«نۇرلى جول» باعدارلاماسى: 2020-2025 جىلدارعا جاڭا ماقسات قويىلدى

قر پرەمەر-ءمينيسترى اسقار ءماميننىڭ توراعالىعىمەن وتكەن قر ۇكىمەتىنىڭ سەلەكتورلىق وتىرىسىندا 2015-2019 جىلدارعا ارنالعان «نۇرلى جول» ينفراقۇرىلىمدىق دامۋ مەملەكەتتىك باعدارلاماسىن ىسكە اسىرۋ بارىسى جانە 2020-2025 جىلدارعا ارنالعان جوباسى قارالدى.

بۇل تۋرالى قر ۇكىمەتىنىڭ ءباسپاسوز قىزمەتى حابارلايدى. قر يندۋستريا جانە ينفراقۇرىلىمدىق دامۋ ءمينيسترى ب. اتامقۇلوۆ بايانداما جاسادى, ول 2015-2019 جىلدارعا ارنالعان «نۇرلى جول» مەملەكەتتىك باعدارلاماسى اياسىندا سوڭعى 5 جىلدا كولىك سالاسىن دامىتۋعا شامامەن 5,8 ترلن تەڭگە باعىتتالعانىن ايتتى.
سونىڭ ناتيجەسىندە 400 مىڭنان استام جۇمىس ورنى قۇرىلدى, ءجىو-دەگى كولىك ۇلەسى 8,3%-عا دەيىن ءوستى, ەڭبەك ونىمدىلىگى – 1,7 ەسەگە, كونتەينەرلەردىڭ جالپى ءترانزيتى – جيىرما فۋتتىق بالامادا 271 مىڭنان 825 مىڭ كونتەينەرگە دەيىن 3 ەسە, ترانزيتتەن تۇسەتىن كىرىستەر – 4,3 ەسە, 180 ملرد تەڭگەدەن 782,4 ملرد تەڭگەگە دەيىن, جۇك تاسىمالدارى ءترانزيتىنىڭ كولەمى ءبىر جارىم ەسەگە, 1,3 ملن-نان 1,8 ملن تونناعا دەيىن, ترانزيتتىك اۆياجولاۋشىلار سانى 4 ەسەگە, شامامەن 1 ملن ترانزيتتىك جولاۋشىعا دەيىن ارتتى.
3 مىڭ شاقىرىم رەسپۋبليكالىق ماڭىزى بار اۆتوموبيل جولدارى سالىنىپ, رەكونسترۋكتسيالاندى, 15 مىڭ شاقىرىم وبلىستىق جانە اۋداندىق ماڭىزى بار اۆتوموبيل جولدارى جوندەلدى, 1,4 مىڭ شاقىرىم جاڭا تەمىر جول پايدالانۋعا بەرىلدى, ورال, پەتروپاۆل, الماتى, سەمەي, قوستاناي, بالقاش اۋەجايلارىندا 6 ۇشۋ-قونۋ جولاعى جاڭعىرتىلدى.
قىتايمەن شەكاراداعى تەرمينالداردىڭ وتكىزۋ قابىلەتى جىلىنا 40 ملن تونناعا دەيىن ۇلعايتىلدى. اقتاۋ پورتىن كەڭەيتۋ جانە قۇرىق پورتىنىڭ سالىنۋى ەسەبىنەن كاسپيدەگى پورت ينفراقۇرىلىمىنىڭ قۋاتتىلىعى جىلىنا 17,5 ملن-نان 27 ملن تونناعا دەيىن ۇلعايتىلدى. ينجەنەرلىك جەلىلەردىڭ ۇزىندىعى 3,4 مىڭ شاقىرىمدى قۇرادى.
«نۇرلى جول» باعدارلاماسى جۇزەگە اسىرىلا باستاعاننان بەرى ىشكى سۋ جولدارىمەن جۇك تاسىمالداۋ كولەمى 86%-عا – 750 مىڭ توننادان 1,4 ملن تونناعا دەيىن ءوستى, ەرتىس وزەنى بويىنشا وتپەلى كەمە قاتىناسى قالپىنا كەلتىرىلدى جانە كەمە جۇزەتىن سۋ جولدارىنىڭ ساپاسى جاقساردى.
«تۇراقتى كولىكتىك-لوگيستيكالىق جۇيە قالىپتاستى. سونىڭ ناتيجەسىندە قازاقستان ەۋروپا مەن ازيا اراسىنداعى ترانسكونتينەنتالدى كوپىرگە اينالدى. ەلباسىنىڭ ايماقتىق كولىكتىك-لوگيستيكالىق حاب قۇرۋ جانە ەلىمىزدىڭ ترانزيتتىك الەۋەتىن دامىتۋ جونىندەگى مىندەتتەرى بەلسەندى جۇزەگە اسىرىلۋ ساتىسىندا», — دەدى ا. مامين.
2025 جىلعا دەيىنگى جاڭا مەملەكەتتىك باعدارلامانى قارجىلاندىرۋدىڭ جالپى كولەمى 6,598 ترلن تەڭگەنى قۇرايدى. اۆتوجول ينفراقۇرىلىمىن دامىتۋ اياسىندا رەسپۋبليكالىق جەلىنىڭ 10 مىڭ شاقىرىم جولىن رەكونسترۋكتسيالاۋ جانە 11 مىڭ شاقىرىمىن جوندەۋ, 27 مىڭ شاقىرىم جەرگىلىكتى جەلى جولىن جوندەۋ جوسپارلانعان.
تەمىر جول سالاسىندا «دوستىق – مويىنتى» ۋچاسكەسىن جاڭعىرتۋ جانە «مويىنتى – اقتوعاي» ۋچاسكەسىن ەلەكترلەندىرۋ كوزدەلگەن. شاعىن اۋە جەلىلەرىن دامىتۋ ماقساتىندا 16 اەرودروم سالۋ جوسپارلانعان. اۆتوموبيل كولىگى سالاسىنداعى ۇلتتىق ستاندارتقا سايكەستەندىرۋ ماقساتىندا شامامەن 133 اۆتوستانتسيا/ۆوكزال جانە جولاۋشىلارعا قىزمەت كورسەتۋ پۋنكتەرىن سالۋ جانە جاڭعىرتۋ جوسپارلانعان.
جالپى, «نۇرلى جول» جاڭا مەملەكەتتىك باعدارلاماسىن ىسكە اسىرۋ 551 مىڭ جۇمىس ورنىن قۇرۋعا مۇمكىندىك بەرەدى, ونىڭ 48,5 مىڭى – تۇراقتى جانە 502,2 مىڭى – ۋاقىتشا, كولىك سالاسىنىڭ نەگىزگى كاپيتالىنا سالىنعان ينۆەستيتسيالار كولەمىن 1,1-دەن 3,4 ترلن تەڭگەگە دەيىن 3 ەسە, تەمىر جول كولىگىندەگى ترانزيت كولەمىن – 18,1 ملن-نان 26,9 ملن تونناعا دەيىن, اۆتوموبيل كولىگىمەن جىلىنا 1,6 ملن-نان 3 ملن تونناعا دەيىن ۇلعايتۋعا جول اشادى.
«ەلباسى «Nur Otan» فراكتسياسىنىڭ جاقىندا وتكەن وتىرىسىندا اتاپ وتكەندەي, «نۇرلى جول» باعدارلاماسىنىڭ جاڭا بەس جىلدىعى ەلىمىزدىڭ كولىك ينفراقۇرىلىمى مەن ترانزيتتىك الەۋەتىن ودان ءارى دامىتۋعا باعىتتالعان نەگىزگى مەملەكەتتىك باعدارلامالاردىڭ ءبىرى», — دەدى ا. مامين.

دەرەككوز: https://www.inform.kz/kz/nurly-zhol-bagdarlamasy-2020-2025-zhyldarga-zhana-maksat-koyyldy_a3577778