Jańalyqtar

Quljadan kelgen hat

Sálemetsizder me, Qazaqstan halqy! Meniń atym – Gúljan (Aty ózgertildi). Men Qulja qalasynda turamyn. Jasym 51 de. Meniń sizderge osy jaqta (Shyńjańda) bolyp jatqan jaǵdaılar týraly hat jazǵym kelip tur. Bul hat sizder jaqqa bara ma, joq pa ony bir Qudaı biledi. Biraq nede bolsa baǵymdy synap kórmekpin. Ustalsam «Saıası úırenýge» men de ketemin. Ustalmasam «úırenýde» oqytýshy bolyp júre beremin. Nede bolsa, amandyq tileımin bárińizge! 1 – Munda barlyq júris-turys, telefon, baılanys jasaıtyn ortań barlyǵy baqylaýǵa alynǵan. Ásirese, qazaq bastyqtary men úkimet kadrlarynyń telefondary qatań baqylaýda. (Hatty túsindirýshilerdiń sózine qaraǵanda, áleýmettik jeliler, uıaly telefondar kúndelikti tekserýden ótedi. Onda quran jazýlary nemese Qazaqstan týraly sózder men sýretter bolsa, qazaqy nyshandar, oıý-órnekter bolsa, tóte jazýmen jazylǵan qazaqsha sózder bolsa qatań tekserilip, «Saıası úırený» atty konlagerge jiberiledi eken.) 2-Qazir «týystandyrý» saıasaty (Qytaımen týystasý. Qytaıdyń úıine qazaq, qazaqtyń úıine qytaıdy qondyrý, birge iship-jeý syndy saıasat) alǵashqydaı emes, azaıyp, saıabyrlap qaldy. Buryn bir aıda 15 kún qarsy jaqtyń (qytaıdyń) úıinde memleket qyzmetkerleri jatýǵa mindetti tuǵyn. Qazir bir aıda 2-3 kún ǵana. Tipti keıbiri barmaıtyn da boldy. Tek telefon arqyly habarlasyp, hal surasyp turady. О́ıtkeni, meıli úı turǵyndary bolsyn, kadyrlerdiń ózderi bolsyn bári osyndaı saıası nusqaýdan ábden mezi bolǵan. Qazaqtar bolsa qytaılarǵa «úıge qonbańdar» deıdi. Keıbiri esik aldynan jolyǵyp, úıge kirgizbeı qaıtarǵan. Osyǵan baılanysty halyq arasynda narazylyq aryz-shaǵymdar kóbeıdi. Buǵan deıin áıel qyzmetkerlerdi erkek bar úıge, er qyzmetkerlerdi áıel bar úıge ádeıilep jiberetin. Tipti, aýyldan jyraq taýdaǵy malshylardyń úıine deıin baryp, qonǵan hanzýlar boldy. Qazaq qyzmetkerler bolsa, qynjylǵannan tamaq ta ishpeı, ýaqyttary tolǵanda úıden shyǵyp ketetin kezderi de bolǵan. Sol qyzmetkerlerdiń ózi qazir Shyńjańnyń bas hatshysy – Chyn Chýangony boqtap otyr. 3 – biz shekara aımaqqa jaqyn qala bolsaq ta, qazaq pen uıǵyrdy shekaraǵa jaqyndatpaıdy. Sebep – shekara buzyp, Qazaqstanǵa qashyp ketýimizden qorqady. 4 – Qazaqstanǵa shyǵa alatyn jalǵyz jol bar, ol – Qazaqstanda qaryzym bar deý. Sheteldegi qaryzdy qaıtaryp alyp kelýge vıza ashyp beredi. Áıtpese, Qazaqstanǵa shyǵýdyń basqalaı múmkindigi qalmady. Kelgen hattyń negizgi bóligi osy. Sońǵy jaǵy joǵalyp ketýine baılanysty ári qaraı avtordyń ne aıtpaq bolǵany belgisiz. Bálkim «Saıası úırenýdegi» qazaqtardyń aýyr halyn baıandaǵan da bolar. Nemese, ultty «qytaılandyrý saıasatyn» jıiletip jatqanyn baıan etken de bolar. Qazirge bizdiń qolǵa tıgeni osy. Ult taǵdyry qashan da bizdiń nazarda!