Almatyda 61 otbasynyń kommýnaldyq bereshekteri keshirildi

Ár azamattyń qaryzynyń kólemine qaraı 20 myńnan 200 myńǵa deıingi bereshekteri joıyldy. Jalpy keshirilgen qaryzdyń kólemi — 5 mıllıon 600 myń teńge.

Almaty qalasy Áýezov aýdanyynda jylýǵa, aýyz sýǵa jáne jaryqqa jınalyp qalǵan bereshegi bar 61 áleýmettik jaǵynan az qamtylǵan otbasynyń qaryzy keshirildi, dep habarlaıdy Zakon.kz Almaty.tv-ge silteme jasap.

Búgin aýdandaǵy 61 áleýmettik az qamtylǵan otbasy, onyń ishinde januıada múgedek adamy bar, jalǵyzbasty ana jáne jaǵdaıy tómen azamattardyń páter ıeleri kooperatıvi aldyndaǵy qaryzdary keshirildi.

«Búgingi kúni bizge 200 myń teńge kómek kórsetken «Nur Otan» partııasyna rahmet», — dedi kópbalaly ana Baǵdatgúl KО́PESOVA.

«Jaǵdaıymyz tómen bolǵannan soń, qaryzymdy tóleı almadym. Qazir eki múgedek balama qaraımyn. Jumys isteımin. Biraq ol jetkiliksiz», — dedi kópbalaly ana Aıjan DÝLATOVA.

Jalpy keshirilgen qaryzdyń kólemi — 5 mıllıon 600 myń teńge. Jaýaptylardyń sózinshe, turǵyndar atalǵan somany tóleı almaıtyndaryn aıtyp aýdandyq «Nur Otan» partııasyna ótinish jazǵan. Sodan keıin, partııa páter ıeleri kooperatıvi tóraǵalaryna áleýmettik álsiz toptardy qaryzdarynan keshirýdi usynǵan eken. Ár azamattyń qaryzynyń kólemine qaraı 20 myńnan 200 myńǵa deıingi bereshekteri joıyldy.

«Qaryzdardy qaıtarý úshin ártúrli shara qoldanyp jatyrmyz. Bul jumys ary qaraı jalǵasady. Kelesi kezdesýimiz osy azamattarmen turǵyn úı máselesi boıynsha bolady. Qalaı kezekke turý, qandaı qujat kerek? Jáne kim kezekke tura alady. Álde, bolmasa osy Almaty qalasynda páterge ıe bola alady degendeı máselelerdi túsindiremiz», — dedi Almaty qalasy Nur Otan partııasy áýezov aýdanyq fılıalynyń tóraǵasy, Áýezov aýdanynyń ákimi Saıran SAIFEDENOV.