Jemqorlardy shartty túrde merziminen buryn bosatýǵa tyıym salynbaq

Qazaqstanda jemqorlardyń túrmeden shartty túrde merziminen buryn bosap shyǵýyna tyıym salynbaq. Bul týraly búgin QR Sybaılas jemqorlyqqa qarsy is-qımyl agenttiginiń alqa májilisinde vedomstvo basshysy Alık Shpekbaev aıtty, dep habarlaıdy QazAqparat tilshisi.

«Joǵarǵy sottyń sot korpýsyn «tazalaý« máselesindegi belsendiligin eskere otyryp biz birlesken kúsh-jigerimizben femıda qyzmetkerlerin áshkereleımiz. Osy jyldyń ózinde beseýi sottaldy. Osyǵan oraı, agenttik quqyq qorǵaý organdary qyzmetkerleri men sýdıalardyń jemqorlyq úshin jaýapkershiligin kúsheıtýge bastamashylyq jasady. Sonymen qatar, aýyr jáne asa aýyr jemqorlyq qylmystar boıynsha shartty túrde merziminen buryn bosatýdy qoldanýǵa shekteý usynyldy», — dedi agenttik tóraǵasy.

A.Shpekbaevtyń aıtýynsha, sońǵy úsh jylda keshendi aldyn-alý sharalarynyń nátıjesinde sybaılas jemqorlyq quqyq buzýshylyqtardyń sany 14 paıyzǵa azaıǵan. Qylmystyń negizgi bóligi – paraqorlyq (850), urlyq (714) jáne bılikti asyra paıdalaný (224) faktileri. Jyl basynan beri 1028 tulǵa áshkerlendi, onyń 23-i respýblıkalyq jáne 86-y oblystyq deńgeıdegi basshylar. «Keltirilgen zalaldyń mólsheri edáýir artty – 23,2 mlrd teńge. Bul ótken jylmen salystyrǵanda 1,7 esege kóp. Onyń 94 paıyzy óteldi», — dedi A.Shpekbaev.