Jańalyqtar
Qazaqstannyń eń úlken týy «Medeýde» ornatyldy
Almatydaǵy Qazaqstannyń eń úlken memlekettik týy «Medeý» muz aıdynynyń mańynda ornatyldy.
Tý kóterý saltanatty rásimine ataqty sportshylar men qalalyq jastar uıymdarynyń ókilderi qatysty.
«Elbasy, «Nur Otan» partııasynyń tóraǵasy Nursultan Ábishuly Nazarbaev bir sózinde: «Biz táýelsizdikke ańsap, zaryǵyp jettik. Endi sol táýelsizdiktiń qasıetti belgilerin de erekshe qadirleýimiz, qasterleýimiz kerek. Árbir azamat Qazaqstannyń týyn, eltańbasyn, ánuranyn tumardaı qasıet tutýy qajet. Eldigimizdiń synalatyn bir tusy – osy», – degen edi. Tuńǵysh prezıdentimizdiń osy naqyl sózin elimizdiń árbir azamaty júrek túkpirinde saqtap, árkez jadynda ustap, oryndaýy qajet. Osyǵan oraı búgin partııanyń muryndyq bolýymen táýelsizdigimizdiń altyn besigi sanalatyn Almaty shaharynda, talaı álemdik rekordtardyń kýási bolǵan «Medeý» muz aıdynynda memlekettik týymyz bıik te berik tuǵyrǵa ornatyldy. Bul ıgi sharanyń sımvoldyq máni, atqarar mańyzy zor. «Nur Otan» partııasynyń doktrınasynda da halqymyzdyń qasıetti qundylyǵy – táýelsizdikke erekshe basymdyq berilgen. Eldigimizdiń aıshyqty belgisi bolǵan kók týymyz árbir úıdiń, árbir uıymnyń tórinde tursa da artyq bolmaıdy. Sondyqtan ulttyǵymyzdy ulyqtaıtyn osyndaı oń bastamaǵa búkil qoǵam bolyp jumylyp, barshańyzdy belsendi qatysýǵa shaqyramyn», – dedi Nur Otan partııasy tóraǵasynyń birinshi orynbasary Baýyrjan Baıbek.
«Eltańbamyz eldik ben erkindikten bastaý alǵan rýhymyzdy aspandatyp, aıbynymyzdy asyra tússin. Áýezdi ánuranymyz máńgi shyrqalyp, arman-ańsarymyzdy kókke samǵata bersin. Baıtaq Otanymyz, qasıetti qazaq eli kún sóngenshe sónbesin. Árqashan kók týymyz kógimizde jelbireı bersin!», — dep sózin túıindedi Baýyrjan Baıbek.
Atap ótsek, týtuǵyr bıiktigi 40 metrdi, al tý kólemi 7 de 14 metrdi quraıdy.
