جاڭالىقتار

قازاقستان مەن قىتاي قارىم-قاتىناسىنىڭ جاڭا مۇمكىندىكتەرىنە جول اشىلدى – قحر ەلشىسى

قىتاي حالىق رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى چجان سياو قازاقستان مەن قىتاي قارىم-قاتىناسى جونىندە پىكىر ءبىلدىردى.

«2019 جىلى قىتاي حالىق رەسپۋبليكاسىنىڭ قۇرىلعانىنا 70 جىل تولدى.

70 جىل – تاريحي ولشەمنىڭ ءبىر بولىگى عانا, بىراق بۇل ارالىقتا قىتايلار ماقتان ەتۋگە تۇرارلىق جەتىستىكتەرگە جەتتى. 70 جىل بۇرىن قىتاي تەحنولوگيالىق تۇرعىدا ارتتا قالعان, ءوندىرىسى دامىماعان مەملەكەت بولدى.

ال قازىر دامىعان ەكونوميكاسى بار, اۆتوكولىكتەن اسكەري تەحنيكاعا دەيىن شىعاراتىن ۇلكەن قۋاتتى ەلگە اينالدى», — دەدى چجان سياو قر مەملەكەتتىك باسقارۋ اكادەمياسىندا «قازاقستاننىڭ شىعىس كورشىسى. قىتايدىڭ قارقىندى دامۋى كۋاگەرلەر كوزىمەن» كونفەرەنتسياسىندا.

ەلشى قازاقستان مەن قىتاي اراسىنداعى ەكىجاقتى قارىم-قاتىناست ى دامىتۋ ماسەلەسىنىڭ وزەكتىلىگىن اتاپ ءوتتى.

«بيىل قازاقستان مەن قىتاي قارىم-قاتىناسى ەرەكشە قارقىندا دامىدى. ءساۋىر ايىندا «حالىقارالىق ىنتىماقتاستىق. ءبىر بەلدەۋ – ءبىر جول» فورۋمىندا قحر توراعاسى سي تسزينپين تۇڭعىش پرەزيدەنت – ەلباسى نۇرسۇلتان نازارباەۆتى دوستىق وردەنىمەن ماراپاتتادى. جاقىندا عانا قازاقستان پرەزيدەنتى قاسىم-جومارت توقاەۆ قىتايعا العاشقى مەملەكەتتىك ساپارىن تابىستى وتكىزدى. ەكى ەل باسشىلارى قارىم-قاتىناسىمىزدى جان-جاقتى ستراتەگيالىق سەرىكتەستىك دەڭگەيىنە شىعارۋدى ۇيعاردى. بۇل جاڭا مارتەبە ءوزارا ارەكەتتەستىكتىڭ جاڭا مۇمكىندىكتەرىنە جول اشادى. ەندى 55 يندۋستريالدى, ينۆەستيتسيالىق جوبانى جۇزەگە اسىرۋدان بولەك, ۇلكەن دەرەكتەر, جاساندى ينتەللەكت, تەلەكوممۋنيكاتسيا, بلوكچەين, تسيفرلاندىرۋ سىندى سالالاردا جوعارى تەحنولوگيالىق ىنتىماقتاستىقتى دامىتا تۇسەمىز», — دەدى ەلشى.

سونىمەن بىرگە, ديپلومات قىتايدىڭ ەكى ەل اراسىنداعى ماڭگىلىك دوستىق قارىم-قاتىناستى قالايتىنىن جەتكىزدى.

«بۇگىنگى سوزىمدە ءبىر ماسەلەنى ناقتى ايتقىم كەلەدى – قىتايلاردا وتارلاۋشىلىق پيعىل جوق جانە بولماعان دا. بۇعان كوز جەتكىزۋ ءۇشىن وتكەنگە كوز جۇگىرتۋگە بولادى. 15 عاسىردا ءوزىنىڭ تەڭىز فلوتى بار, ەڭ قۋاتتى مەملەكەت بولعان قىتاي 7 اۋقىمدى ءجۇزۋ ۇيىمداستىرىپ, وڭتۇستىك ۇندىستانعا, پارسى شىعاناعىنا دەيىن جەتكەن. ءبىزدىڭ بابالارىمىز شاي, فارفور, جىبەك اپارىپ, تاۋار الماسىپ, سۋ بەتىندەگى جىبەك جولىن قۇردى. بارلىق جەتى ساپار دا ەش شيەلەنىسسىز, سوعىسسىز, جەرگىلىكتى حالىقتى ولتىرمەي, بەيبىت تۇردە جۇرگىزىلگەن. بۇل ساپارلار قىتايعا ساياسي, ساۋدا جانە ەكونوميكالىق بايلانىس ورناتۋعا مۇمكىندىك بەردى. ودان قىتايدىڭ جەر اۋماعى كەڭەيىپ كەتكەن جوق, وتارلىق رەجيم ورناعان جوق», — دەپ ءوز ءسوزىن تۇيىندەدى چجان سياو.

دەرەككوز: inform.kz

وسى ايداردا

دوباۆيت كوممەنتاري

Close