«سەرگەك» جول بەلگىسىن ەلەمەيتىن جۇك كولىكتەرىنە اۆتوماتتى تۇردە ايىپپۇل سالادى

ەلوردادا ءۇشىنشى جولاققا شىعىپ الاتىن جۇك كولىكتەرىنىڭ جۇرگىزۋشىلەرىنە اكىمشىلىك ايىپپۇل سالىنادى, دەپ حابارلايدى قازاقپارات قالالىق پوليتسيا دەپارتامەنتىنىڭ Facebook-تەگى پاراقشاسىنا سىلتەمە جاساپ.
نۇر-سۇلتان قالاسى جەرگىلىكتى پوليتسياسىنىڭ اكىمشىلىك پوليتسيا باسقارماسىنىڭ ەسكەرتۋىنشە, «سەرگەك» سەرتيفيكاتتالعان قۇرالى كولىك جۇرگىزۋشىلەرىنىڭ جول بەلگىلەرى ەلەمەي, ەرەجەنى بۇزعانىن انىقتايدى.
«جول قوزعالىسى ەرەجەلەرىنە سايكەس ارتىق جۇك تيەۋگە بايلانىستى ءجيى قاۋىپ توندىرەتىن كوپ جۇك تاسيتىن كولىك قۇرالدارى جۇرگىزۋشىلەرىنىڭ ەكىنشى جولاقتان ء(ۇش جانە ودان دا كوپ جولاقتى قوزعالىستى ەسكەرە وتىرىپ) ودان ءارى وتۋگە قۇقىعى جوق. اتالعان ءتارتىپتى بۇزعانى ءۇشىن كوپ جۇك تاسيتىن كولىك جۇرگىزۋشىلەرىنە اكىمشىلىك ايىپپۇل تولەۋ تۋرالى نۇسقامالار جولداناتىن بولادى», — دەلىنگەن حابارلامادا.
ايتا كەتەرلىگى, ءۇشىنشى جولاققا تەك بۇرىلۋ نەمەسە سولعا بۇرىلىپ, كەرى باعىتقا قايتۋ ءۇشىن شىعاتىن جۇك كولىكتەرىنە رۇقسات ەتىلگەن. وسى تالاپتى ساقتاماعان كولىكتى «سەرگەك» كامەرالارى اۆتوماتتى تۇردە انىقتايدى, جۇرگىزۋشىگە اكىمشىلىك قۇقىق بۇزۋشىلىق تۋرالى كودەكستىڭ 601-بابى, 1-بولىگى بويىنشا 3 اەك مولشەرىندە ايىپپۇل سالىنعانى جونىندە قۇجات جىبەرىلەدى.
ەسكە سالا كەتسەك, بۇعان دەيىن نۇر-سۇلتان قالاسىنىڭ اكىمدىگىندە وتكەن ەلوردانى دامىتۋ ماسەلەلەرى جونىندەگى ماجىلىستە «سەرگەك» جوباسى قوعامدىق قاۋىپسىزدىكتى ارتتىرۋ ءۇشىن تولىق كولەمدە پايدالانىلماي وتىرعانى ايتىلعان بولاتىن.