ۇلتتىق ءداستۇرىمىز ءدىندى جوققا شىعارمايدى

«ادىرنا» ۇلتتىق-ەتنوگرافيالىق بىرلەستىگى» قق-ى (ادىرنا — ۇلتتىق-ەتنوگرافيالىق بىرلەستىگى ) «ازاماتتىق باستامالاردى قولداۋ ورتالىعى» كەاق-نىڭ (CISC )مەملەكەتتىك گرانتى اياسىندا قر اقپارات جانە قوعامدىق دامۋ مينيسترلىگىنىڭ قولداۋىمەن جۇزەگە اسىرىلا باستاعان ء«داستۇرلى رۋxاني قۇندىلىقتاردى قولداۋ جونىندەگى جۇمىستاردى ۇيىمداستىرۋ» جوباسى بويىنشا ءدارىس ۇيىمداستىردى.
اتاۋلى شارا ءال-فارابي اتىنداعى قازۇۋ-دىڭ فيلوسوفيا جانە ساياساتتانۋ فاكۋلتەتىنىڭ ءدىنتانۋ جانە مادەنيەتتانۋ كافەدراسىنىڭ ستۋدەنتتەرىمەن جۇزەگە استى. دارىسكەر رەتىندە فيلوسوفيا, ساياساتتانۋ جانە ءدىنتانۋ ينستيتۋتىنىڭ اعا عىلىمي قىزمەتكەرى, PhD دوكتور, ءدىنتانۋشى داۋرەن داريابەك جانە ر.ب. سۇلەيمەنوۆ اتىنداعى شىعىستانۋ ينستيتۋتىنىڭ كىشى عىلىمي قىزمەتكەرى ارمان اۋباكىر رۋxاني قۇندىلىقتار جايىندا ءدارىس وقىدى.
قازۇۋ-دىڭ ءدىنتانۋ جانە مادەنيەتتانۋ كافەدراسىنىڭ مەڭگەرۋشىسى, فيلوسوفيا عىلىمىنىڭ دوكتورى, پروفەسسور اينۇر دۇربەلەڭقىزى قۇرماناليەۆا العاشقى ءسوز سويلەپ, ءىس-شارانىڭ شىمىلدىعىن ءتۇرىپ بەردى.
دارىستە قازۇۋ شاكىرتتەرى ۇلتتىق قۇندىلىقتار مەن ءدىني ماسەلەلەرگە قاتىستى كوكەيلەرىندە جۇرگەن ءارتۇرلى سۇراقتاردى قويىپ بارىنشا بەلسەندىلىك تانىتا ءبىلدى. ستۋدەنتتەر تاراپىنان تۇسكەن سۇراقتىڭ ءبىرى: «ۇلتىمىزدىڭ ءداستۇرى يسلام دىنىندەگى ۇستانىمدارعا كەرەعار ەمەس پە?» بولدى. «جەرىمىزگە يسلام ءدىنى كەلمەي تۇرىپ تا, حالقىمىز بەلگىلى ءبىر زاڭدىلىقتارعا باعىندى. تابيعاتپەن, كۇندەلىكتى تىرشىلىكپەن جانە ادامزاتپەن تىكەلەي بايلانىستان تۋعان وسىنداي زاڭدىلىقتار ءداستۇرىمىزدى قالىپتاستىردى. سونداي قالىپتاسقان ءداستۇرىمىز يسلام ءدىنىنىڭ قاعيدالارىن ءوزارا ساباقتاستىرىپ, بايلانىستىرا ءبىلدى. ناتيجەسىندە بۇگىنگە دەيىن جالعاسىپ كەلگەن ءداستۇر جانە ءدىن ۇستانىمدارىنىڭ ىرگەتاسىن قالادى. حالقىمىزدىڭ ءداستۇرى يسلام شارتتارىن جوققا شىعارمايدى. كەرىسىنشە, ءدىني سەنىممەن تەرەڭ بايلانىستىرىلاتىن ۇلتتىق داستۇرلەرىمىز وتە كوپ», دەپ بۇل سۇراققا ارمان اۋباكىر جاۋاپ بەردى.
شارا سوڭىندا اقپاراتتىق-تانىمدىق بۋكلەتتەر تاراتىلىپ, جاستاردىڭ ءدارىستى قانشالىقتى تۇسىنگەنىن انىقتاۋ ماقساتىندا شاعىن ساۋالناما جۇرگىزىلدى.
م.كەڭەسبەكقىزى.