Balanyń azamattyǵy

Bala týǵan kezde ata-anasynyń ekeýi de Qazaqstan Respýblıkasynyń azamaty bolsa, ol týǵan jerine qaramastan Qazaqstan Respýblıkasynyń azamaty bolyp tabylady.

Ata-anasynyń azamattyǵy ártúrli bolǵan jaǵdaıyndaǵy balanyń azamattyǵy

Ata-anasynyń azamattyǵy ártúrli bolyp, bala týǵan kezde olardyń bireýi Qazaqstan Respýblıkasynyń azamaty bolǵan jaǵdaıda bala:

• Qazaqstan Respýblıkasynyń aýmaǵynda týsa;
• Qazaqstan Respýblıkasynan tys jerde týsa, biraq, ata-anasynyń nemese olardyń bireýiniń bul kezde Qazaqstan Respýblıkasy terrıtorııasynda turaqty turǵylyqty jeri bolsa, ol Qazaqstan Respýblıkasynyń azamaty bolyp tabylady.

Ata-anasynyń azamattyǵy ártúrli bolyp, bala týǵan kezde olardyń bireýi Qazaqstan Respýblıkasynyń azamaty bolǵan jaǵdaıda, eger osy kezde ata-anasynyń ekeýiniń de Qazaqstan Respýblıkasynan tys jerde turaqty turǵylyqty jeri bolsa, Qazaqstan Respýblıkasynan tys jerde týǵan balanyń azamattyǵy ata-anasynyń jazbasha túrde bildirgen kelisimi boıynsha anyqtalady.

Bala týǵan kezde ata-anasynyń bireýi Qazaqstan Respýblıkasy azamattyǵynda bolyp, al ekinshisi azamattyǵy joq adam bolsa, ne onyń azamattyǵy belgisiz bolsa, bala qaı jerde týǵanyna qaramastan Qazaqstan Respýblıkasynyń azamaty bolyp tabylady.

Balanyń anasy azamattyǵy joq adam bolyp, al ákesi Qazaqstan Respýblıkasynyń azamaty dep tanylyp, ákeligi anyqtalǵan rette 14 jasqa tolmaǵan bala qaı jerde týǵanyna qaramastan Qazaqstan Respýblıkasynyń azamaty bolady. Bul bala Qazaqstan Respýblıkasynan tys jerlerde turaqty turǵan rette onyń azamattyǵy ata-anasynyń jazbasha aryzy boıynsha anyqtalady.

Ata-analary balanyń azamattyǵy týraly kelisimge  kelmegen jaǵdaıda, azamattyq  sot tártibinde  anyqtalady.

Ata-anasy belgisiz balanyń azamattyǵy

Ata-anasynyń ekeýi de belgisiz Qazaqstan Respýblıkasy terrıtorııasyndaǵy bala Qazaqstan Respýblıkasynyń azamaty bolyp tabylady.

Azamattyǵy joq adamdardyń balasynyń Qazaqstan Respýblıkasy azamattyǵyn alýy

Qazaqstan Respýblıkasynyń aýmaǵynda turaqty turatyn jeri bar, azamattyǵy joq adamdardyń Qazaqstan Respýblıkasynyń aýmaǵynda týǵan balasy Qazaqstan Respýblıkasynyń azamaty bolyp tabylady.