«مىڭداعان قازاق قىتايدا قاماۋدا وتىر» — تىڭ دەرەكتەر اشىلدى

14 جەلتوقسان كۇنى الماتى قالاسىندا ورنالاسقان ادام قۇقىقتارى مەن زاڭدىلىقتى ساقتاۋ جونىندەگى قازاقستان حالىقارالىق بيۋروسىندا قىتايداعى جازىقسىز تۇرمەگە قامالىپ, ءىز-ءتۇزسىز كەتكەن قازاق زيالى جاستارىنىڭ جاقتاستارى, تۋىستارى ءباسپاسوز ءماسليحاتىن وتكىزدى.

ءباسپاسوز جيىنىنا بەلگىلى قوعام قايراتكەرى, ساياساتكەر رىسبەك سارسەنباي, جازىقسىز ۇستالعان عاراپا ءناسيوللا ۇلىنىڭ اناسى كاماتان توقتامۇراتقىزى, جازىقسىز تۇرمەدە وتىرعان اسقار ازاتبەكتىڭ جاقىنى گاۋھار قۇرماناليەۆا جانە قوعام بەلسەندىلەرى مەن جۋرناليستەر قاتىستى.

— شىنجاڭ سانجى وبلىستىق 2-ءشى ورتا مەكتەپتىڭ ادەبيەت ءپانى مۇعالىمى, مەنىڭ كەنجە بالام عاراپا ءناسيوللا ۇلى 2021 جىلدىڭ شىلدە ايىنان بەرى ۇستالىپ, حابارسىز كەتتى. ناقتى قاماۋعا الىنۋ سەبەبىن ءالى بىلمەيمىز. ولار ايتقان جوق. ول قىتاي بيلىگىنە قارسى ەشبىر ءسوز ايتىپ, قىلمىس جاساعان ەمەس. جازىقسىز. ارتىندا 3 جاسار بالاسى مەن ايەلى قالدى, — دەيدى كوزىنە جاس العان اناسى كاماتان توقتامۇراتقىزى.

— قىتايدا 2017 جىلى باستالعان قىسىم مەن قۋدالاۋ پاندەميا كەزىندە ءسال باسەڭسىگەندەي كورىنگەنىمەن, قازىر قايتا كۇش الىپ, ۇستاۋ مەن جازىقسىز تۇرمەگە قاماۋ قايتا باستالدى, — دەيدى قوعام بەلسەندىسى قىدىرالى وراز ۇلى.

310 كۇننەن بەرى قازاقستانداعى قىتاي ەلشىلىگى الدىندا پيكەت وتكىزىپ كەلە جاتقان توپ وكىلى گاۋھار قۇرماناليەۆا دا وسى كۇنگە دەيىن نە پرەزيدەنت اكىمشىلىگى, نە ءسىم, نە قىتاي ەلشىلىگى بىردە-ءبىر رەت شىعىپ ولاردىڭ بۇل جەردە نە ءۇشىن تۇرعانى جايلى سۇراماعىنان ايتتى. جازىقسىز قاماۋدا وتىرعان ازاماتتاردى بوساتۋدى سۇراعان توپقا وسى كۇنگە دەيىن قازاقستان بيلىگى 4 ملن. تەڭگە جۋىق ايىپپۇل سالعان.

قوعام قايراتكەرى, ساياساتكەر رىسبەك سارسەنباي: «مىڭداعان قازاق قىتايدا قاماۋدا وتىر. ال, قازاقستان بيلىگى سەلت ەتپەيدى, ونى قىتايدىڭ ىشكى ءىسى دەپ قاراپ وتىر. بۇل قىتايعا بودان بولعاندىقتىڭ بەلگىسى. ساياسي تۇرعىدان دا, زاڭدىق تۇرعىدان دا, مەملەكەتتىك تۇرعىندان دا قىتايعا تاۋەلدىلىكتىڭ بەلگىسى» دەيدى.

قانداستارعا قازاقستان مەملەكەت رەتىندە ەشقانداي جاردەم بەرە الماي وتىرعانىن ايتقان ساياساتكەر باتىس ەلدەرى سياقتى سانكتسيالار سالىپ, بۇرىنعى جاسالعان كەلىسىمشارتتاردىڭ كۇشىن جويىپ, مادەني بارىس-كەلىستى توقتاتۋ كەرەك دەيدى. ول سونىمەن بىرگە بەيجىڭدە وتكەلى جاتقان قىسقى وليمپياداعا دا بايكوت جاريالاپ, قىتايعا قىسىم جاساۋدى ۇسىندى.

سوڭعى كەزدە قىتايدا اقىن-جازۋشىلار, زيالى قاۋىم وكىلدەرى ءجيى قۋدالانىپ جاتقانىن ايتقان ساياساتكەر ر.سارسەنباي ءبىزدىڭ ەلدە ولاردى جوقتايتىن پارلامەنتتە, بيلىكتە وتىرعان زيالىلار, اقىن-جازۋشىلار ەكەنىن ايتا كەلىپ: «مىنا ارىپتەستەرىمىزدى قورعايىق دەپ بيلىك مىنبەرىنەن ءبىر اۋىز ءسوز ايتۋى كەرەك» دەدى.

قازىرگە دەيىن قىتايداعى قازاق قالامگەرلەرى اراسىنان عاراپا ءناسيوللا ۇلى, ناعىز مۇحاممەت ۇلى, قابىكەن زەينۇراين, قالىسبەك بابان ۇلى, ادەنبەك قاماش ۇلى, سارقىتجان سالىق ۇلى, نۇرباق بيعازين قاتارلى ءبىر توپ ازاماتتاردىڭ قاماۋعا الىنعانى, ءتۇرلى نەگىزسسىز ايىپتارمەن سوتتالعانى نەمەسە ءىز-دەرەكسىز كەتكەنى بەلگىلى بولىپ وتىر. شىڭجاڭداعى ساياسي قىسىمعا ۇشىراعان بۇدان وزگە دە كوپتەگەن قازاق ازاماتتارىنىڭ بار ەكەنى انىق.

Qandastar.kz