قازاق قىزى كونە موڭعول جازۋىن وقۋ بايقاۋىندا باس جۇلدەگە يە بولدى

بۇل تۋرالى جەرگىلىكتى مونتسامە اگەنتتىگى حابارلادى.

ۇلانباتىر قالاسىنداعى ورتالىق بالالار كىتاپحاناسىندا وتكەن سايىستا بايان-ولگي ايماعىنداعى №5 ورتا مەكتەبىنىڭ 9-سىنىپ وقۋشىسى ج.ساياجان باس جۇلدەنى جەڭىپ الدى.

«ۇلتتىق جازۋ مادەنيەتى» سايىسى وسىمەن 13-رەت ۇيىمداستىرىلىپ وتىر. بۇل بايقاۋعا جەرگىلىكتى سىنالتۋدان الدىنعى ورىن العان وقۋشىلار قاتىسادى. وتكەن ايدا بايان-ولگي ايماعىنان ۇزدىك شىققان ءۇش وقۋشى رەسپۋبليكالىق بايقاۋعا جولداما العان بولاتىن. الايدا ساياجاننان باسقا ەكى وقۋشى ۇلانباتىردا وتكەن سايىستا ورىن يەلەنگەن جوق.

كونە موڭعول جازۋىن دارىپتەۋ, ونىڭ بۇگىنگى قولدانۋ اياسىن كەڭەيتۋ ماقساتىندا ۇيىمداستىرىلعان سايىسقا ۇلانباتىر قالاسىنىڭ 9 اۋداناننىڭ جانە 13 ايماقتىڭ بارلىق مەكتەبىنىڭ 6-12-سىنىبىنىڭ 216 وقۋشىسى قاتىسقان. ج.ساياجان وسى وقۋشىلاردىڭ اراسىندا ۇزدىك اتاندى.

1991 جىلدان باستاپ موڭعوليانىڭ جالپى ءبىلىم بەرەتىن مەكتەپتەرىندە جەكە ءپان رەتىندە وقىتىلىپ كەلە جاتقان, بارلىعى 28 ارىپتەن تۇراتىن كونە موڭعول جازۋى جوعارىدان تومەن قاراي وقىلادى.

تاريحي دەرەكتەر بويىنشا, كونە موڭعول جازۋىن كەزىندە موڭعول اسكەرى تۇتقىنداعان نايمان مەملەكەتىنىڭ تايان حانىنىڭ حاتشىسى تاتاتۋڭعا شىڭعىس حاننىڭ بۇيرىعىمەن ۇيعىر ءارىپىنىڭ نەگىزىندە جاساپ شىعارعان. ورتا عاسىردا دۇنيەگە كەلگەن «قۇپيا شەجىرە», «التىن شەجىرە», «قازىنالار قورى», ءبۋدديزمنىڭ قاسيەتتى كىتاپتارى «گانجۋر» مەن «دانجۋر» ءتارىزدى ەڭبەكتەر كونە موڭعول تىلىندە وسى جازۋمەن جازىلعان.