جاڭالىقتار
زەينەتاقى جيناعىن كىمدەر باسپانا ساتىپ الۋعا جۇمساي الادى
قازاقستاندىقتاردىڭ زەينەتاقى جيناعىن باسپانا ساتىپ الۋعا بەرۋ ماسەلەسى ءالى تالقىلانىپ جاتىر. بۇل تۋرالى بۇگىن ۇكىمەت ۇيىندەگى ءباسپاسوز ءماسليحاتىندا «قازاقستاننىڭ تۇرعىنۇيقۇرىلىسجيناقبانكى» اق باسقارماسىنىڭ توراعاسى ءلاززات يبراگيموۆا ايتتى, دەپ حابارلايدى قازاقپارات تىلشىسى.
«قازىرگى ۋاقىتتا قازاقستاننىڭ قارجىگەرلەر قاۋىمداستىعىنىڭ بازاسىندا ۇلتتىق بانكپەن بىرگە زەينەتاقى جيناقتارىن پايدالانۋ بويىنشا تىعىز جۇمىس ىستەپ جاتىرمىز. ستاتيستيكانى زەردەلەۋدەمىز. وكىنىشكە وراي, ول رەسپۋبليكالىق بيۋدجەتتەن تولەنەتىن الەۋمەتتىك زەينەتاقى كولەمى جىل سايىن بەلسەندى ءوسىپ كەلە جاتقانىن كورسەتتى», – دەدى ول.
ونىڭ اتاپ وتۋىنشە, ازاماتتار زەينەتكە شىققاننان كەيىن زەينەتاقى جيناقتارىن پايدالانۋ ءۇشىن جالاقىنىڭ 70 پايىز كولەمىندە زەينەتاقى الۋعا مۇمكىندىك بەرەتىن جيناعى بولۋى ءتيىس.
«مۇنداي زەينەتاقى جيناعى بار سالىمشىلاردىڭ سانى از. سوندىقتان قازىرگى ۋاقىتتا تالقىلانىپ جاتقان تەتىك جيناعىنىڭ جەتكىلىكتى كولەمى بار ازداعان عانا سالىمشىعا قاتىستى بولماق», – دەدى بانك توراعاسى.
ل.يبراگيموۆانىڭ اتاپ وتۋىنشە, بۇل ماسەلەگە قاتىستى شەشىم جىلدىڭ سوڭىنا قاراي ازىرلەنەتىن بولادى.
«ەگەر قازىر بارلىق قازاقستاندىققا زەينەتاقى جيناعىن جۇمساۋعا رۇقسات بەرەتىن بولساق, وندا 15-20 جىلدان كەيىن بيلىككە مەملەكەتتىك بيۋدجەتتەن زەينەتاقى تولەمدەرىنە تاعى دا اقشا سۇراۋىنا تۋرا كەلەدى»,- دەدى ول.
