Көл құрылыс қалдығымен көміліп, тұрғындар дабыл қағуда: Астана әкімдігі неге үнсіз?

Нажимеденов көшесі, 64 мекенжайы маңындағы тұрғындар экологиялық мәселе жөнінде дабыл қағуда. Олардың айтуынша, бұл аудандағы шағын көл мен бірнеше тоған құрылыс және тұрмыстық қалдықтармен көміліп жатыр, деп хабарлайды Skifnews.kz ақпарат порталы.

«Нажимеденов көшесі, 64 мекенжайындағы шағын көлді көміп жатыр. Бұл аумақта бірнеше кішігірім көлдер мен тоғандар бар еді – бәрін құрылыс және тұрмыстық қалдықтармен көміп жатыр», – делінген тұрғындардың хабарламасында.

Тұрғындардың айтуынша, дәл осы аумақ Президенттің тапсырмасымен жоспарланған «Мыңжылдық аллеясы» жобасына енуі тиіс болған. Алайда тиісті мемлекеттік органдар бұл жағдайға көз жұма қарап отыр.

«Әкімдік те, санитарлық-эпидемиологиялық қызмет те әрекет етпей отыр. Мемлекет тарапынан толық немқұрайдылық байқалады», – дейді жергілікті халық.

Алаңдаулы тұрғындар табиғи ортаны сақтап қалу үшін шұғыл шаралар қабылдауды және жауапты органдардың араласуын талап етеді.