Shymkentke jyl basynan beri 500-ge jýyq qandas qonys aýdardy

Shymkent qalasyna jyl basynan beri kóship kelgen 340 otbasyndaǵy 464 azamatqa qandas mártebesi berildi. Elge oralǵandardyń basym kópshiligi, ıaǵnı 448 adam kórshi О́zbekstan Respýblıkasynan qonys aýdarǵan. Sondaı-aq, atajurtqa Aýǵanstan, Qytaı jáne Reseı elinen de qandastarymyz kóship kelip, qalanyń ár aýdanyna qonystanyp otyr.

Alys-jaqyn shetelden kóship kelgen qandastardy qoldaý maqsatynda qalada 11 jyldan beri Jumyspen qamtý jáne áleýmettik qorǵaý basqarmasyna qarasty «Qandastardy beıimdeý jáne yqpaldastyrý ortalyǵy» qyzmet kórsetýde. Ortalyq mamandary QR zańnamasyna sáıkes, elge oralǵan azamattarǵa 6 aı merzimde beıimdeý jáne yqpaldastyrý qyzmetterin usynady.

Qazirgi tańda munda 14 otbasy quramyndaǵy 29 adam elge beıimdelýde. Tipti túrli mamandyqtar boıynsha tegin oqý kýrstary qarastyrylǵan. Qandastarǵa barlyq suraqtary boıynsha aqparattyq baǵytta túsindirý jumystary júrgizilýde.