Almatyda «Qyrmanbaıdyń toıy» dúrkirep ótti

Keshe ákem teatrda tóı ótti. Dúrkirep ótti. Olaı deıtin de sebebimiz bar. Teatr kórermenderi qoıylym bitkenshe kúlkige qaryq bolsa, qoıylym sońynda sheksiz qoshametin bildirdi. Zal lyq toly. Kórermen «toıdan» qaıtqysy joq…

Bul M.Áýezov atyndaǵy Qazaq Memlekettik Akademııalyq drama teatrynyń sahnasyna araǵa 5 jyl salyp qaıta oralǵan «Bes boıdaqqa bir toı» qoıylymnan kórgenimiz. Tynymbaı Nurmaǵanbetovtyń komedııasyn zamanaýı nusqada qaıta alyp shyqqan teatr ujymy kópshilikti kúldire otyryp oılandyrdy, tolǵandyrdy. Qyrmanbaı obrazy arqyly ata-ana qadiri, bala úshin jan pıda áke ómiri jastarǵa ózgeshe oı tastady. Týra osy ákem teatrdaǵy «Otyz ulyń bolǵanshanyń» keri… Bes bala úshin bárin isteýge daıyn ákege «kempiriniń» de orny erek ekeni jetkizildi. Árıne, kúlki, ázil tilinde. Qoıýshy rejısseri jáne óleńderin jazǵan – Ábýbákir Rahımov

Kórnekti jazýshy-dramatýrg T.Nurmaǵambetovtiń «Bes boıdaqqa bir toı» komedııasy ultymyz úshin mańyzyn joımaıtyn urpaq taǵdyry men onyń bolashaǵy máselesin kúlki prızmasynan qarastyrady. Bes boıdaq – Qyrmanbaı shal jáne onyń uldary. Jer ortasynan aýǵanda kempiri dúnıe salǵan Qyrmanbaı uldarynyń turmys-tynys tirshiligine  qarny ashady, sondyqtan óz áýletiniń erteńine alańdaýly bolsa, uldary ákesin úılendirmekke álek.

Búgingi kún máselesin ulttyq dúnıetanym turǵysynan qarastyratyn, ázilge toly qoıylymda ásem án men qazaqy qaljyńdar jalpy atmosferany jandandyra túsedi.

Sýretshi — E.Ádisbek, mýzykasyn óńdegen — D.Kaden, bılerin qoıǵan — G.Muhamedjanova, rejısserdiń assıstenty jáne Qurmanbaı rólinde — B.Turys.

Kim, nege kúldi? Jurt nege kúlip otyryp, «toı» ústinde oıǵa batty? Bul suraqtyń jaýabyn bilgińiz kelse nemese qart Qurmanbaıdyń toıyn óz kózińizben kórgińiz kelse, bir úıli jannyń bir sáttegi toıyna kýá bolǵyńyz kelse 29 qarasha kúni de M.Áýezov teatryna baryp tamashalasańyzdar bolady!

Qurmetolla MUHAMETHANULY

«QANDASTAR» ÚShIN