WhatsApp birjola qara tizimge engizýdi qolǵa aldy

WhatsApp ataýy kúmándi toptarǵa kirgen adamdardy buǵattaýdy bastady. Olar endi messendjerdi paıdalaný úshin basqa nómirmen qaıta tirkelýi kerek, dep jazady Business today.

WhatsApp jaqynda toptarǵa kirý talaptaryn ózgertip, topqa tirkelý tańdaýyn paıdalanýshynyń ózine qaldyrǵan edi. Al endi messendjer kúmándi ataýǵa ıe toptarǵa múshe adamdardy ómir boıyna buǵattady.

WhatsApp-tyń paıdalanýshylardy buǵattaǵany týraly aqparat áleýmettik jelilerde paıda bola bastady. Olardyń barlyǵy óz akkaýnttarynyń eshqandaı aldyn ala aqparatsyz buǵattalyp, qaıta qalpyna keltirilmeıtindeı bolyp qara tizimge engenin aıtyp jatyr.

Reddit, Mowe11 esimdi paıdalanýshy top ataýyn qorlaıtyn sózge aýystyrǵandyqtan bandalǵanyn jazdy. Onyń aıtýynsha, top ataýyn ózgertkennen keıin toptaǵy adamdardyń barlyǵy buǵattalǵan.

Budan ózge de paıdalanýshylar júzden astam adam kirgen toptardyń ataýy bir mınýtqa aýystyrylsa da, top músheleriniń qara tizimge engizilgenin aıtyp jatyr. Al WatsApp ázirge bul jańalyqqa qatysty eshqandaı málimdeme jasamady jáne qandaı top músheleriniń buǵattalatynyn túsindirmedi.

Derekkóz: QazAqparat