىن قۋدالاپ جاتىر دەگەن وي تۋماۋى ءتيىس. مەملەكەت ءوز تاراپىنان ءدىندى ۇستانۋعا بارلىق جاعدايدى جاساۋدا. جالپى, كوشەدە ورامال تاعۋعا تىيىم جوق, ناماز وقۋعا تىيىم جوق. مەكتەپتەر دە مەملەكەتتىك وقۋ ورىندارى بولعاندىقتان, ول جەر مەملەكەت بەلگىلەگەن تارتىپپەن جۇمىس ىستەيدى. ورامالعا بولا قىز بالانى مەكتەپتەن شىعارىپ الىپ, وقىتپاي قويۋ دا دۇرىس ەمەس. كەيبىر اتا-انالار جاقىن شەتەلدەرگە قاشىقتان وقىتۋعا ءوتىپ جاتىر. دەگەنمەن, بۇل جەردە مەملەكەت قاراجات ءبولىپ, تەگىن وقىتىپ جاتقاندىقتان, مەكتەپتىڭ ىشكى تالاپتارىنا باعىنعان جاعدايدا بالانىڭ ءبىلىم الۋىنا ەشقانداي كەدەرگى جوق. كەرى جاعدايدا زاڭدى ءتۇسىندىرۋ جۇمىستارىن مەكتەپتەر ءاردايىم جۇرگىزەدى. ارينە, زاڭمەن قورقىتۋ ويىمىزدا جوق. دەگەنمەن بىرنەشە رەت ءتۇسىندىرۋ جۇمىستارى جۇرگىزىلگەننەن كەيىن باعىنباعان اتا-انالارعا ون ايلىق ەسەپتىك كورسەتكىش بويىنشا ايىپپۇل دا سالىناتىنىن ەسكەرتەمىز», — دەدى ءدىنتانۋشى مامان.

ارنايى كەزدەسۋگە كەلگەن اتا-انالار دا وزدەرىنىڭ ۋاجدەرىن جەتكىزدى. ولار قىز بالانىڭ باليعات جاسىنا تولۋىمەن وعان ورامال تاعۋ, شاشىن جاسىرىپ ۇستاۋ, قۇران تالابىن ورىنداۋ مىندەتتى بولاتىنىن العا تارتتى.

ساراپشى مامان بۇل ۋاجگە تومەندەگىدەي جاۋاپ ايتتى: «يسلامدا باليعات جاسىنا تولعان قىز بالانىڭ ورامال تاعۋى پارىز ەكەنى تالاسسىز. جالپى, قوعامدىق ورتادا ورامالعا تىيىم جوقتىعى دا سوندىقتان. مەملەكەت ونىڭ پارىزدىعىن جوققا شىعارمايدى. دەگەنمەن, ورتا ءبىلىم بەرۋ مەكەمەلەرى مەملەكەتكە قاراعاندىقتان, ونىڭ ىشكى ءتارتىبىن مەملەكەتتىڭ ءتيىستى ورگاندارى بەلگىلەيدى. ەلدەگى ءدىني بىرلەستىكتەر بالاعا ءدىني تاربيەنى ۇيدە بەرۋى ءتيىس. ورامال جاعدايىمەن بالا تەك مەكتەپ ىشىندە جۇرە المايدى, ال مەكتەپتەن تىس ءوز ەركى وزىندە. ارينە, بالاعا ءدىني تاربيە بەرۋگە اتا-انانىڭ قۇقى بار. بۇل تالاپ بۇكىل رەسپۋبليكا مەكتەپتەرىنە ورتاق تالاپ. سول سەبەپتى اتا-انالاردى ورتاق زاڭ تالاپتارىنا باعىنۋعا شاقىرامىز».

كەزدەسۋ كەزىندە تاراپتار اشىق اڭگىمە جۇرگىزىپ, مەملەكەت, ءدىن, زاڭ, ءبىلىم الۋعا قاتىستى ويلارىن بۇكپەسىز ورتاعا سالدى.

دەرەككوز: inform.kz/