جاڭالىقتار
ااك تولەۋ ءۇشىن بيىلعى بيۋدجەتتەن تاعى 36,9 ملرد تەڭگە بولىنەدى
2019 جىلدىڭ رەسپۋبليكالىق بيۋدجەتىنەن اتاۋلى الەۋمەتتىك كومەك تولەمدەرى ءۇشىن قوسىمشا 36,9 ملرد تەڭگە بولىنەدى. بۇل تۋرالى بۇگىن ۇكىمەت وتىرىسىندا 2019 جىلعى رەسپۋبليكالىق بيۋدجەتتى ناقتىلاۋ تۋرالى زاڭ جوباسىن ۇسىنعان قر قارجى ءمينيسترىنىڭ ءبىرىنشى ۆيتسە-ءمينيسترى بەرىك شولپانقۇلوۆ ايتتى.
«2019 جىلعا ارنالعان رەسپۋبليكالىق بيۋدجەتتى ناقتىلاۋ تۋرالى زاڭ جوباسى ۇسىنىلادى. ناقتىلاۋدا وسى جىلدىڭ ساۋىرىندە تۇزەتىلگەن 2019 جىلعا ارنالعان ەلدىڭ الەۋمەتتىك-ەكونوميكالىق دامۋ بولجامى كورسەتكىشتەرى ساقتالعان. جوبادا وسى جىلدىڭ بيۋدجەتىن اتقارۋ اياسىندا ۇكىمەت الدىنا قويىلعان بىرقاتار مىندەتتى شەشۋ كوزدەلگەن. ءبىرىنشى مىندەت — الەۋمەتتىك سالاداعى شۇعىل قارجىلاندىرۋ ماسەلەلەرىن شەشۋ. بۇل ماقساتقا 84,8 ملرد تەڭگە كوزدەلگەن. ونىڭ ىشىندە 36,9 ملرد تەڭگە الۋشىلار كونتينگەنتىنىڭ ۇلعايۋىنا بايلانىستى اتاۋلى الەۋمەتتىك كومەك تولەۋگە, 23,3 ملرد تەڭگە مەديتسينالىق كومەك كورسەتۋگە جانە دەنساۋلىق ساقتاۋ نىساندارىن جالعاستىرۋعا, 2,7 ملرد تەڭگە مادەنيەت پەن سپورتتى دامىتۋعا بولىنەدى», — دەدى ول.
ءبىرىنشى ۆيتسە-ءمينيستردىڭ ايتۋىنشا, ەكىنشى مىندەت — كەيىنگى جىلدارى ەكونوميكانىڭ ءوسۋ قارقىنىن ارتتىرۋ ءۇشىن قوسىمشا قارجى كوزدەرىن قاراستىرۋ. وسى مىندەت اياسىندا ناقتىلانعان بيۋدجەت جوباسىندا 136,8 ملرد تەڭگە كوزدەلگەن. ونىڭ 36,7 ملرد تەڭگەسى جولاۋشىلار ۆاگوندارى پاركىن سانيتارلىق-تەحنيكالىق جاڭارتۋعا جانە ماشينا جاساۋ سالاسى جوبالارىن قارجىلاندىرۋ ءۇشىن وڭدەۋ ونەركاسىبىن قولداۋعا, 21,1 ملرد تەڭگە اۆياپاركتى دامىتۋعا جانە مامانداندىرىلعان اۋە كەمەلەرىمەن تولىقتىرۋعا, 17,1 ملرد تەڭگە سالىمشىلارعا تۇرعىن ءۇي قارىزدارىن بەرۋ جانە سالىمدار بويىنشا سىياقىلار تولەۋگە, 8 ملرد تەڭگە پاۆلودار جانە اقتوبە وبلىستارىن قاجەتتى سۋارمالى جەرلەرىنىڭ گيدرومەلوراتيۆتىك جۇيەلەرىن جاڭعىرتۋعا, 7,2 ملرد تەڭگە جاڭبىل وبلىسى حالقىنىڭ تابىسى ارتتىرۋ جونىندەگى ىلكى جوبانى ىسكە اسىرۋعا ءبولىنىپ وتىر.
«ءۇشىنشى مىندەت — 4-توقسانداعى شۇعىل مىندەتتەرگە ارنالعان ۇكىمەت رەزەرۆىنىڭ قولايى رەزەرۆىن قامتاماسىز ەتۋ. كورسەتىلگەن مىندەتتەردى قارجىلىق قامتاماسىز ەتۋ شىعىستاردى قايتا ءبولۋ جانە 94,9 ملرد تەڭگە مولشەرىندە وسى جىلعى 9 ايدىڭ قورىتىندىسى بويىنشا بيۋدجەت تۇسىمدەرىن تۇزەتۋ جولىمەن جۇزەگە اسىرۋ ۇسىنىلادى. وسى وزگەرىستەردى ەسكەرە وتىرىپ, 2019 جىلعا ارنالعان رەسپۋبليكالىق بيۋدجەتتىڭ نەگىزگى پارامەترلەرى بىلاي قالىپتاستى: تۇسىمدەر 10 ترلن 663,5 ملرد تەڭگە, شىعىستار 12 ترلن 28,1 ملرد تەڭگە, تاپشىلىق 1 ترلن 364,6 ملرد تەڭگە نەمەسە جالپى ىشكى ونىمگە 2,1 پايىز», — دەدى بەرىك شولپانقۇلوۆ.
دەرەككوز: قازاقپارات
