Ulttyq dástúrimiz dindi joqqa shyǵarmaıdy

«Adyrna» ulttyq-etnografııalyq birlestigi» QQ-y (Adyrna — ulttyq-etnografııalyq birlestigi ) «Azamattyq bastamalardy qoldaý ortalyǵy» KEAQ-nyń (CISC )memlekettik granty aıasynda QR Aqparat jáne qoǵamdyq damý mınıstrliginiń qoldaýymen júzege asyryla bastaǵan «Dástúrli rýxanı qundylyqtardy qoldaý jónindegi jumystardy uıymdastyrý» jobasy boıynsha dáris uıymdastyrdy.
Ataýly shara ál-Farabı atyndaǵy QazUÝ-dyń Fılosofııa jáne saıasattaný fakýltetiniń dintaný jáne mádenıettaný kafedrasynyń stýdentterimen júzege asty. Dárisker retinde Fılosofııa, saıasattaný jáne dintaný ınstıtýtynyń aǵa ǵylymı qyzmetkeri, PhD doktor, dintanýshy Dáýren Darııabek jáne R.B. Súleımenov atyndaǵy Shyǵystaný ınstıtýtynyń kishi ǵylymı qyzmetkeri Arman Áýbákir rýxanı qundylyqtar jaıynda dáris oqydy.
QazUÝ-dyń Dintaný jáne mádenıettaný kafedrasynyń meńgerýshisi, fılosofııa ǵylymynyń doktory, professor Aınur Dúrbeleńqyzy Qurmanálıeva alǵashqy sóz sóılep, is-sharanyń shymyldyǵyn túrip berdi.
Dáriste QazUÝ shákirtteri ulttyq qundylyqtar men dinı máselelerge qatysty kókeılerinde júrgen ártúrli suraqtardy qoıyp barynsha belsendilik tanyta bildi. Stýdentter tarapynan túsken suraqtyń biri: «Ultymyzdyń dástúri Islam dinindegi ustanymdarǵa kereǵar emes pe?» boldy. «Jerimizge Islam dini kelmeı turyp ta, halqymyz belgili bir zańdylyqtarǵa baǵyndy. Tabıǵatpen, kúndelikti tirshilikpen jáne adamzatpen tikeleı baılanystan týǵan osyndaı zańdylyqtar dástúrimizdi qalyptastyrdy. Sondaı qalyptasqan dástúrimiz Islam dininiń qaǵıdalaryn ózara sabaqtastyryp, baılanystyra bildi. Nátıjesinde búginge deıin jalǵasyp kelgen dástúr jáne din ustanymdarynyń irgetasyn qalady. Halqymyzdyń dástúri Islam sharttaryn joqqa shyǵarmaıdy. Kerisinshe, dinı senimmen tereń baılanystyrylatyn ulttyq dástúrlerimiz óte kóp», dep bul suraqqa Arman Áýbákir jaýap berdi.
Shara sońynda aqparattyq-tanymdyq býkletter taratylyp, jastardyń dáristi qanshalyqty túsingenin anyqtaý maqsatynda shaǵyn saýalnama júrgizildi.
M.Keńesbekqyzy.