الەكساندر ۆينوكۋروۆتىڭ ەكى ۇلى «Astana Qazaqstan Development Team» ۆەلوقۇرامىنا قوسىلدى

UCI «Astana Qazaqstan Team» ۆەلوكومانداسىنىڭ جاستار جوباسى بولىپ تابىلاتىن «Astana Qazaqstan Development Team» قۇرلىقتىق كومانداسى 2022 جىلعى دەبيۋتتىك ۆەلوماۋسىمعا ءوز قۇرامىن جاريالادى, دەپ حابارلايدى «ادىرنا» ۇلتتىق پورتالى.

ەستەرىڭىزگە سالا كەتەيىك, قاراشانىڭ ءبىرىنشى ونكۇندىگىندە «Astana Qazaqstan Team» باسشىلىعى 23 جاسقا دەيىنگى شاباندوزداردى ىرىكتەۋ ءۇشىن UCI قۇرلىقتىق كومانداسىن قۇرۋ تۋرالى شەشىم قابىلداعان بولاتىن.

جاستار ۆەلوۇجىمىنىڭ 2022 جىلعى جاڭا ماۋسىمداعى باستى ماقساتتارىنىڭ ءبىرى ەۋروپاداعى ەڭ بەدەلدى جاستار جارىستارىندا ونەر كورسەتىپ, بىرقاتار كاسىبي دەڭگەيدەگى ۆەلودودالارعا قاتىسۋ بولماق. بىراق قۇرلىقتىق ۆەلوكوماندا UCI «Europe Tour» سەرياسىنىڭ جارىستارىنا عانا قاتىسا الادى.

قازاقستاندىق ۆەلوكوماندا رەسمي سايتىنىڭ حابارلاۋىنشا, كەلەسى ماۋسىمدا «Astana Qazaqstan Development Team» قۇرلىقتىق كومانداسىنىڭ نەگىزگى قۇرامىنا ون شاباندوز كىرەدى. ولاردىڭ بەسەۋى قازاقستاننىڭ, تاعى بەسەۋى – يتاليا, ەكۆادور, كولۋمبيا, فرانتسيا جانە لاتۆيانىڭ نامىسىن قورعايتىن بولادى. سونداي-اق جاستار كومانداسىنىڭ قازاقستاندىق قاتىسۋشىلارى اراسىندا «Astana Qazaqstan Team» باس مەنەدجەرى, تانىمال قازاقستاندىق ۆەلوشاباندوز الەكساندر ۆينوكۋروۆتىڭ ەكى ۇلى – 19 جاسار الەكساندر ۆينوكۋروۆ پەن نيكوليا ۆينوكۋروۆ تا بار.

«Astana Qazaqstan Development Team» قۇرامىنا جاسوسپىرىمدەر اراسىنداعى توپتىق جارىستا ازيا چەمپيوناتىنىڭ (2019) جانە 23 جاسقا دەيىنگى توپتىق جارىستا قازاقستان چەمپيوناتىنىڭ (2021) قولا جۇلدەگەرى وركەن سلامجانوۆ, جاسوسپىرىمدەر اراسىنداعى جەكە جارىستا قازاقستان چەمپيونى (2021), جاسوسپىرىمدەر اراسىنداعى توپتىق جارىستا قازاقستان چەمپيوناتىنىڭ كۇمىس جۇلدەگەرى (2021), كوپكۇندىك «كايسەري دجۋنيور رەيس» جانە «ۆەلو ەرسيەس دجۋنيور رەيس» جارىستارىنىڭ جەڭىمپازى (2021) اندرەي رەمحە, قازاقستاندىق جاستاردىڭ شەتەلدىك قاتىسۋشىلارىنان 23 جاسقا دەيىنگى جەكە جارىستا ەكۆادور چەمپيونى (2021), 23 جاسقا دەيىنگى توپتىق جارىستا ەكۆادور چەمپيوناتىنىڭ كۇمىس جۇلدەگەرى (2021), «ۆۋەلتا كوستا-ريكا» كەزەڭىنىڭ جەڭىمپازى (2019), «ۆۋەلتا گۆاتەمالا» (2020) ەكى كەزەڭىنىڭ جەڭىمپازى جانە «ۆۋەلتا ەكۆادور» (2020) قولا جۇلدەگەرى حارولد مارتين لوپەس تە كىرگەنىن اتاپ ءوتۋ قاجەت.

سونىمەن بىرگە قازاقستاندىق كوماندادا «دجيرو ۆاللە د ‘اوستا» كوپكۇندىك جارىستارىنىڭ كۇمىس جۇلدەگەرى (2021), جاسوسپىرىمدەر اراسىنداعى توپتىق جارىستىڭ يتاليا چەمپيونى (2019) جانە «تروفەو بۋففوني» بىركۇندىك جارىسىنىڭ جەڭىمپازى (2019) يتالياندىق دجانماركو گاروفولي, «سەنت-رومەن گران-پري» بىركۇندىك جارىسىنىڭ قولا جۇلدەگەرى (2021), «ۆۋەلتا ا لا سۋببەتيكا» كوپكۇندىك جارىسىنىڭ قولا جۇلدەگەرى (2020) ونەر كورسەتەدى.

سونداي-اق «تۋر دۋ جەۆودان وكسيتانيا» ءبىر كۇندىك جارىسىنىڭ (2020) جەڭىمپازى فرانتسۋز پابلو سانچەس پەن جاسوسپىرىمدەر اراسىنداعى توپتىق جانە جەكە جارىستا لاتۆيا چەمپيونى (2021) ماتيس كالۆەرشس, ۆەلوكروسس باعىتىنا ماشىقتانعان يتالياندىق شاباندوز داۆيدە تونەتتي دە قوسىلماق.

«مەنىڭ ويىمشا, ءبىز جاس ۆەلوشاباندوزداردىڭ وڭتايلى ءارى تەڭدەستىرىلگەن قۇرامىن جيناي الدىق. ولاردىڭ كوپشىلىگىندە ەڭ جوعارى دەڭگەيدەگى جاسوسپىرىمدەر مەن جاستار جارىستارىندا ونەر كورسەتۋدىڭ ماڭىزدى تاجىريبەسى بار. جاڭا كوماندانىڭ دەبيۋتتىك ماۋسىمى ءساتتى بولادى دەپ ۇمىتتەنەمىن», — دەپ ءسوزىن تۇيىندەدى «Astana Qazaqstan Team» ۆەلوكومانداسىنىڭ باس مەنەدجەرى الەكساندر ۆينوكۋروۆ.

«استانا» كاسىبي سپورت كلۋبىنىڭ باس سەرىكتەسى – «سامۇرىق-قازىنا» ۇاق» اق, قۇرىلتايشىسى – تۋريزم يندۋسترياسى مەن سپورتتى قولداۋ قورى

ورالباي مەرگەنباي ۇلى