ەلباسى پۋتين مەن زەلەنسكيدى قازاقستاندا كەزدەسۋگە شاقىردى

رەسەي مەن ۋكراينانىڭ اراسىنداعى جاعداي قىنجىلتاتىنى جاسىرىن ەمەس. ولار ءبىر-بىرىنە وتە تۋىس ەلدەر. امال جوق, بولارى بولىپ, بوياۋى ءسىڭدى. بۇل ماسەلە ىشكى جانە سىرتقى كۇشتەر ارالاسىپ كەتتى. ەكى ەلدىڭ اراسىنداعى قارىم-قاتىناس قاتتى الشاقتاعانى بارشاعا ءمالىم. ۋكراينا مەن رەسەيدى وتە جاقسى بىلەمىن. العاشقى كۇندەردەن باستاپ-اق ەكى ەلدى تاتۋلاستىرۋعا تىرىسىپ كەلەمىن, — دەدى نۇرسۇلتان نازارباەۆ.

ول جاقىندا ۋكراينا پرەزيدەنتى ۆلاديمير زەلەنسكيمەن كەزدەسكەنىن, ال كەشە رەسەي فەدەراتسياسىنىڭ پرەزيدەنتى ۆلاديمير پۋتينمەن تەلەفون ارقىلى سويلەسكەنىن ايتتى.

ۆلاديمير پۋتينمەن سويلەسكەنىمدە, بۇل ماسەلەنى قالاي شەشۋگە بولاتىنىن تالقىلادىق. ۋكراينا ەۋروپا ەلدەرى مەن اقش-قا اپپەلياتسيامەن شىققان. بۇدان ءارى جاعدايدى ۋشىقتىرا بەرمەۋ ءۇشىن ەكى ەل پرەزيدەنتتەرىن جەكە كەزدەستىرۋ كەرەك. سول كەزدە  عانا كەلىسۋگە بولادى. ايتپەسە, قيىن. ءدال قازىر ءساتى كەلىپ تۇر دەپ سانايمىن. زەلەنسكي بيىل سايلاۋدا حالىقتىڭ قولداۋىنا يە بولدى. جوعارى راداعا دا زەلەنسكي جاقتاستارى ءوتتى. بۇل ماسەلەنى شەشۋ ونىڭ قولىنان كەلەدى. ەكى جاق دايىن بولسا, كەزدەستىرۋ ۇيىمداستىرىپ, بۇل ماسەلەنى العا جىلجىتۋ كەرەك, — دەدى ەلباسى.