ق.توقاەۆ قىتايلىق كومپانياعا قازاقستاندىق جۇمىسشىلاردىڭ جالاقىسىن كوتەرۋدى مىندەتتەدى

مەملەكەت باسشىسى «CNPC» كورپوراتسياسى ديرەكتورلار كەڭەسىنىڭ توراعاسى ۆان ءيليندى قابىلدادى, دەپ حابارلايدى «حابار 24».

پرەزيدەنت كومپانيا باسشىلىعىنا قازاقستاندىق جۇمىسشىلاردىڭ جالاقىسىن كوتەرۋگە, ولاردىڭ ايلىعىن شەتەلدىك جۇمىسشىلارعا تولەنەتىن ەڭبەكاقى دەڭگەيىمەن تەڭەستىرۋگە قاتىستى بىرقاتار مىندەت جۇكتەدى. سونداي-اق تاۋار ساتىپ الۋ جانە قىزمەت كورسەتۋ ىسىندە قازاقستاندىق ءونىمنىڭ ۇلەسىن ارتتىرۋ كەرەكتىگىن ايتتى.

قاسىم-جومارت توقاەۆ قازاق-قىتاي اراسىنداعى تاتۋ قارىم-قاتىناستاردىڭ قارقىندى دامىپ كەلە جاتقانىن تىلگە تيەك ەتىپ, ەلىمىزدىڭ الەۋمەتتىك-ەكونوميكالىق ورلەۋىنە «CNPC» كومپانياسىنىڭ قوسقان ۇلەسىن جوعارى باعالادى.

ءوز كەزەگىندە ۆان يلين مەملەكەت باسشىسىنا قولداۋ كورسەتكەنى ءۇشىن العىس ايتىپ, كومپانيا الدىنا قويىلعان مىندەتتەرگە تۇسىنىستىكپەن قارايتىنىن جەتكىزدى.

قاسىم-جومارت توقاەۆ, قازاقستان رەسپۋبليكاسىنىڭ پرەزيدەنتى:

– ۆان يلين مىرزا, ەلىمىزگە قوش كەلدىڭىز! كومپانيالارىڭىز وتە تانىمال. ءبىز ونى جاقسى بىلەمىز. قازاقستاندىق نارىققا ءبىرىنشى بولىپ كەلگەن كومپانيالاردىڭ ءبىرى. ەلدەرىڭىزگە جاساعان مەملەكەتتىك ساپارىم كەزىندە قىتاي حالىق رەسپۋبليكاسىنىڭ توراعاسى سي تسزينپين مىرزامەن كەلسسىوودەر جۇرگىزدىم. ءبىز دەكلاراتسياعا قول قويدىق. قازاقستان مەن قىتاي ستراتەگيالىق سەرىكتەستىك ەلدەر ەكەنى ءمالىم. بۇل باعىتتاعى ارىپتەستىك جالعاسادى. «CNPC» كومپانياسى مۇناي ءوندىرۋ, وڭدەۋ, كومىرسۋتەگىن تاسىمالداۋ سالالارىندا ەڭبەك ەتەدى. ءسىزدىڭ كورپوراتسيا جۇزەگە اسىرىپ جاتقان جوبالار قازاقستان ەكونوميكاسىندا اسا ماڭىزدى ءرول اتقارادى.

ۆان يلين, «CNPC» كورپوراتسياسى ديرەكتورلار كەڭەسىنىڭ توراعاسى:

– قۇرمەتتى پرەزيدەنت! كەزدەسۋگە ۋاقىت بولگەنىڭىز ءۇشىن ريزاشىلىعىمدى بىلدىرەمىن. قازاقستانمەن ارىپتەس بولىپ, جۇمىس ىستەۋىمىزگە مۇمكىندىك بەرگەنىڭىز ءۇشىن سىزگە «CNPC» كومپانياسىنىڭ اتىنان العىسىمدى ايتقىم كەلەدى. قىتايلىق كومپانيادا جۇمىس ىستەيتىن قازاقستاندىقتاردىڭ جالاقىسىن كوتەرۋگە, ولاردىڭ ايلىعىن شەتەلدىكتەرمەن تەڭەستىرۋگە تىكەلەي اقتوبە وبلىسىنىڭ اكىمى دە مىندەتتى بولماق. بۇل ماسەلەلەر ەكى جاقتى كەلىسسوزدەر نەگىزىندە شەشىلۋى ءتيىس.

وڭداسىن ورازالين, اقتوبە وبلىسىنىڭ اكىمى:

– مەملەكەت باسشىسىنىڭ قويعان تالابى, بەرگەن تاپسىرماسى وسى جۋىق ارادا كەلىسسوز ارقىلى جەرگىلىكتى تۇرعىنداردىڭ, ياعني اكتسيونەرلىك قوعامدا ىستەپ جاتقانداردىڭ ايلىقتارىن كوبەيتۋ. سونىمەن قاتار قازاقستاندىق مەكەمەلەردىڭ قىزمەتى مەن ۇلەسىن, تاۋار وتكىزۋدىڭ كولەمىن ۇلعايتۋ.