Jańalyqtar

Nur-Sultanda Qytaı elshiligine narazylyq bildirgen bir top turǵyn ashtyq jarııalamaq

Qýdalaýǵa ushyrap, qamalǵan týystaryn bosatýdy talap etken bir top turǵyn Nur-Sultandaǵy Qytaı elshiligine bardy. Olar Shyńjańda qalǵan jaqyndarynyń negizsiz aıyptalyp jatqanyn aıtyp, kórshi eldiń Qazaqstandaǵy elshisi Chjan Sıaomen tildespek boldy. Biraq elshiliktiń ishine kire almady. Aıtýlarynsha, Qytaı bıligi Qazaqstan azamattaryn zańsyz ustap, qamaǵan. Endi olar tez arada kórshi el tarapy jaýap bersin, bolmasa elshilik aldynda qonyp, ashtyq jarııalaımyz dep otyr. Bul týraly “Adyrna” ulttyq portaly “Informbıýro” jańalyqtar baǵdarlamasyna silteme jasap habarlaıdy. 

Gúlbaran bes jyldan beri Qytaıdyń túzeý mekemelerine qamalǵan týystaryn bosatýdy talap etip júr. Aıtýynsha, kórshi el bıligi inisine jazyqsyz jala jaýyp, qamap qoıǵan. Ol shyńjańdyqtardyń basym bóligi dinı ustamyna baılanysty qysym kórip jatyr deıdi.

“Eki aı namaz úırengeni úshin qamap tastaǵan. Bir aýyldyń moldasyn ustap, sol moldany uryp-soǵyp moıyndatyp, meniń balam bastaǵan bir top bala jazyqsyz sottalyp otyr. Baýyrymnyń jalǵyz balasy. Baýyrym aýrýshań boldy. Ol jerde aryzdanýǵa quqyǵyń joq”, – deıdi Almaty qalasynyń turǵyny Gúlbaran О́miráli.

Qytaı elshiligine kelgen ashýly top qoldaryna «jazyqsyz jazalandy» degen týystarynyń sýretterin ustap turdy. Olar kórshi eldiń Qazaqstandaǵy elshisi Chjan Sıaomen tildespek boldy. Biraq jınalǵan eldiń aryzyn tyńdaýǵa birde-bir sheneýnik shyqqan joq. Polıeıler de «elshiliktiń jańa ǵımaratynda eshkim joq» dedi. Al syrtqy ister mınıstrliginiń ókili Bolat Syrlybaev jınalǵandardyń talaptary týraly biletinin aıtty.

“Bul kisilerdiń talabyn bilemiz. Biz bul máselemen aınalysyp jatyrmyz. Birneshe jyl boldy. Bul kisilerdiń kóbisin ózimiz qabyldaǵanbyz. Sondyqtan qazir biz baraıyq, qujattaryn kóterip qaraıyq, aryzdaryn alaıyq taǵy da”, – deıdi QR SIM Konsýldyq qyzmet departamentiniń basqarma basshysy Bolat Syrlybaev.

Talabyn aıtýǵa kelgender sheneýnikter mardymdy jaýap bermese, elshilik aldynda qonamyz dedi. Sebebi jeti aıdan beri Almaty qalasyndaǵy konsýldyq aldynda ishki narazylyqtaryn bildirip, ashtyq jarııalap sharshapty. Sondyqtan bas qalaǵa kelip, talapty elshiniń ózine aıtýdy uıǵarǵan.

”Adyrna” ulttyq portaly

Osy aıdarda

Dobavıt kommentarıı

Close