بيىل ۇبت قانداستار ءۇشىن ونلاين فورماتتا وتەدى

ءبىلىم جانە عىلىم ءمينيسترى «اق جول» فراكتسياسىنىڭ دەپۋتاتتىق ساۋالىنا جاۋاپ بەردى.

بيىل 28 ساۋىردە قر پارلامەنتى ءماجىلىسى دەپۋتاتى قازىبەك يسا ءبىلىم جانە عىلىم ءمينيسترى اسحات ايماعامبەتوۆكە «اق جول» فراكتسياسى اتىنان دەپۋتاتتىق ساۋال جولداپ, قانداس جاستاردىڭ ءبىلىم الۋ ماسەلەسىنە قاتىستى وزەكتى ماسەلەلەردى كوتەردى. وندا باستى ماسەلە – قازاقستانداعى جانە الەمدەگى ەپيدەميولوگيالىق جاعدايعا بايلانىستى شەتەلدەگى قانداس جاستاردى وقۋعا ونلاين قابىلداۋ كەرەكتىگى بولاتىن.
جاقىندا ءبىلىم جانە عىلىم ءمينيسترى ا.ايماعامبەتوۆتەن رەسمي جاۋاپ كەلدى. بيىل ۇبت كانداستار ءۇشىن 2021 جىلعى ماۋسىم ايىندا ونلاين فورماتتا وتەتىن بولدى.

قۇرمەتتى دەپۋتاتتار!

قازاقستان رەسپۋبليكاسى ءبىلىم جانە عىلىم مينيسترلىگى (بۇدان ءارى – مينيسترلىك) دەپۋتاتتىق ساۋالدى قاراستىرىپ كەلەسىنى حابارلايدى.

مينيسترلىك ۇلتتىق بىرىڭعاي تەستىلەۋدىڭ (بۇدان ءارى – ۇبت) تاپسىرۋىن تالاپكەرلەرگە ىڭعايلى ەتۋ ماقساتىندا ۇبت اعىمداعى جىلى العاش رەت تولىعىمەن ەلەكتروندى فورماتقا كوشىرىلدى.

2020 جىلى قازاقستانداعى جانە الەمدەگى ەپيدەميولوگيالىق جاعدايعا بايلانىستى مينيسترلىك ۇلتتىق تەستىلەۋ ورتالىعىمەن (بۇدان ءارى – ۇتو) بىرلەسىپ قانداستار ءۇشىن ۇبت-نى ونلاين فورماتتا ۇيىمداستىردى.
ول ءساتتى سىناقتان ءوتىپ, 2020 جىلعى 19 شىلدەدە 551 ادامنىڭ قاتىسۋىمەن وتكىزىلدى.
ۇبت-نى وبەكتيۆتى وتكىزۋ ماقساتىندا تەست تاپسىرۋ پروتسەسى كەزىندە پروكتورينگ جانە بەينەمونيتورينگ جۇيەسى تولىق قامتاماسىز ەتىلدى.

بيىل قازاقستانداعى جانە الەمدەگى ەپيدەميولوگيالىق جاعدايعا بايلانىستى ۇبت كانداستار ءۇشىن 2021 جىلعى ماۋسىم ايىندا 2020 جىلعى تاجىريبەنى ەسكەرە وتىرىپ ونلاين فورماتتا وتەدى.
ۇبت تاپسىرۋدىڭ بۇل فورماتى مينيسترلىك, ۇتو جانە «وتانداستار» قورىمەن بىرگە جان-جاقتى قارالدى.

مينيسترلىك قانداستارعا قازاقستاندىق جوعارى وقۋ ورىندارىندا جوعارى ءبىلىم الۋ مۇمكىندىگىن كەڭەيتۋ بويىنشا تۇراقتى نەگىزدە جۇمىس جۇرگىزۋدە.

ەلىمىزدەگى جانە جالپى الەمدەگى ەپيدەميولوگيالىق جاعدايعا بايلانىستى ۇبت-نى ۇيىمداستىرۋ پروتسەسى كەزىندە ءبىزدىڭ ستۋدەنتتەر مەن جاستاردىڭ دەنساۋلىعى ماسەلەسى مينيسترلىك ءۇشىن باسىم بولىپ تابىلاتىندىعىن ايتا كەتكەن ءجون.

مينيستر ا. ايماعامبەتوۆ

كەشە قانداستار قر ءبىلىم جانە عىلىم مينيسترلىگىنە جانە پارلامەنتتە شەتەلدەگى قانداس جاستاردىڭ ەمتيحاندى ونلاين تاپسىرۋى ماسەلەسىن كوتەرگەن «اق جول» فراكتسياسىنا العىس ايتتى.

بۇل تۋرالى قانات قاقار ەسىمدى قانداسىمىز الەۋمەتتىك جەلىدە جازدى.

— قر ءبىلىم جانە عىلىم مينيسترلىگىنە, ءماجىلىس دەپۋتاتى قازىبەك يسا اعايعا مىڭ العىس! ۇلتى قازاق شەتەلدىك ازاماتتار ەمتيحانعا ونلاين قاتىسۋ مۇمكىندىگىن الدى,- دەپ جازدى ول.

اتاپ ءوتۋ كەرەك, قازاقستان رەسپۋبليكاسىنىڭ ءبىلىم جانە عىلىم مينيسترلىگى شەتەلدىك ازاماتتاردى, سونىڭ ىشىندە, باكالاۆريات, ماگيستراتۋرا جانە دوكتورانتۋرانىڭ ءبىلىم بەرۋ باعدارلامالارى بويىنشا ەلىمىزدىڭ جوعارى وقۋ ورىندارىندا وقۋعا قازاقستان رەسپۋبليكاسىنىڭ ازاماتى بولىپ تابىلمايتىن قازاقتاردى وقۋعا شاقىرعان بولاتىن.

بولىنگەن گرانتتار سانى:
— باكالاۆريات — 490
— ماگيستراتۋرا — 50
— PhD دوكتورانتۋرا — 10

ۇمىتكەرلەر قۇجاتتاردى ونلاين رەجيمىندە 2021 جىلعى 7 ماۋسىمنان 20 شىلدەگە دەيىن تاپسىرا الادى.

قوسىمشا اقپارات بولون پروتسەسى جانە اكادەميالىق ۇتقىرلىق ورتالىعىنىڭ سايتىندا ورنالاسقان.

بارلىق سۇراقتار بويىنشا حابارلاسىڭىز:
تەل.: +7 (7172) 28 75 26