تەلەگرام ارقىلى تۋ تۋرالى كۋالىككە تاپسىرىس بەرۋگە بولادى

EgovKzBot تەلەگرامم-بوتى ارقىلى ۇسىنىلاتىن مەملەكەتتىك قىزمەتتەردىڭ ءتىزىمى تاعى ەكى قىزمەتكە تولىقتى, دەپ حابارلايدى قازاقپارات.
«ۇلتتىق اقپاراتتىق تەحنولوگيالار» اق ىسكە قوسقان بوت ارقىلى بۇعان دەيىن 13 مەملەكەتتىك قىزمەت پەن سەرۆيس كورسەتىلەتىن. ونىڭ ىشىندە كەڭ تارالعان قىزمەت ءتۇرى جەتەۋ بولاتىن. ولار — انىقتاما, الەۋمەتتىك مارتەبەنى تەكسەرۋ مەن بازالىق زەينەتاقى تولەمىنىڭ كولەمى تۋرالى اقپارات الۋ, ەمحاناعا تىركەلۋ, دارىگەرگە جازىلۋ جانە دارىگەردى ۇيگە شاقىرتۋ, سونداي-اق حالىققا قىزمەت كورسەتۋ ورتالىعىندا (حقو) كەزەكتى برونداۋ قىزمەتتەرى.
ەندى بوت ارقىلى وزىڭىزگە جاقىن جەردە ورنالاسقان حقو تۋرالى ءبىلىپ, سونداي-اق بالا تۋعا بايلانىستى پرواكتيۆتى قىزمەتتەردى الۋ مۇمكىندىگى تۋدى. باسقاشا ايتقاندا, تۋ تۋرالى كۋالىككە تاپسىرىس بەرۋ, بالا تۋ بويىنشا جاردەماقىلاردى راسىمدەۋ جانە ءسابيدى بالاباقشاعا كەزەككە قويۋ ءتىپتى جەڭىلدەي ءتۇستى.
ايتا كەتەيىك, تەلەگرام-بوت ارقىلى مەملەكەتتىك قىزمەتتەردى الۋ ءۇشىن «ءموبيلدى ازاماتتار بازاسىنا» تىركەلۋ قاجەت, ياعني eGov.kz پورتالىنداعى جەكە كابينەتتە تەلەفون ءنومىرىڭىزدى جسن-گە بەكىتىپ, ءوز گادجەتىڭىزدەگى Telegram مەسسەندجەرىندە بوتتى ىسكە قوسۋ كەرەك.
سوسىن الدىن-الا بەلگىلەنگەن كوماندالاردى جولداپ, SMS-كودپەن راستاۋ ارقىلى انىقتامالار مەن سەرۆيستەر تۋرالى اقپاراتتى سۇراتا الاسىز. سونداي-اق بارلىق اقپاراتتى قولدانۋشىنىڭ ەلەكتروندىق پوشتاسىنا جولداۋ مۇمكىندىگى دە قاراستىرىلعان.
eGov.kz پورتالىنىڭ مامىردا ىسكە قوسىلعان تەلەگرام-بوتى ارقىلى قازاقستاندىقتار شامامەن 14 مىڭداي مەملەكەتتىك قىزمەت الدى.

دەرەككوز: https://www.inform.kz/kz/endi-tuu-turaly-kualikke-telegram-arkyly-tapsyrys-beruge-bolady_a3401083