Álem jańalyqtaryJańalyqtar
Qazaqstan elshisi Mońǵolııadaǵy qazaq dıasporasymen kezdesti
6-8 qarashada Mońǵolııadaǵy Qazaqstannyń elshisi Jalǵas Ádilbaev qazaq dıasporasy shoǵyrlanǵan Baıan-О́lgıı aımaǵyna is-saparmen bardy. Bul týraly QR SIM baspasóz qyzmeti habarlady.
Is-sapar barysynda elshi aımaq ákimi A.Ǵylymhan, máslıhat tóraǵasy D.Baýyrjan, qazaq dıasporasynyń ókilderi jáne basqa da resmı tulǵalarmen kezdesýleri ótti.
Kezdesý barysynda elshi Qazaqstannyń qazirgi saıası jáne ekonomıkalyq jaǵdaıyn túsindirip, suhbattastaryn QR prezıdenti Qasym-Jomart Toqaevtyń «Syndarly qoǵamdyq dıalog – Qazaqstannyń turaqtylyǵy men órkendeýiniń negizi» atty joldaýynda kórsetilgen eldiń odan ári damý maqsattary men mindetteri, QR Tuńǵysh prezıdenti – Elbasy Nursultan Nazarbaevtyń jahandyq bastamalarymen tanystyrdy.
Sonymen qatar, elshi Mońǵolııanyń premer-mınıstri Ýhnaagıın Húrelsúhtyń Qazaqstanǵa jasaǵan resmı saparynyń qorytyndysyna toqtalyp, sapar barysynda saýda-ekonomıkalyq, kóliktik-tranzıttik, aýyl sharýashylyq, taý-ken óndirisi jáne mádenı-gýmanıtarlyq salalaryndaǵy yntymaqtastyqty odan ári damytý máseleleri talqylanǵanyn aıtty.
J.Ádilbaev qazaq dıasporasyn 2020 jyly Abaıdyń 175 jyldyq, Ábý Nasyr ál-Farabıdiń 1150 jyldyq jáne Altyn Ordanyń 750 jyldyq mereıtoılaryna arnalatyn is-sharalarǵa belsendi qatysýǵa shaqyrdy.
«Rýhanı jańǵyrý» baǵdarlamasy sheńberinde J.Ádilbaev Baıan-О́lgıı aımaǵynyń birqatar orta mektepterine baryp, sheteldegi etnıkalyq qazaqtardy qoldaý maqsatynda QR Úkimeti jibergen oqýlyqtar men oqý quraldaryn saltanatty túrde tabys etti. Elshi О́lgıı qalasy Qazaqstannyń mádenıeti jáne ádebıeti ortalyǵynyń qyzmetimen tanysyp, Ortalyqtyń qoryna qazaqstandyq jazýshylar men aqyndardyń qazaq jáne aǵylshyn tilderindegi kitaptaryn syıǵa tartty, sondaı-aq jergilikti basqarýshy organdarynyń ókilderimen Mońǵolııada Abaı ortalyǵyn ashý máselesin talqylady.
Sapar barysynda dıplomatııalyq ókilditiń basshysy «Qazaqstan» qalashyǵyndaǵy obektileriniń qurylys jumystarymen tanysty.
